وقىرمان ويى – ولجامىز
استانادا «باسپاسوزگە جازىلۋشىلار كۇنى» ءداستۇرلى مەرەكەسى ءوتتى. جىل سايىن گازەت-جۋرنال وقىرماندارى ءۇشىن ۇيىمداستىرىلاتىن شاراعا ەلىمىزگە بەلگىلى باسىلىمدار وكىلدەرى مەن قالا تۇرعىندارى قاتىستى.
ءان-شاشۋمەن اشىلعان شاراعا كەلگەن قوناقتاردى «قازپوشتا» اق «استانا پوچتامت» استانالىق فيليالىنىڭ ديرەكتورى گۇلميرا بابەنوۆا باسپاسوزگە جازىلۋ ناۋقانىنىڭ باستالۋىمەن قۇتتىقتاپ, گازەت-جۋرنال ۇجىمدارىنا جەمىستى ەڭبەك, شىعارماشىلىق تابىس تىلەدى.
«استانا اقشامى» گازەتىنىڭ ارنايى ءسورەسىنە كەلىپ, باسىلىم تۋرالى وي بولىسكەن وقىرماننىڭ ءبىرى الماگۇل بورانتاەۆا ىستىق ىقىلاسىن بىلايشا ءبىلدىردى:
– مەنىڭ ماماندىعىم – پەداگوگ. قازىر زەينەتتە بولسام دا ءبىلىم بەرۋ ىسىنەن قول ۇزگەن جوقپىن. قولىم تيگەنشە قازاقشا, ورىسشا گازەتتەردى وقىپ تۇرامىن. ال سىزدەردىڭ «استانا اقشامىن» ءبىرىنشى كەزەكتە قارايمىن. ويتكەنى بۇل استانامىزدىڭ ءتول گازەتى عوي. قالانىڭ تىرشىلىگى تۋرالى جاقسى جازاسىزدار. سوڭعى كەزدەرى گازەتتەرىڭىز قىزىق بولىپ بارادى. بيىل دا مىندەتتى تۇردە جازىلامىن. وسى مۇمكىندىكتى پايدالانىپ, قالا تۇرعىندارىن استانالىق گازەتكە جازىلۋعا شاقىرامىن. وقىرماندارىڭىز كوبەيە بەرسىن!
وسى كۇنى مەرەكەلىك شاراعا كەلىپ ءوز ونىمدەرىن, ياعني گازەت-جۋرنالدارىن ۇسىنعان «ەگەمەن قازاقستان», «ۆەچەرنيايا استانا» گازەتتەرى, «National Geographic», «قازاقستان ايەلدەرى» جۋرنالدارى جانە باسقا دا باسىلىمدار وكىلدەرى دە وقىرماندارىمەن قاۋىشىپ جاتتى.
مەرەكەلىك شاراعا ارنايى كەلىپ, ءبىرنەشە ادامعا «استانا اقشامى» گازەتىن تەگىن جازدىرىپ بەرۋگە نيەت بىلدىرگەن «ەكسكليۋزيۆ دامۋ» جشس ديرەكتورى مۇرات بەيىسباەۆ دەگەن ازامات كوڭىلىمىزدى كادىمگىدەي كوتەرىپ تاستادى.
– «استانا اقشامى» گازەتىنە اۋعانستان سوعىسى سالدارىنان مۇگەدەك بولىپ قالعان 5 جاۋىنگەردى الداعى جىلعا جازدىرۋعا كەلدىم. ءوزىم دە وقيتىن بولامىن.