ۇلتتىق مۋزەيدە بەلگىلى قىلقالام شەبەرى, قازاقستاننىڭ ەڭبەك سىڭىرگەن قايراتكەرى الپىسباي قازىعۇلوۆتىڭ «كوڭىل كوكتەمى» اتتى كورمەسى اشىلدى. 12 جەلتوقسانعا دەيىن جالعاساتىن كورمەگە اۆتوردىڭ 100-دەن استام كارتيناسى قويىلدى.
سۋرەتشىنىڭ بالالىق شاعىنان قالىپتاسقان تانىم-تۇسىنىگى مەن قورشاعان ورتا تۋرالى قيال كوكجيەگى «مەنىڭ بالالىق شاعىمنىڭ اۋىلى», «بەلدەسۋ», «كەرۋەن», «ويىن» سىندى تۋىندىلارىنان كورىنىس تاپقان.
مامانداردىڭ پىكىرىنشە, الپىسباي قازىعۇلوۆتىڭ تۋىندىلارىندا بەرىلگەن شىنايى ءومىر كورىنىستەرى – جاي عانا كوشىرمە ەمەس, ول شەبەردىڭ قىلقالامىنا عانا ءتان وزىندىك جەڭىل مانەرى ايشىقتالعان شىعارمالار. كارتينالارىنان سۋرەتشىنىڭ جان تەبىرەنىستەرىن, كوركەم الەمىن تاماشالاۋعا بولادى.
الپىسباي قازىعۇلوۆ تۋىندىلارىنىڭ وزىنە ءتان دارالىعى بار. كوپ شىعارمالار اراسىنان ونىڭ ەڭبەكتەرىن وڭاي تانۋعا بولادى. ول كوڭىل-كۇيدىڭ اسەم كورىنىستەرىن وزىندىك شەبەرلىكپەن ۇيلەستىرەدى. سوندىقتان دا بولار, اۆتور شىعارمالارىنىڭ باسىم بولىگى قارابايىر تىرشىلىك كورىنىستەرىنە ەمەس, تۇڭعيىق ويدىڭ كوركەم كەلبەتىنە ارنالعان.
تولەگەن مۇحامەدجانوۆ, قازاقستاننىڭ ەڭبەك سىڭىرگەن قايراتكەرى, كومپوزيتور:
– بۇگىنگى كورمەدە ادەمىلىكپەن, اسەمدىكپەن قاۋىشىپ وتىرمىز. الپىسباي ارال تەڭىزىنىڭ جاعاسىندا تۋىپ وسكەن. بۇگىنگە دەيىن 5000-نان استام سۋرەت سالعان. الپىسبايدى قازاقتىڭ پيكاسسوسى دەسەك, ارتىق بولمايدى.
گۇلزەينەپ پازىلوۆا, قر مادەنيەت جانە سپورت مينيسترلىگىنىڭ مۋزەيلەر مەن كىتاپحانالار باسقارماسىنىڭ باسشىسى:
– الپىسباي قازىعۇلوۆ – قازاق بەينەلەۋ ونەرىنىڭ حاس شەبەرى. سۋرەتشىنىڭ شىعارمالارى كەڭىنەن تانىمال. جەكە كورمەلەرى رەسەي, ۇلىبريتانيا, جاپونيا, تۇركيا تاعى باسقا ەلدەردە وتكىزىلگەن. بۇگىنگى كورمەنىڭ اۆتورى الەمدىك ونەرگە قوسقان سۇبەلى ۇلەسى ءۇشىن ەۋروپا ونەر وداعىنىڭ ماساريك اتىنداعى سىيلىعىمەن ماراپاتتالعان. ول تەك الپىسباي اعانىڭ شىعارماشىلىعىنا عانا ەمەس, بۇكىل قازاق حالقىنىڭ مادەنيەتىنە بەرىلگەن ۇلكەن ماراپات دەپ تانيمىز.
