اقىلدى شامدار ۇنەمدى
قالالىق ءماسليحاتتا «استانا – اقىلدى قالا» سمارت-جوباسىن ىسكە اسىرۋ ماسەلەسى قارالدى.
ەلوردادا «استانا – اقىلدى قالا» سمارت-جوباسىن ىسكە اسىرۋ مىقتاپ قولعا الىنعان. ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى الىشەر ابدىقادىروۆتىڭ ايتۋىنشا, استاناداعى تىڭ جوبالار الەمدەگى اقىلدى قالالاردىڭ تاجىريبەسىنە سۇيەنە وتىرىپ جۇزەگە اسىرىلادى.
– ەلباسى ءوزىنىڭ جولداۋىندا ايتقانداي, اقىلدى قالا ءومىر سۇرۋگە جايلى ءارى قاۋىپسىز بولۋى كەرەك. بۇل تۇرعىدا ىسكە اسىرعان جوبانىڭ ناتيجەلى بولىپ جاتقانىن ايتىپ وتكەن ءجون. مىسالى, «سەرگەك» كامەرالارىنىڭ بيىلعى 9 ايداعى كورسەتكىشىن وتكەن جىلمەن سالىستىرساق, جول-كولىك وقيعاسىنان كوز جۇمعاندار سانى ەكى ەسەگە, جاراقاتتانعاندار 20 پايىزعا ازايعان. الداعى ۋاقىتتا كوشەلەردى اقىلدى شامدارمەن جارىقتاندىرۋ جوباسى جۇزەگە اسىرىلاتىن بولادى. مۇنداعى ەلەكتر شىعىنى بۇرىنعىمەن سالىستىرعاندا 50-60 پايىزعا ۇنەمدەلەدى دەپ كوزدەلۋدە, – دەگەن الىشەر ءابدىقادىروۆ بارلىق جوبالاردىڭ مەملەكەتتىك-جەكەمەنشىك ارىپتەستىك نەگىزىندە ىسكە اسىرىلاتىندىعىن تىلگە تيەك ەتتى.
سونداي-اق بايانداماشىلاردىڭ سوزىنە قاراعاندا, قازىرگى تاڭدا ءبىلىم, مەديتسينا سالالارىندا ەلەكتروندى فورماتتا قىزمەت كورسەتۋ جاعى ىلگەرى باسىپ كەلە جاتقانمەن, بۇل جاعى ارحيۆ ىسىندە ءالى دە باسەڭ كورىنەدى. دەگەنمەن, بۇل تۇرعىدا جۇمىستاردىڭ جۇرگىزىلىپ جاتقانىن ايتادى تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساكەن ەسىركەپ.
– قازىرگى تاڭدا استانا قالاسى مەملەكەتتىك مۇراعاتىنىڭ قورىندا 50 ميلليوننان اسا قۇجات پاراعى ساقتالعان. ونىڭ ىشىندە 353 مىڭ ساقتاۋ بىرلىگى بار. ارحيۆ قويماسىنداعى قۇجاتتاردىڭ نەگىزگى بولىگى – قاعاز. بيىل جىل باسىنان بۇگىنگى كۇنگە دەيىن ارحيۆ ءىسى بويىنشا كەلىپ تۇسكەن وتىنىشتەر سانى 8 مىڭعا جۋىقتايدى. اقپاراتتىق جۇيەنىڭ بولماۋىنا بايلانىستى بارلىق وتىنىشتەردى ارحيۆ قىزمەتكەرلەرى قۇجاتتاردى قولمەن كوتەرىپ, كاتالوگتى وزدەرى جاساپ, وسىلاي اقپارات بەرۋگە ءماجبۇر. قازىرگى ۋاقىتتا مەكەمەنىڭ بالانسىندا 1 سەرۆەر, 48 كومپيۋتەر بار. بىراق ولاردىڭ كوبىسى ەسكىرگەن. وسىعان بايلانىستى استانا قالاسى مەملەكەتتىك مۇراعاتىن جاقسارتۋ بويىنشا 2019-2021 جىلدارعا ارنالعان دامۋ ستراتەگياسىنىڭ جوباسى ازىرلەندى. ەگەر بۇل جوبا قابىلدانسا, 50 ميلليون قۇجاتتىڭ بارلىعى سكانەرلەنىپ, 2021 جىلى ارحيۆتەگى قۇجاتتاردى تسيفرلاندىرۋ جوسپاردا تۇر. ال جىل سوڭىنا دەيىن 70 مىڭ قۇجاتتى سكانەرلەۋ كوزدەلىپ وتىر. سونىمەن قاتار ارحيۆكە جاڭا عيمارات بەرىلەدى دەپ كۇتىلۋدە. ناجىمەدەنوۆ پەن قالداياقوۆ كوشەلەرىنىڭ بويىندا ورنالاسقان ەكى عيماراتتا جوندەۋ جۇمىستارى جۇرگىزىلۋدە, – دەيدى ول.