بۇگىندەرى داعدارىس دەندەپ, قىمباتشىلىق حالىقتى قىل بۇراۋداي بۋىپ بارادى. كوممۋنالدىق تاريف, كيىم-كەشەك, ءدارى-دارمەك, ازىق-تۇلىك, قىسقاسى, ءار سالادا باعا ءوسىمى ءتىركەلىپ, جۇرتتىڭ كوڭىلىن كۇپتى ەتىپ وتىر. بىراق ەڭ باستىسى – ىشەر اسىمىزعا باعا اسپانداماسا ەكەن دەگەن تىلەك.
ەلىمىزدىڭ باس قالاسى رەتىندە استانا ءۇشىن دە قىمباتشىلىق ماسەلەسى اسا وزەكتى. بۇل باعىتتا شاھار بيلىگى تاراپىنان ناقتى جۇمىستار جۇرگىزىلىپ, حالىق ارزان باعاعا تاۋار الاتىنداي مۇمكىندىكتەر جاسالعان. اپتا سايىن ەلوردادا ايماقتاردىڭ اۋىل شارۋاشىلىعى تاۋارلارىنىڭ جارمەڭكەلەرى وتكىزىلىپ, قالاداعى ساۋدا ۇيلەرىمەن باعانى وسىرمەۋ تۋرالى كەلىسىمدەر بەكىگەن.
مۇنىڭ سىرتىندا ەلوردا تۇرعىندارى ارزان باعامەن ازىق-تۇلىك تاۋارلارىن الا الاتىن تۇتاس كوممۋنالدىق بازار جۇمىس ىستەپ تۇر. الايدا «شاپاعات» دەگەن اتاۋمەن استانا حالقىنا جاقسى تانىس ساۋدا ورنى الداعى ۋاقىتتا جەكەلەنۋى مۇمكىن دەگەن پىكىر بار.
«استانا» الەۋمەتتىك-كاسىپكەرلىك كورپوراتسياسىنىڭ حابارلاۋىنشا, ۇكىمەتتىڭ 2017 جىلعى 11 ساۋىردەگى №194 قاۋلىسىنا سايكەس, باسەكەلەستىك ورتاعا بەرىلەتىن تىزىمىنە «شاپاعات» كوممۋنالدىق بازارى» جشس تە ەنگىزىلگەن. مۇنداي شەشىم قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ ۇسىنىسى بويىنشا قابىلدانعان. وسىعان بايلانىستى سالىق تولەۋشىلەردىڭ قاراجاتىنا تۇرعىزىلعان قالاداعى جالعىز كوممۋنالدىق بازاردىڭ نە سەبەپتى جەكەشەلەندىرىلەتىن نىسانداردىڭ تىزىمىنە ەنگىزىلگەنىن ءبىلۋ ماقساتىندا قر ۇلتتىق ەكونوميكا مينيسترلىگىنە وسىدان ءبىر اي بۇرىن جىبەرگەن ساۋالىمىزعا ءالى كۇنگە دەيىن جاۋاپ الا العان جوقپىز.
«استانا» الەۋمەتتىك-كاسىپكەرلىك كورپوراتسياسىنىڭ حابارلاۋىنشا, بۇگىنگى تاڭدا «شاپاعات» كوممۋنالدىق بازارى» جشس-ءىن ساتۋ الدىنداعى دايىندىق جۇمىستارى جۇرگىزىلىپ جاتىر. مەرزىمى – 2018 جىلدىڭ سوڭىنا دەيىن.
بۇگىندەرى قالا تۇرعىندارى كوپ باراتىن ساۋدا ورىندارىنىڭ ءبىرى – وسى «شاپاعات». دەنى – زەينەتكەرلەر مەن تۇرمىسى تومەن توپ وكىلدەرى.
بازارداعى ورىنداردى جالعا بەرۋ قۇنى تومەن بولعاندىقتان, ونىمدەر نارىقتاعى باعادان 20-30 پايىزعا ارزان. جەكەگە وتكەننەن كەيىن جاعداي تۇبەگەيلى وزگەرىپ, باعا ءوسىپ كەتپەي مە دەگەن ۋايىم بار. ويتكەنى «استانا» الەۋمەتتىك-كاسىپكەرلىك كورپوراتسياسى بۇرىنعىداي بازارداعى باعانى تۇراقتاندىرۋ ماسەلەسىمەن اينالىسا الماي قالادى عوي.
قالىپتاسقان جاعدايعا وراي كوممۋنالدىق بازار ساۋداگەرلەرى استانا قالاسىنىڭ اكىمىنە جانە «نۇر وتان» پارتياسىنىڭ استانا قالالىق فيليالى توراعاسىنىڭ ءبىرىنشى ورىنباسارى باقىت ساپاروۆتىڭ اتىنا حات جازعان ەكەن.
ساۋداگەرلەردىڭ سوزىنە سەنسەك, «شاپاعات» كوممۋنالدىق بازارىندا الەۋمەتتىك ماڭىزداعى ازىق-تۇلىك ونىمدەرىنە ۇستەمە باعا 10 پايىزدان اسپايدى. بۇلاي بولاتىن سەبەبى كاسىپكەرلەر ساۋدا ورنىن ايىنا نەبارى 10-اق مىڭ تەڭگەگە, شارشى مەترىن شامامەن 2500 تەڭگەگە جالعا الادى. بازاردىڭ يەسى اۋىسقاننان كەيىن باعا قىمباتتاۋى مۇمكىن.
بۇگىندە بازار اۋماعىندا 55 تاۋار ءوندىرۋشى ءوز ونىمدەرىن دەلدالسىز ساتا الادى. ال دەمالىس كۇندەرى ساياجايلارىندا جەمىس-جيدەگىن ءوسىرىپ, ونى پۇلدايتىندارعا تەگىن ورىن بەرىلەدى. ماۋسىمارالىق كەزەڭدە استانا قالاسى تۇراقتاندىرۋ قورىندا ساقتالىپ تۇرعان ازىق-تۇلىك تاۋارلارى ساۋداعا شىعارىلادى. بۇل جاعدايدا دا ساۋدا ورىندارى تەگىن بولادى.
تومەندەگى كەستەدەن استاناداعى ساۋدا ورىندارى مەن كوممۋنالدىق بازارداعى ازىق-تۇلىك باعالارىن سالىستىرىپ كورۋگە بولادى. ازىرگە «شاپاعات» الەۋمەتتىك سيپاتىنا ساي بولىپ, حالىققا ارزان ازىق ۇسىنۋدا. تەك ەل ەكونوميكاسىن سەرگىتەدى دەگەن جەكەشەلەندىرۋ ناۋقانى قالاداعى جالعىز كوممۋنالدىق بازاردىڭ باعىتىن وزگەرتپەسە بولعانى.
جارقىن قۇلان
