ۇلتتىق رۋحتى بويىنا بالا جاسىنان ءسىڭىرىپ, حالىق اۋەنىنە سۋسىنداپ وسكەن ءاربىر جاس جەتكىنشەك دۇنيەنى, ءومىردى تانىپ بىلە باستايدى. سوندىقتان ءداستۇرلى تويباستار, بەتاشار, توي-دۋماندارداعى قىز-جىگىتتەردىڭ ايتىسى, ليريكالىق تۇرمىس-سالت جىرلارى, اسپاپپەن سۇيەمەلدەپ ايتىلاتىن اڭىز-ەرتەگىلەر – حالىقتىڭ ەجەلگى مادەنيەتىنىڭ وسىناۋ باعا جەتپەس مۇراسى. جاس ۇرپاقتىڭ دۇنيەتانىمىن قالىپتاستىرۋ ءۇشىن ول – تاپتىرمايتىن قۇندى دۇنيە.
بالا تاربيەسىنە ەرەكشە ءمان بەرگەن اتا-بابالارىمىز دا اسەم انمەن ءسابي جۇرەگىن تەربەپ, وي-ساناسىن ادامگەرشىلىككە جەتەلەگەن. اناسى نارەستەسىن بەسىگىنە بولەپ: «ءالدي-ءالدي, اق بوپەم, اق بەسىكتە جات, بوپەم» دەپ بەسىك جىرىن ايتقان. اناسىنىڭ سازدى اۋەنى بالانىڭ دەنەسىن بالقىتىپ, ۇيقى شاقىرعان. قازىرگى تاڭدا جاس ۇرپاققا حالقىمىزدىڭ رۋحاني مۇرالارى ارقىلى الەمنىڭ تىنىسىن بايقاۋ, بالانىڭ سانا-سەزىمىنە اسەر ەتىپ, ولاردىڭ بىلگىرلىككە, تاپقىرلىققا, ونەرگە دەگەن سۇيىسپەنشىلىگىن ودان ارى تەرەڭدەتىپ, ادامگەرشىلىك تۇرعىدان تاربيەلەپ, ءومىر شىندىعىن سەزىنۋگە, ەلىن, جەرىن, وتانىن سۇيۋگە باۋلۋ ماقساتىندا استاناداعى №1 ونەر مەكتەبىندە كوپتەگەن يگى ىستەر اتقارىلۋدا. سەبەبى, جاس جەتكىنشەكتەردىڭ دۇنيەتانىمىن قالىپتاستىرۋدا دومبىرامەن ءان ايتۋدىڭ ماڭىزى زور. ءان ايتۋدىڭ ەرەكشەلىگى بالالاردىڭ ساناسىنا عانا ەمەس, سەزىمى مەن وي-ورىسىنە دە اسەر ەتەتىنى انىق. ءان ۇيرەنەر كەزدە ولەڭنىڭ مازمۇنىن تۇسىنۋگە, تاربيەلىك ءمانىن سانالى تۇردە مەڭگەرۋىنە مۇمكىندىك بەرەدى. قازاق حالقىنىڭ ءان ايتۋ مەكتەبى بۇگىنگى كۇنى جالعاسىن تاۋىپ كەلەدى. اسىرەسە, دومبىرامەن جەكە ءان سالۋ ءداستۇرى مولىنان تاراپ, عاسىردان-عاسىرعا, اتادان بالاعا جالعاسىن تابۋدا.
دومبىرا – ەرتەدەن كەلە جاتقان قازاق حالقىنىڭ مۋزىكالىق اسپابى, قازاقتىڭ قاسيەتتى دۇنيەسى. ونى تارتا الماسا دا, قادىرلەي ءبىلۋ كەرەك. سەبەبى, بالانىڭ بويىنا حالىقتىڭ رۋحاني بايلىعىن, دۇنيەتانىمىن ءسىڭىرۋ وسى دومبىرادان باستالادى.
بالالاردىڭ جالپى مۋزىكانى قابىلداۋ ەرەكشەلىگى, قابىلەتى, مىنەز-قۇلقى بىردەي بولىپ كەلمەيدى. سوندىقتان وقۋشىنىڭ دۇرىس وتىرۋىن جانە وڭ قول, سول قول ساۋساقتارىنىڭ قويىلۋىن العاش دومبىرا ۇستاعان ساتتەن باستاپ ۇنەمى ەسكەرتىپ, قاداعالاپ وتىرۋ – ۇستازدىڭ پارىزى. ال, ءداستۇردى ۇرپاققا جەتكىزۋ – ۇستازداردىڭ ابىرويلى مىندەتى. ءداستۇر – پەداگوگيكالىق قۇبىلىس, وندا تۇرمىستىق تاجىريبەنىڭ بىرنەشە عاسىرلىق وسيەتى مەن دانا سوزدەرى جاتىر. بۇل رەتتە ءبىز وسى ونەردى ۇيرەنىپ قانا قويماي, قالالىق, رەسپۋبليكالىق بايقاۋلارعا قاتىسىپ, جۇلدەلى ورىندارعا يە بولىپ جۇرگەن شاكىرتتەرىمىزبەن ماقتانا الامىز. ماسەلەن, ابزال تۇرعىنباەۆ «ءبىز تالانتتاردى ىزدەيمىز!» جالپىقالالىق كونكۋرسىندا جانە «سالەم, استانا» رەسپۋبليكالىق كونكۋرسىندا حالىقتىق ۆوكال نوميناتسياسى بويىنشا ءۇشىنشى ورىندى يەلەنسە, فاريزا مىرزاباەۆا, ءاسانالى بالتاشوۆ, ارۋجان مۇقانوۆا دا بىرنەشە كونكۋرستاردىڭ لاۋرەاتتارى.
عازيزا كۇلدىباەۆا,
№1 ونەر مەكتەبىنىڭ دومبىرامەن ءان ايتۋ ءپانىنىڭ مۇعالىمى
