«استانا وپەرا» تەاترىنىڭ رەپەرتۋارى تاعى ءبىر تۋىندىمەن تولىقتى. وتكەن اپتادا تەاتر ساحناسىندا «سپارتاك» بالەتىنىڭ تۇساۋكەسەرى ءوتتى. قويىلىمدى رەسەيلىك بالەتمەيستەر يۋري گريگوروۆيچ ساحنالادى. بۇل – ونىڭ اتالمىش تەاترداعى العاشقى قويىلىمى ەمەس. بۇعان دەيىن ول استانالىقتارعا «ۇيقىداعى ارۋ» بالەتىن ۇسىنعان ەدى.
«سپارتاك» بالەتى – «استانا وپەرا» تەاترىندا بۇگىنگە دەيىن ساحنالانعان قويىلىمداردىڭ ىشىندەگى ەڭ سالماقتىسىنىڭ ءبىرى. ويتكەنى, تەاتر ارتىستەرى «مۇنداي كۇردەلى بالەتتى العاش رەت ورىندادىق» دەيدى. ءۇش بولىمنەن تۇراتىن قويىلىمعا 80-گە جۋىق ءارتىس قاتىستى.
اكتەرلەردىڭ ساحنالىق كيىمدەرى, سوناۋ 1968 جىلعى پرەمەراداعى ۇلگى بويىنشا تىگىلگەن. تىگۋ جۇمىستارىنا رەسەيلىك شەبەرلەر جۇمىلدىرىلىپ, باس-اياعى 200-دەن استام كوستيۋم دايىندالعان.
بالەتتەگى نەگىزگى ۋاقيعا جەلىسى ريم قوعامىنىڭ قۇلدىراي باستاعان تۇسىنداعى جاعدايدى بەينەلەيدى. زۇلىم كراسس باسقارعان يمپەراتوردىڭ اسكەري ماشيناسى بەيبىت ءومىردى قيراتىپ, ونداعان مىڭ ادامدى تۇتقىنعا الادى. سولاردىڭ ىشىندە سپارتاك پەن فريگيا دا بار ەدى. بىرگە بولۋ ءۇشىن قوس عاشىققا تالاي سىننان وتۋگە تۋرا كەلەدى. حالىققا, ماحابباتقا دەگەن سەنىم جانە دوسىنىڭ شايقاسقا شىعىپ, قاپيادا قازا تابۋى سپارتاكتى اشىندىرىپ, كوتەرىلىسكە يتەرمەلەيدى. كراسسقا قارسى باس كوتەرگەن قۇلدار جەتەكشىسىنىڭ كەڭ پەيىلدىلىگى اينالىپ كەلىپ وزىنە زيانىن تيگىزەدى. جەڭىلىس تاپقان ريم قولباسشىسى وڭايلىقپەن بەرىلە قويماي, سپارتاك پەن ونىڭ دوستارىن ءولتىرىپ كەتەدى. سوڭعى كورىنىستە فريگيا عاشىعىنىڭ مايىتىنە كەلىپ, ونى جوقتاپ جىلاۋى, ونىڭ ەرلىگىنىڭ ماڭگى ولمەيتىنىنە دەگەن سەنىمى – ءبارى دە بي تىلىمەن شەبەر جەتكىزىلگەن. شىنايى ءولىمدى, ازاپتى, قانتوگىستى جەتكىزەتىن گلادياتورلاردىڭ اسەرلى شايقاسى, كۋرتيزانكا قىزداردىڭ ەركىن ءبيى قويىلىمدى ودان سايىن «قورلاندىرا» تۇسەدى. باس پارتيانى باحتيار ادامجان مەن دوسجان تابىلدى, كراسستى سەرجان كاۋىكوۆ پەن تايىر گاتاۋوۆ, ال فريگيا پارتياسىن ءمادينا باسباەۆا مەن انەل رۇستەموۆا كەزەكتەسىپ وينادى.
«سپارتاك» بالەتى – وتە كۇردەلى. بۇل جەردە كلاسسيكالىق بالەتتى عانا ەمەس, حورەوگرافيا جانە اكتەرلىك شەبەرلىكتى كورسەتۋ كەرەك. سپارتاكتىڭ جان-دۇنيەسىن, ويىن سەزىنۋ قيىنداۋ بولدى. تولقۋ دا, قۋانىش تا بار» دەيدى باحتيار ادامجان.
«سپارتاك» بالەتى بۇگىندە «گراند-وپەرا», پەكيندەگى ۇلكەن ۇلتتىق تەاتر سياقتى تەاترلاردىڭ ساحناسىندا قويىلىپ جاتىر. ال, استانادا بۇگىن سوڭعى كۇن كورسەتىلەدى.
