ەلىمىزدەگى ەڭ اسەم, ساۋلەتى دە كەلىسكەن ەسكەرتكىشتەردىڭ ءبىرى – ەلورداداعى وتان قورعاۋشىلارعا ارنالعان «وتان-انا» مونۋمەنتى. بۇل ەسكەرتكىش 2001 جىلى جەڭىس كۇنى مەرەكەسى قارساڭىندا اشىلدى.
اتالعان كەشەننىڭ مازمۇنى كەشەگى, بۇگىنگى جانە ەرتەڭگى ۇرپاق ساباقتاستىعىن بەدەرلەيدى. «وتان قورعاۋشىلار» مەموريالىنىڭ وزەگى – بيىكتىگى 37,5 مەتر, سالماعى 63 توننالىق الىپ مونۋمەنت انا بەينەسى. اق كيمەشەكتى انا التىنداتىلعان زەرلى كەسەسىنە اق قۇيىپ, ونى مەيىرىمگە تولى كوڭىلىمەن قوس قولداپ ۇسىنىپ تۇر. سونداي-اق ەسكەرتكىشتىڭ ۇشار باسىنداعى 121 التىن ماساقتان تۇراتىن نىسان قازاقستاندا تۇراتىن ۇلتتاردىڭ بىرلىگى مەن بەرەكەسىن بەدەرلەيدى. ماساقتاردىڭ ىرگەسى قازاق جەرىندە ءار ۇلتتىڭ رۋحاني مۇراسىن زەردەلەگەن ويۋ-ورنەكتەرمەن بەزەندىرىلگەن. مەموريالداعى جەر شارىنىڭ بەينەسى دە ەرەكشە كوڭىل اۋدارتادى. سونىمەن بىرگە قىرىق مەتردەي قولا باعاننىڭ ەكى جاق قاپتالىنىڭ بىرىندە اتا-بابامىزدان قالعان بايتاق دالانى جاۋدان قورعاعان ايبىندى باتىرلار مەن ەكىنشى جاعىندا وتان سوعىسى جىلدارى ەرلىك كورسەتكەن قازاقستاندىق اسكەريلەر بەينەسى كوركەمدەلگەن. مۇنى مايدان دالاسىندا مەرت بولعان جاۋىنگەرلەر مەن ارامىزدا امان-ەسەن جۇرگەن سوعىس ارداگەرلەرىنە دەگەن كۇرمەت دەپ تۇسىنۋگە بولادى.
ەلدىڭ كوڭىلىنەن شىققان ەسكەرتكىش اۆتورلارى – بەلگىلى ساۋلەتشىلەر ا.بەكسۇلتانوۆ پەن ن.كونوپولتسەۆ.
«وتان-انا» مونۋمەنتىنىڭ سالتاناتتى اشىلۋىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ەل تاريحىنا شولۋ جاساي كەلىپ: «بۇل – جاۋدى تىزە بۇكتىرگەن جەڭىس مەرەكەسى بولۋىمەن بىرگە جالپىحالىقتىق ەسكە الۋ كۇنى, اعا ۇرپاقتىڭ وشپەس ەرلىگىنە باس يۋ كۇنى. سوندىقتان بۇل مەموريال ۇرپاقتارىمىز بەيبىت ءومىرىمىزدى قۇرمەتتەپ, قان قۇيلى سوعىستىڭ زاردابىنىڭ قانداي بولاتىنىن ەستەن شىعارماۋ ءۇشىن ۇلاعاتتى ەسكەرتكىش بولۋى كەرەك. ءبىز اتا-بابالارىمىز بەن اكەلەرىمىزدى ماقتان تۇتامىز. ءبىز ءوز يىقتارىمەن بار اۋىرتپالىقتى ارقالاعان ايرىقشا انالارىمىزدى ماقتان ەتەمىز. ولارسىز جەڭىس تە بولماس ەدى. مىناۋ مونۋمەنتتىڭ ايرىقشا كورىنىپ تۇرعان بولىگى دە سول – ايەل-انا بەينەسى. مىنا اشىلىپ وتىرعان ەسكەرتكىش ۇلى وتان سوعىسىنداعى ەرلىكتى عانا بەينەلەمەيدى, قازاق حالقىنىڭ باتىرلىعىن, ەرجۇرەكتىگىن دە سيپاتتايدى. بۇل – ەسىمى ءمالىم جانە ەسىمى بەيمالىم جانداردىڭ ارۋاعىن تەربەتىپ, توپىراعىن تورقالايتىن پەرزەنتتىك ماحابباتىمىزدىڭ كورىنىسى, سونىڭ كۋاسى. وتىن وشىرمەگەن ەرجۇرەك اتالارىمىز بەن شاڭىراعىمىزدى شايقالتپاعان مەيىربان انالارىمىزدىڭ قادىرى مەن قاسيەتىنە قويىلعان كيەلى بەلگى!» دەپ ايتىپتى.
