وتاندى ءسۇيۋ – ورتاق پارىز
استانا قالالىق ءماسليحاتىندا الەۋمەتتىك-مادەني دامىتۋ ماسەلەلەرگە ارنالعان تۇراقتى كوميسسيانىڭ وتىرىسى ءوتتى.
جيىندا قالالىق ءبىلىم باسقارماسىنىڭ باسشىسى قاسىمحان سەنعازىەۆ ەلوردالىق ءبىلىم وردالارىندا جاس ۇرپاقتىڭ بويىنا پاتريوتتىق رۋحتى قالىپتاستىرۋداعى اتقارىلعان شارالار جونىندە بايانداما جاسادى. «وتانسۇيگىشتىك تاربيە حالقىمىزدىڭ سان عاسىرلىق تاريحىنان باستاۋ الادى» دەپ ءسوزىن باستاعان بايانداماشى استانالىق مەكتەپتەردە وسى باعىتتا جۇرگىزىلىپ جاتقان جۇمىستارعا كەڭىرەك توقتالدى. 2016-2018 جىلدارعا ارنالعان پاتريوتتىق تاربيەنى دامىتۋعا باعىتتالعان كەشەندى باعدارلاما قابىلدانعاندىعىن جەتكىزدى. بارلىق بالاباقشالار مەن ءبىلىم ورىندارىندا مەملەكەتتىك رامىزدەر ءىلىنىپ, ولارعا ارنالعان تانىمدىق, اشىق ساباقتار ءجيى وتەتىندىگىن باياندادى.
اسىرەسە, وقۋشىلار اراسىندا اسكەري-پاتريوتتىق كلۋبتاردىڭ جۇمىسى جاقسى جولعا قويىلىپ, بۇگىندە ولاردىڭ سانى ەسەلەپ وسكەندىگىن ايتتى. قىسقاسى, باياندامادان وسى تاقىرىپتا كولەمدى جۇمىستار اتقارىلىپ جاتقاندىعىن كوردىك. سونداي-اق, ءبىلىم باسقارماسىنىڭ باسشىسىنان دەپۋتاتتار مەكتەپتەگى ءدىني ماسەلەلەر تۋرالى سۇرادى. ماسەلەن, وقۋشىلاردىڭ ءدىني كيىممەن ساباققا كەلۋىنە بايلانىستى قويىلعان سۇراققا ءبىلىم باسشىسى: «ءبىز وسى باعىتتا جۇيەلى جۇمىس جۇرگىزىپ, اتا-انالارمەن كەڭ وتىرىپ اڭگىمەلەسىپ, ءتۇسىندىرۋ شارالارىن وتكىزۋدەمىز. ناتيجەسى دە جامان ەمەس» دەدى ول.
ودان كەيىن قالالىق ءدىن ىستەرى جونىندەگى باسقارمانىڭ باسشىسى دانيار ەسين ءدىني احۋال جايىندا قىسقاشا بايانداما جاسادى. بۇل تاراپتا دا بىرقاتار شارالار قولعا الىنىپ, اتقارىلعان.
ەلوردالىق مادەنيەت, مۇراعاتتار جانە قۇجاتتاما باسقارماسىنىڭ باسشىسى بولات ماجاعۇلوۆ ءوز بايانداماسىندا باس قالاداعى ساكەن سەيفۋللين مۇراجايى, اتامەكەن ەتنو-مەموريالدىق كەشەنى, ساياسي قۋعىن-سۇرگىن جانە توتاليتاريزم قۇرباندارىنىڭ «الجير» مەموريالدى-مۇراجاي كەشەنى جانە تاريحي-مادەني مۇرا وبەكتىلەرىن جانە ەسكەرتكىشتەرىن ساقتاۋدى قامتاماسىز ەتۋ جونىندەگى ديرەكتسيا مەن قالالىق مەملەكەتتىك مۇراعاتتا ساقتالعان جادىگەرلەر مەن تاريحي قۇجاتتارعا توقتالىپ, اسىل مۇرالار جايىندا سالماقتى ءسوز قوزعادى.
ازامات ەسەنجول