استانا قالاسىنداعى «جانۇيا» وتباسى ينستيتۋتىن قولداۋ ورتالىعىنىڭ ۇيىمداستىرۋىمەن وتباسى جانە بالالاردى قورعاۋ كۇنىنە ارنالعان «وتباسى – باقىت مەكەنىم» ءىس-شاراسى ءوتتى.
جيىننىڭ باستى ماقساتى – ەرەكشە بالالاردى تاربيەلەپ وتىرعان انالارعا, از قامتىلعان وتباسىلارعا, حالىقتىڭ الەۋمەتتىك وسال توپتارىنا مەرەكەلىك كوڭىل-كۇي سىيلاۋ.
– ءبىزدىڭ ورتالىق جاعدايى قيىن وتباسىلارعا جاردەمدەسەدى. ءىس-شارا پسيحولوگيالىق تۇردە قولداۋ كورسەتەدى. بۇگىن 40-50 وتباسىنى قامتىپ وتىرمىز. بۇل جيىنعا بارلىعى كەلىپ قاتىسا الادى, – دەدى «جانۇيا» وتباسى ينستيتۋتىن قولداۋ ورتالىعى» كمم ديرەكتورى باقتيار ايتپاەۆ.
اتالعان جيىندا «قۋىرشاق» تەاترى ۇجىمى ونەر كورسەتتى. اتا-انالار مەن بالالار كونتسەرتتىك باعدارلاماعا بەلسەنە قاتىسىپ, ءان ايتىپ, بي بيلەدى. قاتىسۋشىلارعا دەمەۋشىلەردەن ويىنشىقتار مەن ازىق-تۇلىك توپتاماسى تابىس ەتىلدى.
– مەن ەرەكشە بالالار تاربيەلەپ وتىرعان انامىن. وسىنداي ءىس-شاراعا شاقىرعاندا قاتتى قۋاندىم. ويتكەنى ءوزىم تانىمال اقىنداردىڭ ولەڭدەرىن وقيمىن جانە ولەڭ شىعارامىن. ماعان بۇل ءوز-ءوزىمدى كورسەتۋگە مۇمكىندىك. اتالعان ۇيىم تەك ماتەريالدىق كومەك بەرىپ قانا قويماي, تالاي بولمىسى اشىلماي جاتقان ءبىز سياقتى ادامداردىڭ شىعارماشىلىق دامۋىنا قولداۋ بىلدىرۋدە. ادەتتە ءبىز قوعامنان تىس قالىپ جاتامىز. بۇل بىزگە سەرپىلىس الىپ كەلەدى جانە مەنىڭ ونەرىمدى دامىتۋعا ۇلەس قوسادى دەگەن ۇمىتتەمىن, – دەدى قاتىسۋشى گۇلنار توقتار.
بىلتىر ورتالىق 500 وتباسىعا ارناپ ءىس-شارا وتكىزگەن. وسى سەكىلدى جيىنداردى «قۇربان ايت» مەيرامى قارساڭىندا دا وتكىزۋ جوسپارلانۋدا.
گۇلناز مۇحانجان,
ل.گۋميلەۆ اتىنداعى ەۋرازيا
ۇلتتىق ۋنيۆەرسيتەتىنىڭ ستۋدەنتى
