ءدال بۇگىن «استانا اقشامى» مەن «ۆەچەرنيايا استانا» رەسپۋبليكالىق قوعامدىق-ساياسي گازەتتەرىنىڭ جارىققا شىققانىنا وتىز جىل تولدى. ءيا, وتىز جىل… تاريح كوزىمەن قاراعاندا بۇل دەگەن قاس-قاعىم ۋاقىت سەكىلدى بولعانىمەن, قوس باسىلىمنىڭ ءتاي-ءتاي باسقان قادامى, قالىپتاسۋ جولى, اقىرى, استانالىق باسىلىمعا اينالىپ, جالپاق ەلگە تارالۋى – تاعىلىمعا تولى وقيعا دەپ ايتۋعا بولادى. وسى مەرەيلى داتاعا وراي قوس گازەت ۇجىمى داستۇرگە ساي وتىز اعاش وتىرعىزدى.
ايتۋلى شاراعا نۇر-سۇلتان قالاسى اكىمىنىڭ ورىنباسارى باقتيار ماكەن قاتىسىپ, باسىلىم قىزمەتكەرلەرىن مەرەيتويلارىمەن قۇتتىقتادى.
– باس قالاداعى «Elorda Aqparat» مەدياكومپانياسىنىڭ قۇرامىنداعى «استانا اقشامى» جانە «ۆەچەرنيايا استانا» گازەتتەرىنىڭ تاريحى سوناۋ ەگەمەندىك جىلدارىمەن تۇسپا-تۇس كەلەدى. سوعان وراي بۇگىن 30 اعاش وتىرعىزدىق. قوس باسىلىم قالامىزدا بولىپ جاتقان ايشىقتى وقيعالار مەن ءىس-شارالاردى دەر كەزىندە جازىپ وتىرادى. گازەت قىزمەتكەرلەرىن وتىز جىلدىق بەلەسپەن قۇتتىقتاپ, اقپارات مايدانىندا تالماي قىزمەت ەتۋلەرىنە تىلەكتەسپىن!, – دەدى باقتيار ماكەن.
قالا اكىمىنىڭ ورىنباسارى ءسوز اراسىندا اعاش ەگۋ سەكىلدى يگىلىكتى ءىس-شارا ەلباسى نۇرسۇلتان نازارباەۆ پەن پرەزيدەنت قاسىم-جومارت توقاەۆتىڭ تاپسىرماسىمەن استانادا ءداستۇرلى تۇردە جۇرگىزىلىپ جاتقانىن ايرىقشا اتاپ ءوتتى.
