تاياۋدا «قازاق ەلى» مونۋمەنتىنىڭ الدىندا ەلوردانىڭ 20 جىلدىق مەرەيتويىنا ارنالعان «Open Air» كونتسەرتى ءوتتى. «ۇلى دالا بىرلىگى» دەپ اتالاتىن كونتسەرتتە وتاندىق ونەرپازدارعا قوسا رەسەي ارتىستەرى دە ونەر كورسەتتى.
كۇنى كەشە پارلامەنت سەناتىنىڭ توراعاسى قاسىم-جومارت توقاەۆ مىرزا ءوزىنىڭ الەۋمەتتىك پاراقشاسىندا «ەلوردامىزدىڭ 20 جىلدىعىنا ارنالعان ءىس-شارالارعا شەتەل ارتىستەرىنەن گورى, وتاندىق ورىنداۋشىلاردى كوبىرەك قاتىستىرۋ كەرەك» دەگەن پىكىر ءبىلدىردى.
جالپى, ەلىمىزدەگى مادەني شارالارعا وتاندىق ارتىستەرگە قاراعاندا رەسەي انشىلەرىنىڭ كوپ شاقىرىلۋ سەبەبى نەدە دەگەن ساۋالعا جاۋاپ ىزدەپ, الەۋمەتتىك جەلىلەردە كوپتەگەن تىڭدارمان ءتۇرلى پىكىر ءبىلدىردى. 50 مىڭنان استام كورەرمەن جينالعان اشىق اسپان استىندا وتكەن كونتسەرت 6 ساعاتقا سوزىلدى. استانا قالاسى مادەنيەت جانە سپورت باسقارماسىنىڭ توراعاسى بولات ماجاعۇلوۆ ايتقانداي, جينالعانداردىڭ باسىم كوپشىلىگى رەسەي انشىلەرىنە قۇمارتىپ كەلگەن جوق ەكەن, «Ninety one» توبىن تىڭداۋ ءۇشىن كەلگەن. بىراق «91» توبى كونتسەرتتىڭ اياعىندا ونەر كورسەتتى. سوندا قازاق انشىلەرىن تىڭداۋعا كەلگەن حالىقتى 5 ساعات رەسەي انشىلەرىن تىڭداۋعا نەگە ماجبۇرلەپ وتىرمىز؟
«ۇلى دالا بىرلىگى», قاراپايىم تىلمەن ايتقاندا, تاتۋلىقتىڭ بەلگىسى. وسىلاي اتالاتىن ءىس-شارادا نەگە تەك رەسەي جۇلدىزدارى ونەر كورسەتۋى كەرەك؟ باسقا باۋىرلاس, كورشى مەملەكەتتەر وكىلدەرى قايدا قالدى؟ وسى ورايدا ءمادي ماناتبەك, قالقامان سارين, ماقپال جۇماباي, باۋىرجان قاراعىز سەكىلدى ازاماتتار باستاعان ءبىر توپ بەلسەندى الەۋمەتتىك جەلى ارقىلى «رەسەي انشىلەرىن توقتاۋسىز شاقىرا بەرەمىز بە؟» دەگەن مازمۇندا ساۋال تاستاعان بولاتىن. تاتۋلىقتىڭ بەلگىسى رەتىندە ۇيىمداستىرىلعان ءىس-شاراعا شەت ەلدەردەن ونەر جۇلدىزدارىن شاقىرۋ قاجەت بولسا, نەگە وزبەكستان, قىرعىزستان, قىتاي سىندى كورشىلەس ەلدەردەن دە ارتىستەر شاقىرىلمايدى؟
استانا تۇرعىنى رەتىندە مەن دە ەلىمىزدىڭ شارالارىنا وتاندىق جۇلدىزدار كوپتەپ ونەر كورسەتۋى كەرەك دەپ ەسەپتەيمىن. ال استانانىڭ كونتسەرتتەرىنە ءوز ونەرپازدارىمىز قاتىساتىن بولسا, ولارعا تولەنەتىن اقشا ءوز ەلىمىزدە قالادى. ول مەملەكەت قارجىسىن دا سىرتقا شاشپاي, ءوزىمىزدىڭ ونەر جۇلدىزدارىمىزدى كوتەرمەلەۋگە سەپ بولار ەدى دەپ ويلايمىن.
استانا ساحنالارىنان كىمدى كورگىڭىز كەلەدى؟
جانبوتا قاراقۇلوۆا, ستۋدەنت:
– شەتەلدىك انشىلەردى مەيرام سايىن ەمەس, تەك ەلوردانىڭ ايتۋلى كۇندەرى شاقىرعان دۇرىس دەپ ويلايمىن. بىزگە كوبىنە رەسەيلىك انشىلەر كەلەتىنى جاسىرىن ەمەس. ەگەر جاستاردىڭ پىكىرىنە قۇلاق اساتىن بولسا, الداعى استانا تويىندا رەسەيدىڭ شوۋ-بيزنەسىندە جۇرگەن ءوزىمىزدىڭ قازاقتار Jah Khalib پەن موتتى كورگىمىز كەلەدى.
اسەم باتىربەك, ستۋدەنت:
– بيىل – ەلوردانىڭ مەرەيلى 20 جىلدىعى. وسىناۋ مەرەكەدە كوپتەگەن ءىس-شارا وتكىزىلەتىنى بەلگىلى. قالا كۇنى مەيرامىندا قازاق ەلىن الەمگە تانىتىپ جۇرگەن ديماش قۇدايبەرگەنوۆتىڭ ونەرىن تاماشالاعىم كەلەدى.
شىنار مۇراتقىزى,
ستۋدەنت:
– جاز ماۋسىمىن «Open Air» مەرەكەلىك ءىس-شاراسىمەن اشۋ جىلداعى داستۇرگە اينالىپ كەلەدى. الايدا ۇنەمى باياعى كەلىپ جۇرگەن رەسەي انشىلەرىن شاقىرتادى. بيىل وزگەشە بولسا دەيمىن. ياعني الەمدىك دەڭگەيدەگى Adel, Beyonce, Rihanna سەكىلدى ونەر جۇلدىزدارىنىڭ كەلگەنىن قالايمىن. سونىمەن قاتار, تەك جاستارعا عانا كوڭىل بولمەي, قازاق ەستراداسىنىڭ التىنبەك قورازباەۆ, روزا رىمباەۆا, رامازان ستامعازيەۆ سەكىلدى اعا بۋىندارىن دا كوپشىلىك جىلى قابىلدايتىنى ءسوزسىز.
ەركىنبەك زەرلەن, ستۋدەنت:
– استانانىڭ 20 جىلدىق مەرەيتويىندا ءوزىمىزدىڭ ەسترادا جۇلدىزدارىن كوبىرەك كورگىم كەلەدى. شەتەلدىك ءانشىلەر بولسا دا قارسى ەمەسپىن. ءوزىمىزدىڭ جانار دوعالوۆا, ساكەن مايعازيەۆ, قايرات نۇرتاس, نۇربولات ابدۋللين, تورەعالي تورەالى سىندى جاس تالانتتى انشىلەردىڭ كوپ بولعانىن قالايمىن.
ازامات ماحامبەت, ستۋدەنت:
– شەتەل جۇلدىزدارىن شاقىرۋ كەرەك ەمەس. ەلوردامىزدىڭ مەيرامى بولعاندىقتان, استانادا تۇراتىن, استانانىڭ قۇرىلۋ بارىسىندا بولعان, استانا تۋرالى ءانى بار, استانامەن قۇرداس, جۇرەگى استانا دەپ سوققان انشىلەرىمىزدىڭ ونەرىن تاماشالاعىم كەلەدى. ءوز ەلىمىزدە ءبىز تانىمايتىن تالانتتار كوپ قوي. ەڭ باستىسى, جانى قازاق بولعان ءوز وتانداستارىمدى كورگىم كەلەدى.
جادىرا شىناربەك, ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
