– قوسىمشا كارانتيندىك شارالار مەن شەكتەۋلەردى ەنگىزۋ قالانىڭ قاي «ايماقتا» ورنالاسقانىنا بايلانىستى. قازىر ەلوردا «جاسىل ايماقتا», بىراق سوڭعى كۇندەرى COVID-19 اۋرۋىنىڭ ءوسىمى بايقالادى. ەگەر 19 قازاندا 13 جاعداي تىركەلسە, 20 قازاندا 29, ال 21 قازاندا 15 جاعداي تىركەلدى. ديناميكا تۇراقسىز.
ءبىرىنشى. قازىر سOVID-19 ىندەتىنىڭ العاشقى تولقىنى كەزىندەگىدەي اۋرۋدى ۋشىقتىرىپ الماۋ اسا ماڭىزدى. ول كەزدە كوۆيد ستاتسيونارلارىن بىرىنەن سوڭ ءبىرىن اشتىق, پالاتاداعى توسەك ورىندار ساناۋلى ساعاتتا تولىپ كەتەتىن. بوساڭسۋعا بولمايدى, سەبەبى ۆيرۋس ەشقايدا كەتكەن جوق, ول ءالى بار.
دارىگەرلەر ەگەر ادام ءبىر اۋىرىپ تۇرسا, بۇل ونىڭ ۆيرۋسقا قارسى يممۋنيتەتى بار دەگەن ءسوز ەمەس دەيدى. ەگەر ناۋقاس كوروناۆيرۋستى ءبىر رەت جەڭسە, بۇل ونىڭ قاۋىپسىزدىكتە ەكەنىن بىلدىرمەيدى. عالىمدار ءالى كۇنگە دەيىن كوروناۆيرۋستىڭ قانداي زاردابى بار ەكەنىن انىقتاپ جاتىر.
ەكىنشى. قازىر ءبىز كەيبىر كافە, مەيرامحانا مەن باسقا دا نىسانداردىڭ كارانتيندى بۇزىپ, كوروناۆيرۋستىڭ بەيبەرەكەت تارالۋىنا جاعداي جاساپ جاتقانىن كورىپ وتىرمىز. وسىعان بايلانىستى ءبىز رەيدتەر وتكىزۋدى كۇشەيتتىك.
ءۇشىنشى. ءبىزدىڭ دارىگەرلەر تاجىريبە جينادى, مەديتسينالىق مەكەمەلەر دە دايىن, بىراق وزىڭىزگە ەكسپەريمەنت جاساۋ نە كەرەك. توسەك ورىندار قاجەت بولعان جاعدايدا, مىڭداعان ورىندى دايىنداي الامىز, دەگەنمەن بارىنە ءبىر ۋاقىتتا دارىگەرلەر جەتپەيدى. جابدىقتالعان ستاتسيونارلار مەديتسينا قىزمەتكەرلەرىنسىز پاتسيەنتتەردى ەمدەي المايدى. COVID-19 ىندەتىمەن بايلانىستى وسىنداي قاۋىپتى جاعدايدا وتپەن ويناۋعا بولمايدى, «مەن اۋىرمايمىن» دەپ ويلاماڭىز, ءوزىڭىز بەن جاقىندارىڭىزدى كوروناۆيرۋستان ساقتاڭىز. ەڭ ءالسىز توپ – ەگدە جاستاعى ادامدار, ءبىز ولاردى قورعاۋىمىز كەرەك.
ينفەكتسيامەن كۇرەسۋ ءۇشىن ءبىز مەديتسينالىق مەكەمەلەردى قاجەتتى قۇرال-جابدىقپەن, ءدارى-دارمەكپەن, قورعانىش زاتتارىمەن قامتاماسىز ەتتىك. سوڭعى اپتالاردا قوسىمشا 50-دەن استام وكپەنى جاساندى جەلدەتۋ اپپاراتىن (بۇرىن ساتىپ الىنعاندارمەن بىرگە ءوجج اپپاراتتارىنىڭ سانى 434-ءتى قۇرايدى), 2 كومپيۋتەرلىك توموگرافيا اپپاراتىن (قالادا بارلىعى 19 كت), وكپەنىڭ قانشا پروتسەنتكە زاقىمدانعانىن كورسەتەتىن 7 تسيفرلىق رەنتگەنوگرافيا جۇيەسىن ساتىپ الدىق (قالادا بارلىعى 63 رەنگتەن). بۇعان دەيىن مەديتسينا مەكەمەلەرىنە وتتەگى كونتسەنتراتورلارى, فلوۋمەترلەر مەن تاعى باسقالار قويىلدى.
جەدەل مەديتسينالىق جاردەم ستانتسياسىنىڭ اۆتوپاركى ەكى ەسە – 64 ماشينادان 130-عا دەيىن ۇلعايتىلدى. جەدەل جاردەم ماشينالارىنىڭ تاعى ءبىر پارتياسىنا قوسىمشا تاپسىرىس بەردىك. 1,5 مىڭ مەديتسينا قىزمەتكەرىنەن رەزەرۆ قالىپتاستىرىلدى. وسى باعىتتاعى جۇمىستار جالعاسۋدا.
ءتورتىنشى. ءبىز ەۋروپا ەلدەرىندەگى ءىرى قالالار كارانتيندى كۇشەيتىپ جاتقانىن كورىپ وتىرمىز. ءبىز ءبىرىنشى تولقىننان ساباق الۋىمىز كەرەك! جازدا ءار وتباسى دەرلىك كوروناۆيرۋسقا قاتىستى جاعدايدى باقىلاپ قانا قويمادى: تانىستارى, ارىپتەستەرى, دوستارى, تۋىستارى اۋىردى. سانيتارلىق نورمالاردى قاتاڭ ساقتاپ قانا ىندەتتىڭ ورشۋىنە جول بەرمەۋگە بولادى.
مەديتسينا قىزمەتكەرلەرى سەگىز اي بويى كوروناۆيرۋسپەن كۇرەستە الدىڭعى شەپتە ءجۇر. ءبىزدىڭ مىندەتىمىز – دارىگەرلەرگە جۇكتەمەنى ودان ءارى كوبەيتپەۋ, جاقىندارىمىز بەن تۋىستارىمىزعا جۇقتىرماۋ, ويتكەنى عىلىم ناۋقاستاردىڭ بولاشاقتا قانداي سالدارعا تاپ بولاتىنىن ءالى تولىق انىقتاعان جوق. ءوزىڭىزدى جانە جاقىندارىڭىزدى قورعاڭىز دەپ جازدى قالا اكىمى التاي كولگىنوۆ ءوزىنىڭ ينستاگرام پاراقشاسىندا.
