ەلورداداعى ۇلتتىق مۋزەيدە تاريحىمىزعا, ايتۋلى تۇلعالارعا قاتىستى قۇندى جادىگەرلەر كوپتەپ كەزدەسەدى. سونىڭ ءبىرى رەتىندە اسا كورنەكتى اقىن جۇمەكەن ناجىمەدەنوۆتىڭ پيدجاگى مەن گالستۋگىن ايتساق دەيمىز.
بۇل ەكى جادىگەردى 2015 جىلى «مۋزەيگە سىي تارتۋ» اكتسياسى اياسىندا اقىننىڭ قىزى ايكەن جۇمەكەنقىزى ناجىمەدەنوۆا تاپسىرىپتى. ارداقتى ازاماتتىڭ ءيىسى سىڭگەن پيدجاك ەكى تۇيمەلى, قارا ءتۇستى بىلعارىدان تىگىلگەن. قولدا جاقسى ساقتالعان دەپ ايتۋعا بولادى.
ايتپاقشى, الداعى 28 قاراشادا اقىننىڭ تۋعانىنا 85 جىل تولادى. ءاپ دەگەننەن پوەزياعا وزگەشە ورنەگىمەن كەلىپ, قازاق ولەڭىن بيىككە كوتەرگەن ساناۋلى ساڭلاقتاردىڭ قاتارىنا قوسىلعان قالامگەردىڭ قالامىنان تەرەڭ وي مەن شىنايى سەزىم قاتار ورىلگەن تاماشا تۋىندىلار تۋدى. ول كىسى پروزا جانرىندا دا قاجىرلى ەڭبەك ەتىپ, «اق شاعىل», «داڭق پەن داقپىرت», «كىشكەنتاي» دەگەن سۇيەكتى روماندار جازدى. سونداي-اق جۇمەكەن اعامىزدىڭ مەملەكەتتىك ءانۇران اۆتورىنىڭ ءبىرى رەتىندە دە ەسىمى قۇرمەتپەن اتالادى. قابىرعالى سۋرەتكەر ومىردەن وتكەننەن كەيىن ءبىراز جىلداردان سوڭ, ياعني 2010 جىلى «مەنىڭ قازاقستانىم» اتتى ولەڭدەر مەن داستاندار جيناعىنا مەملەكەتتىك سىيلىق بەرىلدى.
اقىننىڭ دوسى, بەلگىلى جازۋشى, مەملەكەتتىك سىيلىقتىڭ لاۋرەاتى ورازبەك سارسەنباي «جۇمەكەننىڭ جۇرەگى» دەگەن ەستەلىگىندە: «قازاق پوەزياسىنىڭ وقشاۋ تۇرعان ءۇش بايتەرەگى – قاسىم, مۇقاعالي, جۇمەكەن ءبىر-بىرىمەن تاعدىرلاس ءومىر كەشىپتى. جاس جاعىنان ۇشەۋى دە قىرىقتىڭ قىرقاسىنا شىققانىمەن, ەلۋدىڭ ەتەگىنەن ۇستاپ ۇلگەرمەگەندەر. ال شىعارماشىلىق ءومىربايان تۇرعىسىنان كەلسەك, بىزدىڭشە بۇل ۇشەۋى دە نەگىزىنەن ايتارىن ايتىپ, جازارىن جازىپ كەتكەندەر» دەپتى. وسىدان ارتىق ايتۋ دا مۇمكىن ەمەس.
