كامەلەتكە تولماعانداردى پوليتسيا قىزمەتكەرلەرىنىڭ جۇمىسىمەن تانىستىرۋ, سونداي-اق, ولاردى قوعامدىق ورىندار مەن جول وتكەلدەرىندە قاۋىپسىزدىك ەرەجەلەرىن قاتاڭ ساقتاۋعا ۇيرەتۋ ماقساتىندا ەلوردادا 16-20 قازان ارالىعىندا «مەن جانە مەنىڭ پوليتسەيلەرىم» اتتى رەسپۋبليكالىق شارا وتۋدە.
شارا اياسىندا وقۋشىلار سارايى اۋماعىندا مەكتەپ وقۋشىلارىنا پوليتسيا قىزمەتكەرلەرىنىڭ ارناۋلى تەحنيكالارى كورمەسى مەن ۇيرەتىلگەن قىزمەت يتتەرى كورسەتىلدى.
كورمەگە كەلگەن وقۋشىلار الاڭعا قويىلعان تىكۇشاق پەن ءتورت پوليتسيا جەڭىل كولىگى مەن موتوتسيكلىنە وتىرىپ, ولاردى باسقارىپ, جۇرگىزۋ مۇمكىندىكتەرىمەن تانىستى.
ءىس-شارا بارىسىندا ىشكى ىستەر ورگانى قىزمەتكەرلەرى قۇقىق بۇزۋشىلىق پەن تۇرمىستىق زورلىق-زومبىلىقتىڭ الدىن الۋعا جانە جىنىستىق قول سۇعىلماۋشىلىققا بايلانىستى «پوليتسيا – دوس جانە قورعاۋشى» تاقىرىبىندا لەكتسيا, اڭگىمەلەر وتكىزىپ, ءدارىستەر وقىدى, بۋكلەتتەر تاراتتى, تاقىرىپتىق ويىندار ويناتتى.
– ءبىز وسىنىڭ بارلىعىن جاسوسپىرىمدەر پوليتسيانىڭ كۇندەلىكتى قيىن دا كۇردەلى جۇمىسىن كوزدەرىمەن كورسىن, ومىرلەرىنە وي ءتۇيسىن, ءسويتىپ ءتالىمدى تاربيەنى بويلارىنا ءسىڭىرسىن دەپ ۇيىمداستىردىق, – دەدى استانا قالاسى ءىىد جەرگىلىكتى پوليتسيا قىزمەتىنىڭ يۋۆەنالدى پوليتسيا باستىعى, پوليتسيا پودپولكوۆنيگى سامال احمەتوۆا.
شاراعا ىشكى ىستەر دەپارتامەنتىنىڭ قىزمەتكەرلەرى, قالالىق پروكۋراتۋرا, ءبىلىم بەرۋ, «نۇر وتان» پارتياسىنىڭ «جاس وتان» جاستار قاناتى, ۇكىمەتتىك ەمەس ۇيىمداردىڭ وكىلدەرى قاتىستى.
