ەلوردانىڭ سارىارقا اۋدانى اكىمدىگىنىڭ قالانى كوركەيتۋگە ارنالعان «بيۋدجەتكە قاتىسۋ» اتتى قاناتقاقتى جوباسىنىڭ ساراپتامالىق كەڭەسىنىڭ وتىرىسى ءوتتى. وندا قالا تۇرعىندارى اۋداندى كوركەيتۋ مەن دامىتۋ بويىنشا ۇسىنعان جوبالار قارالدى. قورىتىندىسىندا اۋدان اكىمدىگىنىڭ سايتىنا كەلىپ تۇسكەن 22 جوبانىڭ 14-ءى ىرىكتەلىپ الىندى.
ۇسىنىلعان جوبالاردىڭ دەنى اۋلالاردى اباتتاندىرۋعا, بالالاردىڭ ويىن الاڭدارىن ورناتۋعا, كوگالداندىرۋعا قاتىستى بولدى. اۋدان اكىمدىگىنىڭ سايتىنا ورنالاستىرىلعان بۇل جوبالارعا حالىق داۋىس بەردى. سارىارقا اۋدانىنىڭ اكىمى ەرعالي ەگەمبەردى توراعالىق ەتكەن ساراپتامالىق كەڭەس ەڭ كوپ داۋىس جيناعان جوبالاردى انىقتاپ, ولاردى ىسكە اسىرۋدىڭ العاشقى كەزەكتەگى شارالارىن ايقىندادى.
ءبىر ايتا كەتەرلىگى, «بيۋدجەتكە قاتىسۋ» جوباسىنىڭ شارتى بويىنشا ۇسىنىلعان ءار جوبانىڭ قۇنى 15 ملن تەڭگەدەن اسپاۋ كەرەك ەدى. نىسانداردىڭ ورنالاساتىن جەرىن تۇرعىنداردىڭ وزدەرى انىقتادى. ماسەلەن, ساراپتامالىق كەڭەستىڭ شەشىمى شىعىسىمەن ونىڭ مۇشەلەرى بىرنەشە مەكەنجايعا بارىپ, كوشپەلى كەڭەس وتكىزدى. سونىڭ ءبىرى – رەسپۋبليكا داڭعىلى, 74 مەكەنجايىنداعى بالالار الاڭىنىڭ جوباسى.
اتالمىش جوبانى ەرلى-زايىپتى ەۆگەني جانە سۆەتلانا ترۋحانوۆتار ۇسىندى. «كوپقاباتتى ۇيلەردە تۇراتىن كوپتەگەن وتباسىلار بالالاردى قايدا قىدىرتسام, قايدا ويناتسام ەكەن دەپ باس قاتىراتىنى راس. ءبىزدى دە بۇل ماسەلە ويلاندىرادى. ۇيىمىزدە تۇراتىن بالا وتە كوپ. بىراق اۋلامىزدا ولارعا جاعداي مۇلدە جاسالماعان. بالدىرعاندار قۇممەن وينايتىن الاڭ, سىرعاناق, اتكەنشەك جوق. اۋلامىز سپورتتىق ترەناجەرلەرمەن دە جابدىقتالماعان» دەيدى سۆەتلانا. جۇبايى ەكەۋى قازىرگى زامانعا ساي كەلەتىن بالالار الاڭىنىڭ جوباسىن ازىرلەدى. وسى كۇندەرى قۇنى 6 ملن تەڭگە تۇراتىن جوبانى جۇزەگە اسىرۋ باستالدى. كوپكە ۇزاماي جاڭا الاڭ بوي كوتەرۋى ءتيىس.
«بالالار الاڭىنىڭ قۇرىلىسى بىتكەننەن كەيىن جۇمىستى تۇرعىنداردىڭ وزدەرى قابىلدايدى. الاڭدى كۇتىپ-ۇستاۋ دا تۇرعىنداردىڭ باقىلاۋىندا بولۋى كەرەك» دەيدى اۋدان اكىمى ە.ەگەمبەردى.
بالالار الاڭدارى جوبالارىنا قاتىستى وسىعان ۇقساس ۇسىنىستار بەيبىتشىلىك كوشەسى, 60, ك.كۇمىسبەكوۆ كوشەسى, 7/1, د.باباتايۇلى كوشەسى, 9, 9ا, سارىارقا داڭعىلى, 29, ءى.ەسەنبەرلين كوشەسى, 11/1, 15/1 مەكەنجايلارى بويىنشا كەلىپ ءتۇستى.
«ۆوزروجدەنيە» تك تۇرعىندارى «مەنىڭ جايلى اۋلام – ءومىر سۇرگىم كەلەدى» جوباسىن ۇسىندى. «ءبىزدىڭ ءۇيدىڭ ماڭايىندا گاراجدار ورنالاسقان. ولاردى ءسۇرىپ, ورنىنا تۇرعىندار دەمالاتىن الاڭ سالۋدى ۇسىندىق. جوباعا مەكتەپ جاسىنا جەتپەگەن بالالار وينايتىن الاڭ, جاسوسپىرىمدەرگە ارنالعان فۋتبول الاڭى, زەينەتكەرلەر سپورتپەن اينالىسۋ ءۇشىن ترەناجەرلەر كىرەدى. الاڭ كوگالداندىرىلۋى ءتيىس. اۋلا جارىقتاندىرىلىپ, «سەرگەك» كامەراسى دا ورناتىلۋى شارت» دەيدى وسى تۇرعىن ءۇي كەشەنىنىڭ بەلسەندىسى روزا قۇسپاەۆا. ونىڭ ايتۋىنشا, اتالمىش جوبانىڭ قۇنى – 5 ملن تەڭگە.
جەڭىمپاز بولىپ تانىلعان جوبالاردىڭ اراسىندا ەركەبەك باقتياروۆ ۇسىنعان سپورتتىق اۋلا كلۋبىنىڭ جوباسى ءوزىنىڭ اۋقىمدىلىعىمەن ەرەكشەلەنەدى. ەڭ كوپ داۋىس جيناعان دا (1485 داۋىس) وسى جوبا بولدى. جوسپار بويىنشا بۇل №187 كوشەنىڭ №21 جانە №23 ۇيلەردىڭ ماڭايىندا سالىنۋى ءتيىس.
«ءوزىمنىڭ ماماندىعىم – ينجەنەر-قۇرىلىسشى. ۇسىنعان جوبام بالالاردىڭ بوس ۋاقىتىن ءتيىمدى پايدالانۋعا جاعداي جاسايدى. وندا فۋتبول, ۆولەيبول, باسكەتبول, ۇستەل تەننيسى الاڭدارى, جۇمساق توسەنىشتەن جاسالعان جۇگىرۋ الاڭى بولۋى كەرەك. كىشكەنتاي بالالار وينايتىن جەر بولەك بولادى. بۇعان قوسا, ءارتۇرلى ترەناجەرلەر دە ويلاستىرىلعان. سپورتتىق اۋلا كلۋبىندا بالالار مەن جاسوسپىرىمدەرگە عانا ەمەس, ءارتۇرلى جاستاعى ادامدارعا بوس ۋاقىتتارىن پايدالى وتكىزۋگە بولادى. بۇل جوبا ارقىلى 1 مىڭنان اسا ادامدى تۇراقتى تۇردە سپورتپەن اينالىسۋعا تارتا الامىز» دەيدى ە.باقتياروۆ.
«بيۋدجەتكە قاتىسۋ» جوباسىنىڭ يگىلىگىن شەتكى ايماقتار تۇرعىندارى دا كورەدى. اتاپ ايتقاندا, جوبا اياسىندا «كوكتال-1» كەنتىندە اۋلانى اباتتاندىرۋ مەن كوگالداندىرۋعا قاتىستى بىرقاتار جۇمىستار قولعا الىنادى.
