استانا قالاسىنىڭ مەملەكەتتىك مۇراعاتىنداعى قۇجاتتاردى ەلەكتروندى نۇسقاعا كوشىرۋ كورسەتكىشى 1 پايىزدى عانا قۇرايدى. ونىڭ سەبەبى مەكەمەدەگى سكانەر ەسكىرگەن. بارلىق قۇجاتتاردى قامتۋعا بۇل تەحنيكانىڭ شاماسى كەلمەيدى. جالپى مۇراعاتتا قۇجاتتاردى ساقتاۋ, پايدالانۋ, شتاتقا بايلانىستى بىرقاتار تۇيتكىلدەر بار. كەشە قالالىق ءماسليحات دەپۋتاتتارى شاھاردىڭ مۇراعاتى مەن وعان قاراستى الماتى جانە ەسىل اۋداندارىنىڭ بولىمشەلەرىن ارالاۋ بارىسىندا اتالمىش تۇيتكىلدەرمەن تانىستى.
قالالىق مۇراعات ديرەكتورى ارىسبەك كوكباستىڭ مالىمدەۋىنشە, قۇجاتتاردى ەلەكتروندى نۇسقاعا كوشىرۋدى جىلدامداتۋ ءۇشىن مەكەمەگە زاماناۋي ۇلگىدەگى جاڭا سكانەر كەرەك. «جاقىندا پەتروپاۆلعا بارىپ كەلدىم. سونداعى مۇراعات وزدەرىنە جاقسى سكانەر ساتىپ العان. ءبىز 26 ميلليون تەڭگە تۇراتىن سكانەردى الامىز دەپ جوسپارلاپ قويدىق. بۇل سكانەر قۇجاتتاردى جىلدام كوشىرەدى. سايكەس تاپسىرىستى وتكىزىپ قويدىق. بىراق ءالى ناقتى شەشىم شىقپاي جاتىر» دەيدى مۇراعات باسشىسى.
ونىڭ ايتۋىنشا, ەلىمىزدە قۇجاتتاردى ەلەكتروندى نۇسقاعا كوشىرۋدەن 3-4 سكانەرى بار قىزىلوردا قالاسىنىڭ مۇراعاتى الدا كەلە جاتىر. بۇل مەكەمە قۇجاتتاردىڭ 50 پايىزىن كوشىرىپ ۇلگەرگەن.
استانالىق مۇراعات قورى دا تولىپ كەتكەن. سول سەبەپتەن مەملەكەتتىك مەكەمەلەردەن قۇجاتتاردى قابىلداۋ توقتاتىلدى. تەك قانا جۇمىسىن توقتاتقان مەكەمەلەردىڭ قۇجاتتارى عانا قابىلدانىپ جاتىر. سونىڭ وزىندە قۇجاتتار تىعىز ورنالاسقان. ولار ساقتالاتىن سورەلەر دە ەسكى. وسى تۇرعىدان ءماسليحات دەپۋتاتى ءماجيت شايداروۆ زامانعا ساي كەلەتىن جىلجىتىلاتىن سورەلەردى ساتىپ الۋ ءتيىمدى بولاتىنى, مۇنداي سورەلەر ورىندى دا كەڭەيتەتىنى جايلى پىكىرىن جەتكىزدى.
جالپى قالالىق مۇراعاتقا اۋدانداردىڭ قۇجاتتارىن ءبىر جەردە ساقتايتىن عيمارات قاجەت. بۇگىندەرى مەكەمەنىڭ باس عيماراتىندا سارىارقا اۋدانىنا تيەسىلى قۇجاتتار عانا ساقتاۋلى. الماتى مەن ەسىل اۋداندارىنىڭ بولىمشەلەرى پريگورودنىي تۇرعىن الابىندا ورنالاسقان. ال جاڭادان اشىلعان بايقوڭىر اۋدانى بولىمشەسىنە ج.ناجىمەدەنوۆ كوشەسىندەگى 10/2 ءۇيدىڭ ءبىرىنشى قاباتىنان ورىن بەرىلگەن.
پريگورودنىيداعى بولىمشە ورتالىق جىلۋ جۇيەسىنە قوسىلماعان. اۆتونومدى جۇيە توتەنشە جاعدايعا الىپ كەلۋى مۇمكىن. بولىمشەگە بارعان دەپۋتاتتار وسى جاعىنا دا نازار سالىپ, ورتالىق جىلۋعا قوسىلۋ كەرەكتىگى تۋرالى پىكىر ءبىلدىردى. مۇراعات ماسەلەسى بۇگىن قالالىق ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس جونىندەگى كوميسسيا وتىرىسىندا قارالادى. بۇل جايلى گازەتىمىزدىڭ كەلەسى سانىندا تارقاتىپ جازاتىن بولامىز.
