سەيسەنبى كۇنى بەيبىتشىلىك جانە كەلىسىم سارايىندا ەل استاناسىنىڭ الماتىدان اقمولاعا كوشىرىلگەنىنە 17 جىل تولۋىنا وراي «ارمانعا جەتەلەي بەر, استانا!» اتتى مەرەكەلىك كونتسەرت ءوتتى.
1997 جىلدىڭ 10 جەلتوقسانىندا الاتاۋ باۋرايىنان شىعىپ, ارقاعا بەت تۇزەگەن كوش ەسىل وزەنىنىڭ بويىنا توقتادى. وسى جەردە جاڭا استانانىڭ قازىعى قاعىلىپ, سول كۇنى ەل ورداسى اتانعان اقمولا – استانانىڭ جىلناماسى جازىلا باستادى. سودان بەرى ونىڭ بەتتەرى قالىڭداي ءتۇسىپ, باس قالا تاريحى التىن ارىپتەرمەن ادىپتەلگەن نەبىر جارقىن وقيعالارمەن تولىقتى. ءوزىنىڭ باستاپقى كەزەڭىندە قالا حالقى ءۇش ءجۇز مىڭنىڭ ماڭايىندا بولسا, قازىردە سەگىز ءجۇز مىڭنان استى. ساۋلەتى مەن داۋلەتى جاراسقان عيماراتتار بوي كوتەردى. الەمنىڭ ءتۇرلى ەلدەرىنەن استاناعا ساپارلاعان بەلگىلى تۇلعالار باس قالامىزدىڭ ءسانى مەن سالتاناتىنا تاڭداي قاعىستى. جات جۇرتتىقتاردى تاڭعالدىرىپ, قازاقستاندىقتاردىڭ كوز قۋانىشىنا اينالعان ەلوردا ودان ءارى دە قارىشتاۋ ۇستىندە. سوندىقتان الەم كارتاسىنان ويىپ تۇرىپ ورىن العان استانامىزدى قالاي اسقاقتاتساق تا ارتىق ەمەس!
وسى كۇندەرى استانا تۋرالى جازىلعان اندەر بارشىلىق. سول اندەردىڭ بىرەگەيى مەملەكەت باسشىسى نۇرسۇلتان نازارباەۆتىڭ قالامىنان تۋعان «گورود موي» ءانى. «استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى سۇندەت بايعوجين مەرەكەلىك كونتسەرت شىمىلدىعىن وسى تۋىندىمەن اشىپ, كورەرمەن جۇرەگىن تەربەدى.
وسىمەن باس قالامىز جايلى اندەردىڭ لەگى اياقتالعان جوق. «ارناۋ» دۋەتى «استانا – ماحابباتىم مەنىڭ» ءانىن شىرقاسا, قايرات باەكەنوۆ پەن «فورمات» توبى وسىدان ەكى-ءۇش كۇن بۇرىن عانا جازىلعان جاڭا ءاننىڭ تۇساۋىن كەستى. بۇل تۋىندىنىڭ «وڭتۇستىك پەنەن باتىستان, سولتۇستىك پەنەن شىعىستان تاعدىرلار كەلىپ توعىسقان» دەگەن جولدارى ءبىر شىندىقتىڭ بەتىن اشتى. شىنىمەن دە, ەلىمىزدىڭ تۇكپىر-تۇكپىرىنەن استاناعا اعىلعان جۇرت وسى جەردە جاڭا دوستاردى, ءتىپتى, ومىرىنە سەرىك بولاتىن جانداردى جولىقتىرۋدا. ارينە, كوپشىلىككە سۇيىكتى «ەسىل اعادى» ءانى دە شىرقالماي قالمادى.
بىرنەشە جىلدار كولەمىندە ەلوردادا «ايالاعان استانا» اتتى بايقاۋ وتكىزىلىپ كەلەدى. كونتسەرتكە جينالعاندار «ءبىز باقىتتى بالالارمىز» دەپ شىرقاعان وسى بايقاۋ لاۋرەاتتارى مەن №2 مۋزىكا مەكتەبىنىڭ بالالار حورىنىڭ دارىندىلىعىنا كوز جەتكىزدى. بۇلاردان بولەك, كوپشىلىك بەلگىلى انشىلەر مارجان اراپباەۆا مەن پرەزيدەنتتىك وركەستردىڭ ۇلتتىق اسپاپتار ءانسامبلىنىڭ «احاۋ كەرىم» اتتى حالىق انىنە سالعان ايگۇل قوسانوۆانىڭ ونەرىنە قول سوقتى. «رينگو» توبى كورەرمەندەرگە ىرعاقتى ءاندى سىيلادى. بىلتىرعى «قازاقستان داۋىسى» جوباسىنان اتتارى تانىس روزا مۇقاتاەۆا مەن مارحابا سابيەۆا بۇل جوباعا بەكەردەن بەكەر قاتىسپاعانىن تانىتتى.
ەلدىك پەن بىرلىككە شاقىراتىن مەرەكەلەردىڭ كونتسەرتتەرىنە قاتىسۋدان باس تارتپايتىن ءبىر توپ بار. ول – حالىقتىڭ جۇرەگىنەن بەرىك ورىن العان «مۋزارت» توبى. وسى كونتسەرتتە دە مەيرامبەك بەسپاەۆ, ساكەن مايعازيەۆ, كەنجەبەك جانابىلوۆتەن تۇراتىن ۇشتىك «قازاقتاي ەل قايدا» ءانىن ورىنداپ, كورەرمەندەردىڭ قوشەمەتىنە بولەندى.
امانعالي شميتۇلى
