بۇرناعى كۇنى استانا قالاسىنىڭ اكىمى ادىلبەك جاقسىبەكوۆ ەلورداداعى ءدىني بىرلەستىك جەتەكشىلەرىمەن جۇزدەستى.
ورايى كەلگەن جىلى جۇزدەسۋ قالا اكىمىنىڭ دىنباسىلارمەن جانە قالاداعى ءدىني بىرلەستىكتەردىڭ قىزمەتىمەن جاقىنىراق تانىسۋ ماقساتىمەن ۇيىمداستىرىلدى.
اڭگىمە بارىسىندا ءا.جاقسىبەكوۆ ەلباسىنىڭ «نۇرلى جول – بولاشاققا باستار جول» اتتى حالىققا جولداۋىندا قازاقستاندىقتار اراسىنداعى ىنتىماقتاستىق پەن اۋىزبىرشىلىكتىڭ, ەتنوسارالىق تاعاتتىلىقتىڭ نىعايۋىنا ايرىقشا ءمان بەرىلگەنىن اتاپ ءوتتى.
بۇگىنگى تاڭدا ەلورداداعى ءدىني احۋال قالىپتى, ءدىني ۇيىمدارمەن قارىم-قاتىناس جولعا قويىلعان, كونفەسسياارالىق كەلىسىم بەكي تۇسۋدە.
سول كۇنى, سونداي-اق, استانا قالاسى اكىمدىگى جانىنداعى ءدىني بىرلەستىكتەرمەن بايلانىس جونىندەگى كەڭەستىڭ جينالىسى ءوتتى. وعان مەملەكەتتىك ورگانداردىڭ, جوعارى وقۋ ورىندارىنىڭ, ءدىني بىرلەستىكتەر مەن ۇكىمەتتىك ەمەس ۇيىمداردىڭ وكىلدەرى, دەپۋتاتتار مەن قوعام بەلسەندىلەرى قاتىستى.
كەڭەس بارىسىندا كونفەسسيالار اراسىنداعى قارىم-قاتىناس, قالاداعى قازاقستان مۇسىلماندارى ءدىني باسقارماسى وكىلدىگىنىڭ قىزمەتى, ۇلتارالىق جانە كونفەسسياارالىق كەلىسىمدەگى قوعامدىق ينستيتۋتتاردىڭ ءرولى كەڭىنەن تالقىلاندى.
كەڭەس وتىرىسىنىڭ قورىتىندىسى بويىنشا ءتيىستى قۇرىلىمدارعا تاپسىرما بەرىلىپ, 2015 جىلعا ارنالعان جۇمىس جوسپارى بەكىتىلدى.
