جاقىندا بەلگىلى جازۋشى-پۋبليتسيست, حالىقارالىق «الاش» ادەبي سىيلىعىنىڭ يەگەرى, قازاقستاننىڭ ەڭبەك سىڭىرگەن قايراتكەرى ءشاربانۋ بەيسەنوۆا شىعىس قازاقستان وبلىسىنىڭ قۇرمەتتى ازاماتى اتاندى. نۇر-سۇلتان قالاسىنىڭ جازۋشىلار ۇيىندە اتالمىش وبلىس اكىمىنىڭ ورىنباسارى ازامات مۇحامەدچينوۆ قالامگەرگە ءتيىستى كۋالىكتى تاپسىردى. ەلوردا اكىمدىگىنىڭ اتىنان قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قۇرمەت كورسەتىپ, قۇتتىقتادى.
ءشاربانۋ بەيسەنوۆا – شىعىس قازاقستان وبلىسى ۇلان اۋدانىنىڭ تۋماسى. العاشقى تۋىندىلارى دا وبلىستىق «كوممۋنيزم تۋى» (قازىرگى «ديدار») گازەتى مەن «قازاقستان ايەلدەرى» جۋرنالىندا تۇراقتى تۇردە جاريالانىپ تۇردى. بىرقاتار مەرزىمدى باسىلىمداردا ەڭبەكتەندى. اتاپ ايتقاندا, «پاراسات» (بۇرىنعى «مادەنيەت جانە تۇرمىس»), «قازاقستان ايەلدەرى» جۋرنالدارىندا, «قازاق ادەبيەتى» گازەتىندە ادەبي قىزمەتكەر, ءبولىم مەڭگەرۋشى بولدى. اقپارات مينيسترلىگىنىڭ باسپا ىستەرى جونىندەگى دەپارتامەنتىندە باس مامان قىزمەتىن اتقارىپ, جاڭادان جارىق كورگەن كىتاپتاردىڭ ناسيحاتىمەن اينالىستى.
جازۋشىنىڭ قالامىنان تۋعان اڭگىمە-پوۆەستەرى وقىرمان قاۋىمنىڭ جوعارى باعاسىن الدى. تاريحي تاقىرىپقا دا قالام تەربەگەن قالامگەر
«سۇزگىنىڭ سوڭعى كۇندەرى» حيكاياتىن جازدى. «ۇلى دالا ارۋلارى» جوباسى اياسىندا «سۇيىنبيكە», «بوزوق ارۋى», «ۇرپاعىنا ۇران بولعان انالار» كىتاپتارى جارىق كوردى.
سالتاناتتى شاراعا ءشاربانۋ قوناقبايقىزىنىڭ قالامگەر ارىپتەستەرى – مەملەكەتتىك سىيلىق يەگەرلەرى, اقىن نەسىپبەك ايتۇلى مەن جازۋشى الىبەك اسقاروۆ, جازۋشىلار وداعى نۇر-سۇلتان قالالىق فيليالىنىڭ ديرەكتورى داۋلەتكەرەي كاپۇلى قاتىسىپ, تۋعان جەردىڭ قۇرمەتتى اتاعىمەن قۇتتىقتادى.
بايان اسىلبەكوۆا
