وپەرا اكادەمياسىنداعى وقۋ ءۇردىسى تۋرا ءبىر اي بۇرىن باستالعان ەدى. وسى ۋاقىت ارالىعىندا جاس سوليستەر تاجىريبەلى ۇستازدار اناتولي گۋسەۆ پەن فرانچەسكو مەددانىڭ جەتەكشىلىگىمەن ايگىلى اۆتورلاردىڭ وپەرالارىنان ۇزىندىلەر ازىرلەدى.
كۇردەلى ساحنالىق كورىنىستەردىڭ ءبىرى – ۆ.ا.موتسارتتىڭ «دون جۋان» وپەراسىنان كوماندوردىڭ ءولىمىن ۆالەري سەليۆانوۆ, دىنمۇحامەد كوشكىنباەۆ جانە جانداربەك ەركىنباەۆ ورىندادى. گ.دونيتسەتتيدىڭ «ماحاببات سۋسىنى» وپەراسىنان نەمورينو – نۇرقانات تاپيەۆ پەن دۋلكامارا – شىڭعىس راسىلحاننىڭ دۋەتى ەستە قالارلىقتاي اسەر ەتتى. پ.چايكوۆسكيدىڭ «پيكوۆايا داما» وپەراسىنان «باقتاشى ايەلدىڭ ادالدىعى» كوستيۋمدى كورىنىسى كەشتىڭ جارقىن قورىتىندىسىن جاسادى. ونداعى سۇيكىمدى پريلەپانىڭ ءرولىن گۇلدانا الدادوسوۆا ورىندادى. ميلوۆزور بەينەسىندە ەلميرا شپەكباەۆا ونەر كورسەتتى, ال ونىڭ باقتالاسى زلاتوگوردى ازات مالىك سومدادى.
حالىقارالىق وپەرا اكادەمياسىندا وقۋ ەكى جىلعا ەسەپتەلگەن جانە ونىڭ باستى مىندەتى – وپەرالىق ورىنداۋشىلىق ونەردىڭ دەڭگەيىن كوتەرۋ, ونەر جولىنا قادام باسقان دارىن يەلەرىنىڭ الەۋەتىن اشۋعا كومەكتەسۋ. ۇزدىك وتاندىق جانە شەتەلدىك پەداگوگتارمەن ساباقتار كۇن سايىن وتكىزىلەدى. وندا ۆوكالدىق تەحنيكا جانە اكتەرلىك شەبەرلىكپەن جۇمىس جاساۋ, يتاليان ءتىلىن ۇيرەنۋ قامتىلعان. اكادەميا بولاشاق ارتىستەرگە قازاقستاننىڭ وپەرا ونەرىن شەت ەلدەردە پاش ەتۋ ءۇشىن الەمنىڭ جەتەكشى ساحنالارىندا ونەر كورسەتۋگە مۇمكىندىك بەرۋدى ماقسات ەتىپ وتىر.
