ەلورداداعى ۇلتتىق مۋزەيدە بوكەي ورداسىنىڭ 220 جىلدىعىنا ارنالعان «بوكەي ورداسى – ەل مۇراسى» كورمەسى اشىلدى. كورمەگە بوكەي ورداسىنداعى «حان ورداسى» تاريحي-مادەني ساۋلەت-ەتنوگرافيالىق مۋزەي-قورىعىنان جۇزدەن استام جادىگەر جەتكىزىلدى. اشىلۋ سالتاناتىنا پارلامەنت دەپۋتاتتارى, قوعام قايراتكەرلەرى, زيالى قاۋىم وكىلدەرى قاتىستى.
كورمە زالى 11 تاقىرىپتىق بولىمگە بولىنگەن. ءبىرىنشى جانە ەكىنشى بولىمدەرىندە جاڭگىر حاننىڭ ءومىرى سۋرەتتەلەدى. كەيىنگى بولىمدەرى بوكەي ورداسىنىڭ قالىپتاسۋى مەن دامۋىنا ارنالعان. بۇعان قوسا, كورمە زالىندا قۋعىن-سۇرگىن جىلدارىنا, ەكىنشى دۇنيەجۇزىلىك سوعىسقا, بوكەي ورداسىندا تۋىپ-وسكەن تانىمال تۇلعالارعا ارنالعان ەكسپوزيتسيالار بار.
«ءدال وسى حان ورداسى اۋىلىندا ءحىح عاسىرعا جاتاتىن 45-تەن استام عيمارات جانە 80-نەن استام ءۇي ساقتالعان. سونىڭ ىشىندە 13 عيمارات باتىس قازاقستاننىڭ «حان ورداسى» تاريحي-مادەني ساۋلەت-ەتنوگرافيالىق مۋزەي-قورىعىنىڭ قۇرامىنا ەندى» دەدى مۋزەي-قورىق ديرەكتورىنىڭ ورىنباسارى نازىمگۇل ورازگەلديەۆا.
كورمەگە يساتاي تايمانۇلىنىڭ ءوز ساربازىنا ەرلىگى مەن ابىرويى ءۇشىن تارتۋ ەتكەن قانجارى, بوكەي زامانىنان قالعان قارۋ-جاراقتار مەن ءمورتاڭبالار, تۇرمىستىق زاتتار دا قويىلعان. جاڭگىر حاننىڭ ءمۋنديرى مەن فاتيما حانشانىڭ سانكت-پەتەربۋرگتە ءى نيكولايدىڭ ءتاج تاعۋ راسىمىنە كيگەن كويلەگى رەستاۆراتسيادان كەيىن ۇسىنىلىپ وتىر.
كورمەنىڭ اشىلۋىنان كەيىن «بوكەي حاندىعى – وركەنيەت ورداسى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. ال ەلورداعا جەتكىزىلگەن جادىگەرلەردى 22 قاراشاعا دەيىن تاماشالاۋعا بولادى.