استانادا وسى كۇندەرى كوشە ونەرىنىڭ Astana Street Art فەستيۆالى ءوتىپ جاتىر. ەلوردانىڭ 20 جىلدىعىنا ارنالعان شاراعا جاس سۋرەتشىلەردەن قۇرالعان بەس كوماندا قاتىسۋدا. كوپ قاباتتى تۇرعىن ۇيلەردىڭ قابىرعالارىنان قالانىڭ كوركىنە كورىك قوسقان سۋرەتتەردى بايقاساڭىز, بۇل – سولاردىڭ تۋىندىلارى. اتالمىش جوبانى استانا قالاسى مادەنيەت جانە سپورت باسقارماسى «قۇلانشى» قازىرگى زامانعى ونەر ورتالىعىمەن بىرگە قولعا الىپ وتىر.
«بۇگىندە گراففيتي بەيرەسمي ونەر عانا ەمەس, تۇتاستاي مادەني ءبىر باعىتقا اينالدى. ءبىر كەزدەرى وسىنداي سۋرەتتەر زاڭسىز بولىپ سانالعان, ال ەندى ولاردى نيۋ-يورك, لوندون, پاريج, ماسكەۋ سەكىلدى الەمنىڭ ءىرى قالالارىندا تاريحي عيماراتتاردىڭ قاسبەتتەرىنەن كورە الامىز. بۇل سۋرەتتەر استانانى اجارلاندىرا تۇسپەك» دەيدى استانانىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ. جوباعا قاتىسىپ جاتقان سۋرەتشىلەر تۋىندىلارىن استانانىڭ مەرەيتويىنا تارتۋ ەتىپ, شىعارماشىلىقتارى ارقىلى جەرگىلىكتى تۇرعىندارعا قۋانىش سىيلاماق.
«جاس سۋرەتشىلەر ءۇشىن بۇل ۇلكەن تاجىريبە. بۇل رەتتە كەنەپتىڭ ورنىنا قالالىق عيماراتتاردىڭ قاسبەتتەرىن پايدالانۋ – ەلەس-قيالىنا ەرىك بەرىپ, قالاعانىڭدى سالۋعا مۇمكىندىك بەرەدى» دەيدى «قۇلانشى» قازىرگى زامانعى ونەر ورتالىعىنىڭ ارتديرەكتورى ايگۇل تەگجانوۆا.
جۇمىستاردىڭ باسىم بولىگىنەن قازاق حالقىنىڭ ءداستۇر-سالتىن, ءبىر سوزبەن ايتقاندا, ۇلتتىق ەرەكشەلىكتەرىن كورۋگە بولادى. مىسالى, كەنەسارى كوشەسىندەگى №63 ۇيدە كيىز ءۇيدىڭ جانىندا تۇرعان قازاق قىزى بەينەلەنگەن. نۇرلان قيلىباەۆتىڭ ەسكيزى بويىنشا جوبالانىپ, «ىقىلاس» اتاۋى بەرىلگەن بۇل سۋرەتتى ەرجان تاناەۆ, اققالي زاكىروۆ, اينۇر سەيىتكەرىموۆا, رومان گلاۆاتسكيح, ادىلبەك قاراكەسەكوۆ جانە فاريزا جاھانوۆا سالىپ شىقتى.
استانانىڭ اۋداندارى دا قالانى بەزەندىرۋگە ۇلەس قوسۋدا. كوكتەمدە «Urban Art Astana» اتتى حالىقارالىق بايقاۋ جاريالاندى. «ينستاگرام», «فەيسبۋك» الەۋمەتتىك جەلىلەرىندە حالىق كوپ داۋىس بەرگەن سۋرەتتەر بۇگىندەرى انىقتالدى.
«بايقاۋعا الەمنىڭ ءتۇرلى ەلىنەن 30-دان استام سۋرەتشىنىڭ 70-تەن استام ەسكيزى كەلىپ ءتۇستى. ولاردىڭ قاتارىندا قازاقستان, رەسەي, ۋكراينا, قىرعىزستان, يندونەزيا, پولشا, يسپانيا, يزرايل, ازەربايجان سەكىلدى ەلدەر بار. قازىلار القاسى جانە استانا قالالىق قۇرىلىسى 26 ەسكيزدى تاڭداپ الدى. سولاردىڭ ىشىندە ۇزدىك 6 تۋىندى ىرىكتەلىپ الىندى. ەندى ولار اۋدانىمىزدىڭ كوركىن ارتتىرا تۇسپەك» دەيدى سارىارقا اۋدانىنىڭ اكىمى ارمان تۇرلىبەك.
ءبىرىنشى ورىندى گراففيتي باعىتىنداعى جامبىل جاباەۆ پەن ساكەن سەيفۋلليننىڭ پورترەتتەرىن سالعان «ارت» توبى يەلەندى. ەكىنشى ورىندى ەۆگەني چەستىڭ «تابيعات تاقىرىبىندا كوللاج» اتتى تۋىندىسى الدى. ال ءۇشىنشى ورىن دميتري لەۆوچكيننىڭ «سۇلتاندار» سۋرەتىنە بۇيىردى. وسىلارعا قوسا كونستانتين دانيلوۆتىڭ «تاريح», ماكسيم رەۆانشتىڭ جانە «DOURONE» توبىنىڭ (يسپانيا) تۋىندىلارى جۇلدەگە ىلىكتى. تالانتتارعا قولداۋ كورسەتۋ ماقساتىندا ازامات حالىقوۆتىڭ «قىز قۋ» تاقىرىبىنداعى تۋىندىسى دا تاڭداپ الىندى.
ارمان تۇرلىبەكتىڭ ايتۋىنشا, جۇرتشىلىق سۋرەتتەردىڭ ورنالاسۋىنا قاتىستى ۇسىنىستارىن جەتكىزەدى الادى. ال ASTANA Street Art فەستيۆالى 30 ماۋسىمعا دەيىن جالعاسادى.
امانعالي قالجانوۆ
