كەشە ەلوردا اكىمى التاي كولگىنوۆ ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆپەن بىرگە تۇرمىستىق قالدىقتاردى وڭدەۋ كەشەنىنە باردى.
استانادا ورنالاسقان قالدىقتاردى قايتا وڭدەيتىن زاۋىت – قايتالاما شيكىزاتتى قالپىنا كەلتىرۋ ارقىلى قاتتى قالدىقتاردى سۇرىپتايتىن, سونداي-اق سۇرىپتالعان پلاستماسسالاردى وڭدەيتىن وندىرىستىك نىساندارى بار قالاداعى جالعىز كاسىپورىن. ەلوردادا 65 قوقىس شىعاراتىن كومپانيادان كەشەنگە كۇن سايىن 950 توننا قاتتى تۇرمىستىق قالدىق تۇسەدى.
ەلىمىزدە وتكىزىلگەن ءىس-شارالار قاتتى قالدىقتاردى قايتا وندەۋ ۇلەسىن 2018 جىلى 11,51 پروتسەنتكە دەيىن ارتتىرۋعا مۇمكىندىك بەردى, ال 2017 جىلى بۇل كورسەتكىش 9 پروتسەنتتى, 2016 جىلى 2,6 پروتسەنتتى قۇراعان بولاتىن. بۇگىنگى تاڭدا رەسپۋبليكا بويىنشا 204 قالا مەن اۋداننىڭ ىشىندە 51 ەلدى مەكەندە – ءارتۇرلى كەزەڭدەردە بولەك جيناۋ ءادىسى, 30 ەلدى مەكەندە سۇرىپتاۋ ءادىسى ەنگىزىلگەن.
قاتتى قالدىقتاردى وڭدەۋ سالاسىن ودان ءارى دامىتۋ ءۇشىن قولايلى ينۆەستيتسيالىق احۋال, مەملەكەتتىك قولداۋ شارالارى, مەملەكەتتىك جانە جەرگىلىكتى بيۋدجەتتەردەن قاراجات ءبولۋ, سونداي-اق جەكە ينۆەستيتسيالاردى تارتۋ قاجەت. وسىعان وراي ەكولوگيا, گەولوگيا جانە تابيعي رەسۋرستار مينيسترلىگى مۇددەلى مەملەكەتتىك ورگاندارمەن جانە ۇيىمدارمەن بىرلەسىپ قاتتى تۇرمىستىق قالدىقتاردى باسقارۋ سالاسىنداعى مەملەكەتتىك باعدارلامانى ازىرلەۋ بويىنشا شارالار اتقارىپ جاتىر. قاتتى تۇرمىستىق قالدىقتاردى جەكەلەي جيناۋدى جەمىستى جۇزەگە اسىرۋدا حالىقتىڭ ەكولوگيالىق ساناسى مەن مادەنيەتى دە ماڭىزدى ءرول اتقارادى. سوندىقتان ەكولوگيالىق ءبىلىمدى ارتتىرۋ ماقساتىندا رەسپۋبليكالىق جانە جەرگىلىكتى دەڭگەيدە اۋقىمدى اقپاراتتىق جۇمىستار دا جۇرگىزىلۋدە.
