ەلوردانىڭ «تارلان ارەنا» ستاديونىندا جاۋىنگەر-ينتەرناتسيوناليست قازبەك ابدراحمانوۆ ەسىمىن ەسكە تۇسىرۋگە ارنالعان تۋرنير ءوتتى.
بيىل 18-ءشى رەت ۇيىمداستىرىلعان جارىس استانا كۇنى مەرەكەسى اياسىندا ءوتىپ, وندا بالالار ءۇيى مەن اۋلالىق كلۋبتار كوماندالارى كۇش سىناسىپ, 100-گە جۋىق ءجاسوسپىرىم جاسىل الاڭدا كوڭىل كوتەردى.
نۇر-سۇلتان قالاسى مادەنيەت جانە سپورت باسقارماسى باسشىسىنىڭ ورىنباسارى بەرىك مارجىقپاەۆ پەن سپورت ارداگەرى نيكولاي دريۋتوۆ ءجاسوسپىرىم فۋتبولشىلاردى ەلوردا مەرەكەسىمەن قۇتتىقتاپ, اۋعانستان سوعىسىنىڭ ارداگەرى قازبەك ابدراحمانوۆتىڭ جاۋىنگەرلىك ەرلىگى مەن جاستار مەن بالالار اراسىندا جۇرگىزگەن اسكەري-
پاتريوتتىق جۇمىسىن ەسكە ءتۇسىرىپ, جارىسقا قاتىسۋشىلارعا ساتتىلىك تىلەدى. تارتىسقا تولى وتكەن جارىستا «استانا جاستارى» كمم-نە قاراستى «ەۆەرەست» اۋلا كلۋبى كومانداسى چەمپيون اتاندى. ەكىنشى ورىندى – «ءالىم» اۋلا كلۋبى فۋتبولشىلارى, ال ءۇشىنشى ورىندى اقمولا وبلىسىنىڭ قورعالجىن اۋدانىنان كەلگەن «قاراەگىن» كومانداسى يەلەندى. جەڭىمپازدار مەن جۇلدەگەرلەرگە ديپلومدار, مەدالدار جانە سىيلىقتار تابىس ەتىلدى. سونىمەن قوسا, نۇر-سۇلتان قالاسىنىڭ «بالالار ءۇيى» كومانداسىنا دەمەۋشىلەر اتىنان سىيلىق بەرىلدى.
«مەن وتە قۋانىشتىمىن. اۋىلدان كەلىپ فۋتبول جارىسىنا قاتىستىق. ەندى وقۋشىلارىمدى قالاداعى مەرەكەلىك شارالارعا اپارىپ قىدىرتامىز. ەلىمىزدىڭ جۇرەگىنە اينالعان استانامىزدىڭ مەرەكەسى بارىمىزگە قۇتتى بولسىن دەيمىن. وسىنداي جارىستى ۇيىمداستىرۋشىلارعا راحمەت ايتامىز» دەيدى اقمولا وبلىسىنىڭ قورعالجىن اۋدانىنا قاراستى «قاراەگىن» ورتا مەكتەبىنىڭ باستاپقى اسكەري دايىندىق جانە دەنە شىنىقتىرۋ ءپانى مۇعالىمى ساعات ابدىكارىموۆ.
