ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىندا اتالمىش ونەر وشاعىنىڭ نەگىزىن قالاۋشىلاردىڭ ءبىرى, قاللەكي تەاترىنىڭ اناسى اتانعان قازاقستاننىڭ ەڭبەك سىڭىرگەن ءارتىسى رىمكەش ومارحانوۆانىڭ مەرەيلى 80 جاسقا تولۋىنا وراي شىعارماشىلىق كەشى ءوتتى. اكتريسانىڭ بەنەفيسىندە باستى ءرولدى ءوزى سومدايتىن «كەش» دراماسى كورسەتىلىپ, «قازاق ونەرىنىڭ قارلىعاشى» كىتابىنىڭ تانىستىرىلىمى بولدى.
التىن بەسىگى – قارقارالىنىڭ حالىق تەاترىنان تۇلەپ ۇشقان رىمكەش ومارحانوۆا ودان كەيىن جاقىندا عانا اكادەميالىق مارتەبەنى يەلەنگەن قاراعاندى وبلىستىق س.سەيفۋللين اتىنداعى قازاق مۋزىكالىق دراما تەاترىندا ۇزاق جىل قىزمەت ىستەدى. تاۋەلسىزدىكتىڭ ەلەڭ-الاڭىندا اقمولادا قازاق تەاترى اشىلعاندا وسى تەاتردىڭ نەگىزىن قالاعان تالانتتى رەجيسسەر, قازاقستاننىڭ ەڭبەك سىڭىرگەن قايراتكەرى جاقىپ وماروۆتىڭ شاقىرۋىمەن اتالعان ونەر وشاعىنا كەلدى. تەاتردىڭ تۇساۋكەسەر قويىلىمى – ع.مۇسىرەپوۆتىڭ «اقان سەرى – اقتوقتى» تراگەدياسىندا دامەلى ەسىمدى كەيىپكەردىڭ بەينەسىن سومدادى.
سودان بەرى وتىز جىلعا جۋىق ۋاقىت ءوتتى. جالپى جارتى عاسىردان استام شىعارماشىلىق عۇمىرىندا 150-دەن اسا بەينەنى سومداپ شىعاردى. اتاپ ايتقاندا, ۋ.شەكسپيردىڭ «رومەو مەن دجۋلەتتاسىندا» – دجۋلەتتا, ش.ايتماتوۆتىڭ «انا-جەر-اناسىندا» – تولعاناي, ع.مۇسىرەپوۆتىڭ «قوزى كورپەش –بايان سۇلۋىندا» – ماقپال, «قىز جىبەگىندە» – تولەگەننىڭ اناسى, م.اۋەزوۆتىڭ «قاراگوزىندە» – ءمورجان, «ەڭلىك-كەبەگىندە» – ەڭلىك, «تۇنگى سارىنىندا» – تاڭقىبيكە, ق.بەكحوجيننىڭ «ۇلان اسۋىندا» – ايتولقىن, ق.ىسقاقوۆتىڭ «شىرعالاڭىندا» – قورلىعايىن, س.ءجۇنىسوۆتىڭ «قىسىلعاننان قىز بولدىعىندا» – حاديشا, «ەسكى ۇيدەگى كەزدەسۋىندە» – زەينەپ, ق.شاڭعىتباەۆ پەن ق.بايسەيىتوۆتىڭ «بەۋ, قىزدار-ايىندا» – ايسۇلۋ, ت.احتانوۆتىڭ «كۇشىك كۇيەۋىندە» – بيعايشا بولىپ كەتە بەرەدى.
قازىر سەكسەننىڭ سەڭگىرىنە شىقسا دا, ا.دۋدارەۆتىڭ پوەزيا پاديشاسى فاريزا وڭعارسىنوۆا قازاقشالاعان «كەش» دراماسىندا گاننا ەسىمدى كەيۋانانى كەيىپتەيدى. بۇل قويىلىم 2010 جىلى تاراز قالاسىندا وتكەن حVIII رەسپۋبليكالىق تەاترلار فەستيۆالىندە گران-ءپريدى يەلەنگەنىن ايتا كەتكەن دە ارتىق بولماس.
كينو ونەرىندە دە ايشىقتى ءىزىن قالدىرىپ كەلە جاتىر. العاشقىدا شاكەن ايمانوۆ, ەلۋباي ومىرزاقوۆ, ءامينا ومىرزاقوۆا, رايسا مۇحامەدياروۆا سياقتى قازاق كينو مەن تەاتر ونەرىنىڭ اتاقتى تۇلعالارىمەن بىرگە «نايزاتاس بوكتەرىندە» كوركەم فيلمىنە تۇسسە, كەيىننەن «حانتالاپاي», «الىپ قاشۋ وپەراتسياسى», ورالحان بوكەيدىڭ «اپامنىڭ استاۋى» شىعارماسىنىڭ جەلىسىمەن تۇسىرىلگەن كينوفيلمدەردە اجەنىڭ ءرولىن سومدادى.
شىعارماشىلىق كەشىندە ونەردەگى وسىنشاما وراسان ەڭبەگى اتاپ ءوتىلىپ, نۇر-سۇلتان قالاسى اكىمدىگىنىڭ اتىنان مادەنيەت جانە سپورت باسقارماسىنىڭ باسشىسى نۇرلان سىدىقوۆ مەرەيتوي يەسىن قۇتتىقتاپ, سىي-سىياپات كورسەتتى.
