«ءۇش بايتەرەك» جايعاستى ەلورداعا

بيىل حالقىمىز «ءۇش بايتەرەك» دەپ ارداق تۇتقان قازاق ادەبيەتىنىڭ كلسسيكتەرى ساكەن سەيفۋللين, ءىلياس جانسۇگىروۆ جانە بەيىمبەت ءمايليننىڭ تۋعانىنا 125 جىل تولىپ, تۇعىرلى تۇلعالاردىڭ مەرەيتويلارى ءوز دارەجەسىندە اتالىپ ءوتتى. سول تويدىڭ قورىتىندىسى رەتىندە ەلوردانىڭ تورىندەگى قالامگەرلەر اللەياسىنان ءۇش الىپقا ەسكەرتكىش قويىلدى.ەسكەرتكىشتىڭ اشىلۋىندا قالا اكىمى التاي كولگىنوۆ تاۋەلسىزدىك كۇنىمەن تۇسپا-تۇس كەلگەن ايتۋلى شاراعا ماڭىز بەرىپ, ءۇش تۇلعانىڭ ەڭبەگىنە جەكە-جەكە توقتالدى.
– وتكەن عاسىردىڭ العاشقى شەگىندە حالقىمىز باسىنان وتكىزگەن اۋىر جاعدايدى «تار جول, تايعاق كەشۋ» رومانىندا شىنايى جەتكىزىپ, «قازاق» دەگەن ۇلتىمىزدىڭ اتاۋىن قۇجات جۇزىندە قايتارىپ بەرگەن ساكەن سەيفۋلليننىڭ رۋحانياتىمىزداعى ورنى ەرەكشە. بۇگىندە قالاداعى اقىن مۋزەيى جۇمىس ىستەيدى. ال قازاق ادەبيەتىنىڭ قازىناسىنا سۇبەلى دۇنيەلەر قوسقان بەيىمبەت ءمايليننىڭ جازۋشىلىعىمەن بىرگە, جۋرناليستيكا سالاسىنا سىڭىرگەن ەڭبەگى كوپ. كورنەكتى اقىن ءىلياس جانسۇگىروۆ – قازاق فولكلورىن دامىتقان تۇلعا. «كۇيشى», «قۇلاگەر» پوەمالارى – تۇنعان تاريح. ءۇش بايتەرەككە قويىلعان بۇل ەسكەرتكىش – وتكەنگە قۇرمەت قانا ەمەس, تاريحىمىزعا قويىلعان بىرەگەي بەلگى. ازات ەلدىڭ استاناسىنىڭ تورىندە تاعدىرى دا ءبىر, ءومىرى دە ۇقساس ۇلتىمىزدىڭ ۇلى پەرزەنتتەرىنە ارنالعان ەسكەرتكىشتىڭ تۇرۋى – زاڭدىلىق, – دەدى شاھار باسشىسى. قازاقستان جازۋشىلار وداعىنىڭ ءتور­اعاسى, اقىن ۇلىقبەك ەسداۋلەت وسى ءىستىڭ باسى-قاسىندا جۇرگەن ازاماتتارعا العىسىن ءبىلدىرىپ, ءۇش الىپتىڭ ءومىرى مەن شىعارماشىلىعى جايىندا پاراساتتى وي تولعادى.
سونداي-اق سول كۇنى ەلوردادان العاش رەت جازۋشىلار ءۇيى اشىلدى. جاڭا عيمارات قالا اكىمدىگىنىڭ قولداۋىمەن پايدالانۋعا بەرىلدى. بۇل ۇيدە قالامگەرلەرگە ارنالعان كىتاپ­حانا, سۇحبات بولمەسى, قىسقاسى, شىعارماشىلىقپەن اينالىسۋعا بارلىق جاعداي جاسالعان.
جاڭا عيماراتتىڭ اشىلۋىندا قازاقستان جازۋشىلار وداعىنىڭ توراعاسى ۇلىقبەك ەسداۋلەت ءوز سوزىندە بۇل عيماراتتى «ەلوردالىق قالامگەرلەر باس قوساتىن قاراشاڭىراق» دەپ اتادى.
جازۋشىلار وداعىنىڭ نۇر-سۇلتان قالالىق فيليالىنىڭ توراعاسى, اقىن داۋلەتكەرەي كاپۇلى: «قازىر ەلوردادا قازاقستان جازۋشىلار وداعىنىڭ 150-دەن اسا مۇشەسى بار. سوندىقتان قالامگەرلەر جينالاتىن ءبىر عيمارات قاجەت بولىپ ءجۇر ەدى. ەندى, مىنە, سول ماقساتىمىزعا قول جەتكىزىپ وتىرمىز. وسى ءىستى تياناقتى شەشىپ, قولداۋ كورسەتكەن قالا اكىمدىگىنە العىسىمىزدى ايتامىن» دەدى.
بۇل قۋانىشتى ساتكە باس شاھاردا تۇراتىن اقىن-جازۋشىلار دا قاتىسىپ, ريزاشىلىقتارىن ءبىلدىردى.