12-17 قىركۇيەك كۇندەرى اقتوبە قالاسىندا قازاقستان دراما تەاترلارىنىڭ ءححىV رەسپۋبليكالىق فەستيۆالى وتەدى. وعان استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى «شيە» كومەدياسىمەن قاتىسادى.
ورىستىڭ كلاسسيك قالامگەرى انتون چەحوۆتىڭ «شيە باعى» پەساسىنىڭ نەگىزىندە ياكۋتيانىڭ ەڭبەك سىڭىرگەن ونەر قايراتكەرى, رەسەيدىڭ «زولوتايا ماسكا» اتتى بەدەلدى سىيلىعىنىڭ يەگەرى سەرگەي پوتاپوۆ ساحنالاعان قويىلىمنىڭ پرەمەراسى بيىلعى ءساۋىر ايىندا وتكەن. سول كەزدە كورەرمەندى رەجيسسەرلىك شەشىم تاڭعالدىرعان بولاتىن. كومەديا كەيىپكەرلەرىنىڭ اتتارى تۇگەلدەي قازاقشالانىپ, رانەۆسكايا – شيە, گاەۆ – عايىپ, لوپاحين – بالتاش, پەتيا تروفيموۆ – ءپاتوناي بولىپ شىعا كەلگەن.
قويىلىمنىڭ ونە بويىندا كۇلكى مەن كوز جاسى سياقتى ءبىر-بىرىنە كەرەعار ۇعىمدار استاسىپ, كومەديا مەن تراگەديا ەلەمەنتتەرى قابىسىپ جاتادى. اكتەرلەردىڭ وبرازداردى سومداۋى ارقىلى كەيىپكەرلەردىڭ سىرتى ءبۇتىن بولىپ كورىنگەنىمەن, ءىشى ءتۇتىن ەكەنى بايقالادى. سپەكتاكل اتامەكەن, تۋعان ءۇي قاسيەتىن كورەرمەنگە سەزىندىرە تۇسەدى.
باس كەيىپكەر ليۋبوۆ رانەۆسكايا بەينەسىن قاللەكي تەاترىنىڭ تالانتتى جاس اكتريساسى, «زولوتوي ۆيتياز 2015» حالىقارالىق تەاتر فەستيۆالىنىڭ التىن ديپلوم يەگەرى اقمارال تاناباەۆا سومدايدى. سونداي-اق, قويىلىم بارىسىندا تەاتردىڭ بەلدى ارتىستەرى, قازاقستاننىڭ ەڭبەك سىڭىرگەن قايراتكەرلەرى كەڭەس نۇرلانوۆ, قۋاندىق قىستىقباەۆ, نۇركەن وتەۋىلوۆ, «دارىن» مەملەكەتتىك جاستار سىيلىعىنىڭ يەگەرى سىرىم قاشقاباەۆ كورىنەدى. بۇل اكتەرلەرگە قوسا ايمان ايماعامبەت, داستان ءالىموۆ, شاحمۇرات ورداباەۆ, ايشولپان يبراەۆا, التىنگۇل سەركەباەۆا سىندى ارتىستەر ونەر كورسەتەدى.
تەاتر فەستيۆالىنە قاللەكي تەاترىمەن بىرگە سولتۇستىك قازاقستان وبلىستىق س.مۇقانوۆ اتىنداعى قازاق سازدى دراما تەاترى, اتىراۋ وبلىستىق ماحامبەت اتىنداعى قازاق دراما تەاترى, ت.احتانوۆ اتىنداعى اقتوبە وبلىستىق دراما تەاترى, ب.وماروۆتىڭ الماتى قالالىق «جاس ساحنا» تەاترى, م.اۋەزوۆ اتىنداعى قازاق مەملەكەتتىك اكادەميالىق دراما تەاترى, ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترى جانە رەسپۋبليكالىق نەمىس دراما تەاترى قاتىسپاق.
ال, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ جاڭا ماۋسىمداعى جۇمىسى 2 قىركۇيەكتە باستالماق. قويىلىمدار ادەتتەگىدەي سەيسەنبى-جەكسەنبى كۇندەرى ارالىعىندا وتەدى. بيىل 25 جىلدىق مەرەيتويىن اتاپ وتەتىن ونەر ۇجىمىنىڭ جاڭا ماۋسىمىنىڭ رەسمي اشىلۋى قازان ايىنا بەلگىلەنىپ وتىر.
