استاناداعى №54 مەكتەپ-ليتسەيدىڭ وقۋشىلارى مەن ۇستازدارى ءبىلىم كۇنىن ارقا-جارقا قۋانىشپەن قارسى الدى. ءبىر جاعىنان جاڭا وقۋ جىلىنىڭ باستالۋى كوڭىلگە كول-كوسىر شاتتىق سىيلاسا, ەكىنشى جاعىنان ولارعا وسى مەكتەپتىڭ تۇلەگى, ريو وليمپياداسىنىڭ چەمپيونى دانيار ەلەۋسىنوۆ بۇگىنگى مەرەكەمەن قۇتتىقتاۋعا ارنايى كەلگەن ەدى.
– ءبىزدىڭ شاڭىراقتان تالاي تالانت تۇلەپ ۇشقان. سولاردىڭ ءبىرى – وسى دانيار بالامىزدىڭ جارقىن بولاشاعىنا, قول جەتكىزەر بەلەستەرىنە بۇرىننان سەنەتىنبىز. كەشەگى ءدۇبىرلى دودا كەزىندە رينگكە شىعارىندا ءبارىمىز دە تاقىمىمىزدى قىسىپ, تىلەۋىن تىلەپ وتىردىق. ۇكىلى ءۇمىتىمىزدى تاعى دا اقتاپ, التىن مەدالدى قانجىعاسىنا بايلادى. ۇستاز ءۇشىن بۇدان اسقان قانداي باقىت بار؟! – دەپ اعىنان جارىلدى اتالمىش ءبىلىم ورداسىنىڭ ديرەكتورى عالياش ءامرينا.
ال دانياردىڭ سىنىپ جەتەكشىسى بولعان رايا كەلەسقىزى چەمپيون شاكىرتىنىڭ وقۋشى كەزىن بىلايشا ەسكە ءتۇسىردى:
– ادەتتە سپورتشىلاردى تىلگە شورقاق, گۋمانيتارلىق پاندەرگە ىقىلاسى از دەپ ويلايمىز عوي. بىراق دانيار قازاق ءتىلى, ادەبيەت, قازاقستان تاريحى پاندەرىنەن تىم جۇيرىك بولدى. سايىستارعا بارىپ كەلگەن سايىن سىنىپتاستارىن جيناپ الىپ, كادەسىي تاراتىپ بەرەتىن. جۇلدە ىلمەي قايتقان جارىسى جوق. ءار جەڭىسىن مەكتەپ بولىپ تويلايتىن ەدىك.
ءوز كەزەگىندە دانيار ەلەۋسىنوۆ شەكسىز العىسىن جاۋدىرىپ, قۇرمەت-ماراپاتقا راحمەتىن ايتتى. سونداي-اق, وسى مەكتەپتىڭ بوكس ۇيىرمەسىنە قاتىساتىن ءىزباسار ىنىلەرىنە اۆتوگرافى قويىلعان قولعاپتاردى تارتۋ ەتتى.
بوتاگوز ماراتقىزى
