ۇرلىق – ادامدىققا جاتپايتىن ارام تىرلىك. قازىرگى تاڭدا بىرەۋدىڭ ادال ەڭبەگىمەن تاپقان اقشاسىن نەمەسە ۇيالى تەلەفونىن ۇرلاپ, ونى «كاسىبىنە» اينالدىرعاندار كوپ.
بۇگىندە ءىرى دۇكەندەردە, ساۋدا ورىندارىندا, ءتىپتى قوعامدىق كولىكتەردە «ابايلاڭىز, ۇرى!» دەگەن ساقتاندىرۋ تاقتالارى ءىلىنگەن. ۇرىلاردىڭ سۋرەتىنە قاراساق, ولاردىڭ قاتارىندا جاسى دا, جاسامىسى دا, ايەلى دە, ەركەگى دە بار. ءبىر قاراعاندا ۇرى ەكەنىن تاپ باسىپ تانۋ قيىن.
استانادا جىل باسىنان بەرى 16 مىڭنان استام ۇرلىق تىركەلگەن. ونىڭ 1,4 مىڭى – قالتا ۇرلىعى. قالتا ۇرلىعى كوبىنە حالىق ءجيى جۇرەتىن قوعامدىق ورىنداردا نەمەسە قوعامدىق كولىكتەردە كەزدەسەدى.
«ءبىر ايدان بەرى ەلوردالىق اۆتوپارككە اۆتوبۋس جۇرگىزۋشىسى بولىپ جۇمىسقا تۇردىم. وسى ۋاقىت ارالىعىندا ەكى ادامنىڭ سومكەسى تونالعانىنا كۋامىن. ءبىرى اقشاسىن ۇرلاتسا, ەكىنشىسى ۇيالى تەلەفونىنان ايرىلدى. نە سەبەپتى ەكەنىن بىلمەدىم, ەكەۋى دە ىشكى ىستەر ورىندارىنا بارىپ ارىزدانۋعا ۋاقىتى جوق ەكەندىكتەرىن ايتتى. ونىڭ ۇستىنە اۆتوبۋستا بەينەباقىلاۋ كامەراسى بولمادى» دەيدى ەلوردالىق جۇرگىزۋشىنىڭ ءبىرى ابىلاي ەسكەرمەسوۆ. بۇدان بايقاعانىمىزداي, رەسمي تىركەلمەگەن ۇرلىقتىڭ سانى قانشا؟!
ءدال قازىر ۇرلىقتىڭ ءورشيتىن كەزەڭى. لىق تولى اۆتوبۋستا قالىڭ كيىنگەن ادامدار اراسىندا ارام تىرلىگىن جاساپ جۇرگەندەر جوق دەپ ايتا المايمىز. ونىڭ ۇستىنە قالتا ۇرلىعىنىڭ 80 پايىزى قوعامدىق اۆتوبۋستاردا تىركەلگەن. ىشكى ىستەر دەپارتامەنتىنىڭ قۇرىلىمىندا قالتا ۇرلىعىنا قارسى ارنايى بولىمشە جۇمىس ىستەيدى. ونىڭ كومەگىمەن جىل باسىنان بەرى 200-دەن استام ۇرلىق اشىلعان. ۇرلىقتىڭ اشىلۋىنا كوپ جاعدايدا بەينەكامەرالار سەپتىگىن تيگىزەدى. دەسەك تە, بەينەباقىلاۋ ورناتىلماعان كولىكتەر كوپ. جىل سوڭىنا دەيىن اۆتوبۋستارعا 230 بەينەباقىلاۋ ورناتۋ كوزدەلگەن.
قالتا ۇرلىعى دەمەكشى, ۇستالعان ۇرىلاردىڭ كوبى – بۇعان دەيىن دە بىرنەشە مارتە ءىستى بولعاندار. زاڭنىڭ وسالدىعى سول, قىلمىس ورتا دەڭگەيلى ساناتقا جاتقىزىلعاندىقتان, ونى قاراۋ پروكۋرورمەن كەرى قايتارىلادى. تەك ءۇشىنشى رەت ۇستالعان جاعدايدا عانا قاماۋعا الىنادى. وسى رەتتە استانا قالاسى ىشكى ىستەر دەپارتامەنتىنىڭ قىزمەتكەرلەرى قوعامدىق ورىنداردا جاسالاتىن ۇرلىقتىڭ الدىن الۋ ءۇشىن ازاماتتارعا جەكە زاتتارىنا اباي بولۋ كەرەكتىگىن ەسكەرتەدى.
گۇلميرا ايماعانبەت
