بۇگىن قر ۇلتتىق مۋزەيى تاۋەلسىزدىكتىڭ 25 جىلدىعىنا وراي الەۋمەتتىك جوبا اياسىندا جانە وتكەن مۇگەدەكتەر كۇنىنە بايلانىستى (قازان ايىنىڭ ەكىنشى جەكسەنبىسى) مۇمكىندىگى شەكتەۋلى جاندارعا ارناپ اقىسىز ەكسكۋرسيا وتكىزەدى. بۇل تۋرالى قر مادەنيەت جانە سپورت مينيسترلىگىنىڭ سايتى حابارلادى.
اتالعان اكتسيانىڭ ماقساتى – مۇمكىندىگى شەكتەۋلى جاندارعا دا ەلىمىزدىڭ تاريحى مەن مادەنيەتىن كورىپ تاماشالاۋعا جاعداي جاساۋ. شارا بارىسىندا قوناقتارعا مۋزەي زالدارى بويىنشا ارنايى ەكسكۋرسيا جۇرگىزىلەدى.
سونىمەن قاتار, «نۇر وتان» پارتياسىنىڭ استانا قالاسى بويىنشا فيليالى مەن تسەسنابانك اق فيليالى قر ۇلتتىق مۋزەيىنە مۇگەدەكتەرگە ارنالعان اربالار تابىستايدى.
ەسكە سالا كەتسەك, ۇلتتىق مۋزەي استانا زالى, تاۋەلسىز قازاقستان زالى, التىن زالى, ەتنوگرافيا زالى, زاماناۋي ونەر زالى, تاريح زالى سىندى ارنايى تاقىرىپتىق زالداردان تۇرادى.
مۋزەي جانىندا ۇلتتىق قۇندىلىقتارىمىزدى زەرتتەپ-زەردەلەۋگە باعىتتالعان «حالىق قازىناسى» عىلىمي-زەرتتەۋ ينستيتۋتى جۇمىس ىستەيدى. سونىمەن قاتار مۋزەيدە بالالار شىعارماشىلىعىن دامىتۋعا ارنالعان ورتالىق, قور ساقتاۋ ورىندارى, قايتا قالپىنا كەلتىرۋ شەبەرحانالارى, زەرتحانا, عىلىمي كىتاپحانا, كونفەرەنتس زالدار مەن كادەسىي دۇكەندەرى بار.
inform.kz
