استانادا جىل سايىن جولدار جوندەلىپ, كوشەلەر تەگىستەلەتىنىن جۇرتشىلىق جاقسى بىلەدى. ەندى باس شاھار «ەكسپو-2017» حالىقارالىق مامانداندىرىلعان كورمەسى وتەتىن الاڭعا ينجەنەرلىك-كولىكتىك ينفراقۇرىلىمدى تارتۋعا كوبىرەك كوڭىل بولمەك. 2008 جىلدان بەرى 22,8 شاقىرىم جول سالىنىپ, الدىندا سالىنۋى جوسپارلانعان 14 جولايرىقتىڭ, كوپىردىڭ جانە وتكەلدەردىڭ 9-ى پايدالانۋعا بەرىلگەن.
كولىك كەپتەلىسى ازايادى
ەندى 35 شاقىرىمدى قۇرايتىن كىشى اينالما جولدىڭ قۇرىلىسى جالعاسىپ جاتىر. سونداي-اق, جاڭا تەمىرجول ۆوكزالى مەن «ابۋ-دابي پلازا» كەشەنىن, جاھاندىق كورمەگە قاتىستى وزگە دە ءىرى نىسانداردى ءتيىستى جەلىلەرمەن قامتاماسىز ەتۋ – باستى ماقسات. بۇل تۋرالى كەشە ۇيىمداستىرىلعان باسپاسوز ءماسليحاتىندا استانا قالاسى اۆتوموبيل جولدارى باسقارماسىنىڭ باسشىسى اسحات قاراعويشين مالىمدەدى.
– جالپى العاندا, 10,5 شاقىرىمدى الاتىن 11 كوشە بويىنشا جۇمىس قولعا الىندى. ولارعا №41, №42, ا.بايتۇرسىنوۆ, ج.ءناجىمەدەنوۆ, ا82, ا62, ۆ-4, بايانتاۋ, تۇركىستان, اقمەشىت, ساۋران كوشەلەرى جانە قابانباي باتىر داڭعىلى كىرىپ وتىر. بۇل اۋماقتاردا قازىر قۇرىلىس سالۋ-مونتاجداۋ جۇمىستارى جۇرگىزىلۋدە. قارجىلاندىرۋ تولىق قامتاماسىز ەتىلگەن, – دەيدى ول.
قالانىڭ الەۋمەتتىك نىساندارىنا اپاراتىن جولداردى سالۋ مەن ولاردى ينجەنەرلىك جەلىلەرمەن قامتاماسىز ەتۋ دە ۇمىت قالعان جوق. بۇگىنگى تاڭدا بىرقاتار كوشەلەردە سايكەس جۇمىس جالعاسۋدا. بۇعان قوسا, استاناداعى كولىكتەر اعىنىن ازايتۋ ءۇشىن دە باسقارما ناقتى ىستەردى اتقارۋدا ەكەن.
– 35 شاقىرىمدى قۇرايتىن كىشى اينالما جولى تاۋلىگىنە 90 مىڭ اۆتوكولىكتى وتكىزە الادى. بۇل جول اشىلعاندا كەمىندە 20 مىڭ كولىك قالانىڭ ورتالىعىنا كىرمەي, سىرتپەن اينالىپ جۇرە الادى دەپ جوبالانىپ وتىر. بيىل بۇل جولدى سالۋ ءۇشىن ش.بەيسەكوۆا كوشەسىنىڭ بويىمەن ن.تىلەنديەۆ داڭعىلىنان باستاپ, ءا.مولداعۇلوۆا كوشەسىنە دەيىن جەر تەلىمىن بوساتۋ باستالدى, – دەيدى ا.قاراعويشين.
شەت اۋماق تا قاعىس قالمايدى
سونىمەن قاتار, ءباسپاسوز ءماسليحاتىندا قالاداعى جول قۇرىلىسىنا قاتىستى باسقا دا اقپارات ايتىلدى. اتاپ ايتساق, ەلوردانىڭ شەتكەرى ايماقتارىن دامىتۋ باعدارلاماسىنىڭ اياسىندا 2011-2016 جىلدارى ارالىعىندا 101 شاقىرىم جول سالىنىپ, 275,25 شاقىرىم ينجەنەرلىك جەلىلەر تارتىلدى. كۇيگەنجار, قازاق اۋىلى, پريگورودنىي, كازگورودوك, قاراوتكەل, زارەچنىي جانە پرومىشلەنىي تۇرعىن الاپتارىندا بۇل جۇمىستار تولىعىمەن اياقتالدى. بيىل كومسومولسكي, كوكتال-2, وڭتۇستىك شىعىستىڭ وڭ جاعى جانە ن.تىلەنديەۆ داڭعىلىنان وڭتۇستىككە قاراي 6 شاقىرىم جول مەن 32 شاقىرىم ينجەنەرلىك جەلىلەردى تارتۋدى اياقتاۋ جوسپارلانۋدا. مۇنىڭ ىشىنە ينتەرناتسيونالنىي جانە ميچۋرينو تۇرعىن الاپتارىنا ينجەنەرلىك جەلىلەردى تارتۋ دا كىرىپ وتىر. جالپى العاندا, شەتكەرى ايماقتار بويىنشا جۇمىستاردى ءبىتىرۋ ءۇشىن 93,78 شاقىرىم جول مەن 213,55 ينجەنەرلىك جەلىلەردى تارتۋ كەرەك ەكەن.
جوندەۋ جۇمىستارىندا كىدىرىس جوق
قالاداعى جولداردى جوندەۋگە كەلسەك, جىل باسىنان بەرى 61 كوشەدەگى 44,3 شاقىرىم جول ورتاشا جوندەلدى. 275 كوشەدە اعىمداعى جوندەۋ جۇرگىزىلدى. قازىرگى تاڭدا باسقارما اۋدان اكىمدىكتەرىمەن بىرلەسىپ, جولدارعا ينەرتتى ماتەريال سەبۋدى باستادى. الماتى جانە سارىارقا اۋداندارىنداعى 24 كوشەگە قيىرشاق تاس توسەلدى. جىل اياعىنا دەيىن تاعى ءتورت كوشەدە بۇل جۇمىس اتقارىلۋى ءتيىس.
كەلەسى جىلعا كەلسەك, 32,8 شاقىرىم جولدى سالۋ, قالپىنا كەلتىرۋ جانە جوندەۋ جوسپارلانىپ وتىر. سول جاعالاۋدا كولىك اعىنىن ازايتۋ ءۇشىن قىسقا مەرزىمدە №46 كوشەدەن باستاپ حۋسەين بەن تالال كوشەسىنە دەيىن تاۋەلسىزدىك داڭعىلىنداعى جولدى سالۋ جوبالاندى. سونداي-اق, حۋسەين بەن تالال كوشەسىندەگى №39 كوشەدەن, ابىلايحان داڭعىلىنا دەيىنگى 10 شاقىرىم جولدى سالۋ دا ۇلكەن ماڭىزعا يە. وسى جەردە ەكى كوپىر سالۋ دا جوسپارلاندى. ال جالپى قالادا ءۇش كوپىر جاڭادان بوي كوتەرمەك.
ينجەنەرلىك-كولىكتىك ينفراقۇرىلىمدى دامىتۋ ءۇشىن بيىلعى جىلدىڭ باسىنان 374 جەر تەلىمىن مەملەكەت مۇقتاجىنا ساتىپ الۋ كوزدەلدى. بۇل جۇمىس تا ءوز رەتىمەن جۇرگىزىلىپ, قازىرگى تاڭدا 313 جەر تەلىمى ساتىپ الىندى. قالعان 61 تەلىمدى جىل سوڭىنا دەيىن ساتىپ الۋ جوسپارلاندى.
امانعالي قالجانوۆ
