بيىل قىستا قار ەرەكشە قالىڭ بولاتىن سياقتى. مىنە, قىس باستالعالى ايعا تامان ۋاقىت بولدى, اسپاننان جاپالاقتاپ جاۋعان قار, تولاستاسا ءبىر-ەكى-اق كۇن تولاستاعان شىعار, قايتادان توپەپ قويا بەرەدى. جەلتوقسان بويى اق تۇتەكتەن كوز اشپادىق. سوڭعى كۇندەرى ەلوردادا
«استانا تازالىق» جشس ماماندارىنىڭ مالىمدەۋىنشە, تەك 23-ىنەن 24-ىنە قاراعان ءتۇنى استانادا 24130 تەكشە مەتر قار شىعارىلعان (2011 رەيس). بۇل شاراعا 890 بىرلىك ارنايى تەحنيكا مەن 175 جۇمىسشى جۇمىلدىرىلعان.
23 جەلتوقسان كۇنى كۇندىز قارمەن كۇرەسۋگە 1115 بىرلىك ارنايى تەحنيكا مەن 1678 جول تازالاۋشى شىققان. جالپى قىس باستالعالى 1027518 تەكشە مەتر قار قالا سىرتىنا تاسىمالدانىپتى (85627 رەيس).
قاردىڭ قالىپتى جاعدايدان كوپ جاۋى قالا شارۋاشىلىقتارىنا دا, جەرگىلىكتى تۇرعىنداردىڭ تۇرمىس-تىرشىلىگىنە دە كوپ قولايسىزدىق تۋعىزادى. اكىمشىلىك اۋماقتاردا, جالپى پايدالانۋ ۋچاسكەلەرىندە قارمەن كۇرەس اتقارۋشى بيلىكتىڭ, ارنايى مەكەمەلەردىڭ ۇيىمداسقان كۇشىمەن جۇرگىزىلەدى. قاردىڭ قالىڭدىعى سونشالىق, كەي جەرلەردە ءتىپتى جارتى مەترگە جەتەر-جەتپەس. ارينە, قالانىڭ قار تازالاۋ قىزمەتىنە قاتىستى ايتىلىپ جاتقان سىن-ەسكەرتپەلەر از ەمەس, دەگەنمەن قار قانشا كوپ جاۋعانىمەن, جول قوزعالىسىنا ۋاقىتشا بوگەت بولعانىمەن, ول دەر كەزىندە تازالانىپ كەلەدى.
قاردىڭ كوپ جاۋعانى, اسىرەسە, جەر ءۇي تۇرعىندارىنىڭ زىقىسىن العان. «پوليانا» جەكەمەنشىك سەكتورىنىڭ تۇرعىنى سايلاۋباي ماقاشەۆ دەگەن اعامىز:
«قار قالىڭ. كۇندە, كەيدە ءتىپتى ەكى-ءۇش كۇن ۇزبەي جاۋادى. جۇمىستان كەلگەن سوڭ, 1-2 ساعات اۋلانىڭ قارىن تازالاماي ۇيگە كىرە المايمىن. ويتكەنى اۋلامىز تار, تازالانباسا تەز تولىپ قالادى, قاردى ۇيەتىن بوس ورنىمىز جوق. ونى ەرىكسىز جولعا شىعارامىز. تەك, ايتەۋىر, ونى ەرتەڭگە قالدىرماي شىعارىپ تاستاۋىمىز كەرەك. تاڭەرتەڭ جول تازالاۋشىلار ونى قوسا كۇرەپ اكەتەدى. ءسويتىپ امالداپ وتىرمىز» دەيدى.
