قازىرگى تاڭدا استانادا 22 ينۆاتاكسي اۆتوكولىگى مۇمكىندىگى شەكتەۋلى جاندارعا قىزمەت كورسەتەدى, ونىڭ 10-ى مۇگەدەك بالالارعا ارنالعان. الايدا ينۆاتاكسي قىزمەتىن پايدالانۋشىلار سانى كۇننەن كۇنگە ءوسىپ كەلەدى. وسىعان وراي, 2019 جىلى اتالعان تاكسي تۇرىنە مەملەكەتتىك تاپسىرىس كوبەيەدى. الدىن الا جاسالعان بولجام بويىنشا, 2019 جىلى مۇمكىندىگى شەكتەۋلى بالالارعا ارنالعان 3 ينۆاتاكسي اۆتوكولىگى ىسكە قوسىلادى.
مەنىڭ ۇستانىمىم- اشىق بايلانىس
كەشە استانا اكىمى باقىت سۇلتانوۆ dialog.egov.kz سايتىندا ونلاين-كونفەرەنتسيا وتكىزىپ, ەلوردا تۇرعىندارىن مازالاعان ساۋالدارعا جاۋاپ بەردى. سولاردىڭ ءبىر پاراسىن «استانا اقشامى» گازەتىنىڭ وقىرماندارىنىڭ نازارىنا ۇسىنىپ وتىرمىز.
ماريا گارەەۆا:
استانالىقتار بۇرىنعى اكىم اسەت يسەكەشەۆتىڭ الەۋمەتتىك جەلىلەردەگى تۇرعىنداردىڭ كوتەرگەن ماسەلەلەرىنە جەدەل ءۇن قاتۋىنا ۇيرەنىپ قالدى. ءسىز نەگە بەلسەندىلىك تانىتپايسىز؟ ءوزىڭىزدىڭ Facebook-تاعى جانە وزگە الەۋمەتتىك جەلىلەردەگى پاراقشالارىڭىزدى «تىرىلتپەيسىز» بە؟
– استانالىقتاردىڭ شاعىمى مەن قاجەتتىلىكتەرىنە جەدەل ءۇن قاتۋ جۇيەسى ساقتالىپ قانا قويماي, ودان ءارى كۇشەيەدى. ويتكەنى ەلوردالىقتارمەن اشىق بايلانىس جاساۋ – بۇل تەك ۋاقىتتىڭ عانا تالابى ەمەس, مەنىڭ دە ۇستانىمىم وسىنداي. اكىمدىك الداعى ۋاقىتتا حالىقپەن قارىم-قاتىناسىن شيراتا بەرەدى. مەن بوس ۋاقىتىم بولعاندا Facebook-ءتى جانە وزىمە كەلگەن بارلىق شاعىم, ۇسىنىستاردى وقيمىن.
سامال اقانوۆا, 2-توپتاعى مۇگەدەك:
قۇرمەتتى باقىت تۇرلىحانۇلى! اي سايىن كاليمين ءدارىسىن ءۇيىمنىڭ مەكەنجايى بويىنشا ەمحانادان الىپ تۇرۋشى ەدىم. بىراق وسى جىلدىڭ باسىنان بەرى دارىگەرلەر: «ءدارى جوق» دەپ جازىپ بەرمەي قويدى. مەن ول ءدارىنى كۇندەلىكتى قابىلدايمىن. سىزدەن وسىعان وراي كومەك سۇرايمىن.
– قۇرمەتتى سامال! كاليمين ءدارىسىن جەتكىزۋ بويىنشا ءبىرشاما قيىندىق بولعانى راس. بۇگىنگى تاڭدا ول ءدارى قالا ەمحانالارىندا بار.
سوندىقتان ءوزىڭىز تىركەلگەن ەمحاناعا نەمەسە قوعامدىق دەنساۋلىق ساقتاۋ باسقارماسىنا حابارلاسىڭىز. بايلانىس تەلەفونى: 556829 نەمەسە 1439 ءنومىرى ارقىلى تەگىن بەرىلەتىن ءدارى-دارمەكتەردىڭ ءتىزىمىن كورە الاسىز.
ەرلان ساكەنوۆ:
«نۇرلى جول» ۆوكزال كەشەنىنىڭ ەستاكاداسىنا جەكە اۆتوكولىكتى قويۋعا بولا ما جانە ءتاريفتىڭ وزگەرۋى جوسپارلانعان با؟ قىستىگۇنى ول جەردە اۆتوبۋستار كوكتايعاقتان شىعا المايدى.
– بۇل ماسەلە تولىق قاراستىرىلدى. اشىق بايقاۋ وتكىزىلىپ, ونى «استانا اۆتوتۇراقتار كەڭىستىگى» جشس جەڭىپ الدى. قازىرگى كەزدە ۆوكزالدىڭ اۋماعىندا جابدىقتار ورناتىلىپ, اۆتوتۇراقتاردىڭ ورىندارى سالىنۋدا. 2019 جىلدان باستاپ ەستاكاداعا ەكى جاعىنان كىرەتىن ەسىك اشىلادى. ال تاريفتەر كەلىسىلگەن سوڭ, اشىلاردىڭ الدىندا جاريالانادى. جەڭىلدىگى بار ازاماتتار ۆوكزالدىڭ اۆتوتۇراعىن الەۋمەتتىك جاعدايىنا سايكەس پايدالانا الادى.
ماريا گارەەۆا:
ەلورداداعى «ءابۋ-دابي پلازا» عيماراتىنىڭ قۇرىلىسى قاشان اياقتالادى؟
– ەڭ الدىمەن, 2019 جىلدىڭ 30 قازانىندا «ءابۋ-دابي پلازا»-نىڭ جانىنداعى ساۋدا ورتالىعىنىڭ, 30 جەلتوقسانىندا قوناقۇي كەشەنىنىڭ قۇرىلىسى اياقتالادى. ال عيماراتتاعى تۇرعىن ءۇي كەشەنى 2020 جىلى 30 قاڭتاردا سالىنىپ بىتەدى. ءبىرىنشى جانە ەكىنشى كەڭسەلىك عيماراتتاردىڭ قۇرىلىسى 2020 جىلى 1-31 قاڭتارىندا اياقتالادى. ال ەڭ بيىك كوپبەيىندىك كەشەن 2020 جىلى 30 ماۋسىمدا پايدالانۋعا بەرىلەدى.
ەرلان ساكەنوۆ:
«Astana Mall» ساۋدا-ساتتىق جانە ويىن-ساۋىق ورتالىعىنىڭ ارتىنا نە سالىنادى؟ بۇل اۋماق كوپتەن بەرى بوس جاتىر.
– تاۋەلسىزدىك داڭعىلى, ب.مايلين كوشەسى, م.جۇماباەۆ پەن ب.مومىشۇلى داڭعىلدارى شەكارالارىنىڭ اۋماعىن ەگجەي-تەگجەيلى جوسپارلاۋ جوباسىنا سايكەس, «Astana Mall» ساۋدا, ويىن-ساۋىق ورتالىعىنىڭ ارتىنا كەلەسى نىسانداردى سالۋ جوسپارلانىپ وتىر: قوسىمشا عيماراتتارى مەن پاركينگى بار كوپپاتەرلى تۇرعىن ءۇي كەشەندەرى, 1200 وقۋشىعا ارنالعان جالپى ءبىلىم بەرەتىن مەكتەپ, مەكتەپكە دەيىنگى ءبىلىم بەرۋ نىساندارى, قىزمەت كورسەتۋ نىساندارى, كوممەرتسيالىق عيماراتتار مەن اۆتوتۇراعى بار تۇرعىن ءۇي كەشەندەرى, بالالار ورتالىعى, سپورت كەشەنى.
ايگۇل مىڭجاسار:
استانادا قوعامدىق كولىكتە ەلەكتروندى ەسەپ-ايىرىسۋ جاپپاي ەنگىزىلگەلى بەرى اۆتوبۋستار جولاۋشىلاردى تەك الدىڭعى ەسىكتەن كىرگىزىپ, كوپ جاعدايدا جۇرگىزۋشىلەر جولاۋشىلاردىڭ ۆاليداتسيا جاساۋىن قاداعالايتىن بولدى. بۇل قوعامدىق كولىك جۇرگىزۋشىسىن نەگىزگى قىزمەتىنەن الاڭداتىپ, قاۋىپتى جاعدايلارعا سەبەپ بولۋى مۇمكىن. سونداي-اق كەيبىر اۆتوبۋستاردا جۇرگىزۋشىدەن بولەك تاعى ءبىر قىزمەتكەر جۇمىس ىستەيدى, ولاردىڭ قىزمەتى ءار جولاۋشىدان «ۆاليداتسيا جاسادىڭىز با؟» دەپ سۇراۋ جانە سالوندا ءارى-بەرى جولاۋشىلاردىڭ مازاسىن الىپ ءجۇرۋ عانا. ال كەرىسىنشە «KBD» دەگەن جازۋى بار جيلەت كيگەن قىزمەتكەرلەردىڭ ەشقانداي باقىلاۋ-تەكسەرۋ جۇمىستارىن جۇرگىزبەي, جىلى ايالدامالاردا جىلىنىپ تۇراتىندارىن عانا كورىپ ءجۇرمىز. ەگەر تەكسەرۋ-باقىلاۋ جۇمىستارى كۇشەيتىلسە, اقى تولەمەيتىن جولاۋشىلار ازايىپ, سالوندا ارتىق قىزمەتكەردىڭ قاجەتى بولماس ەدى.
– استانا قالاسىنىڭ «استانا LRT» جشس قىزمەتكەرلەرى كۇندەلىكتى قوعامدىق كولىكتىك باعىتتاردا جۇرگىزىلەتىن مونيتورينگ بارىسىندا تولەم جاساۋدان باس تارتقان 5 736 ازاماتتى انىقتادى. ولار ىشكى ىستەر ورگاندارى قىزمەتكەرلەرىمەن كودەكستىڭ 622-بابىنىڭ 2-بولىمىنە سايكەس 27 ملن-نان استام تەڭگەگە اكىمشىلىك جاۋاپكەرشىلىككە تارتىلدى.
ارشات ورازوۆ:
قايىرلى كۇن! سىزگە قالاداعى تاكسيلەرگە قاتىستى سۇراق قويعىم كەلەدى. 3 بالام بار, بىرەۋى مۇگەدەك. كۇن سايىن ارنايى بالاباقشاعا جانە باسقا دا ورتالىقتارعا اپارىپ تۇرامىز. قالادا ينۆاتاكسي قىزمەتى بار, ول تەگىن, بىراق سۇرانىس كوپ بولعاندىقتان, ينۆاتاكسي بارىنە جەتە بەرمەيدى. ينۆاتاكسي سانىن كوبەيتسەڭىزدەر. Bus Lane ارقىلى جۇرە بەرەتىن استانا تاكسي قىزمەتى قىمباتتاۋ. «ياندەكس-تاكسي» سياقتى جەكە تاكسي تۇرلەرى سۇرانىس كوپ ساعاتتاردا تىم قىمبات اقى سۇرايدى. بالكىم, مەملەكەت تاراپىنان قاراپايىم تۇرعىندارعا قولجەتىمدى تاكسي قىزمەتىن قوسۋ كەرەك بولار؟
– جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتى بويىنشا, قازىرگى تاڭدا استانا قالاسى بويىنشا 22 ينۆاتاكسي اۆتوكولىگىمەن مۇمكىندىگى شەكتەۋلى جاندارعا قىزمەت كورسەتۋدە, ونىڭ 10-ى مۇگەدەك بالالارعا ارنالعان. بۇل ماقساتقا مەملەكەتتىك بيۋدجەتتەن 2018 جىلى 115 841 مىڭ تەڭگە قارجى ءبولىندى. ينۆاتاكسي قىزمەتىن پايدالانۋشىلار سانىنىڭ كۇننەن كۇنگە كوبەيۋىنە بايلانىستى جانە قىزمەت الۋشىلار تاراپىنان ءتۇسىپ جاتقان وتىنىشتەرىن ەسكەرە وتىرىپ, جوعارىدا اتالىپ وتكەن باسقارما تاراپىنان 2019 جىلعا ينۆاتاكسي قىزمەتىنە مەملەكەتتىك تاپسىرىستى ارتتىرۋ بويىنشا ءتيىستى بيۋدجەتتىك ءوتىنىم بەرىلگەندىگى تۋرالى حابارلايمىن. الدىن الا جاسالعان بولجام بويىنشا, 2019 جىلى مۇمكىندىگى شەكتەۋلى بالالارعا ارنالعان 3 ينۆاتاكسي اۆتوكولىك قوسىلاتىن بولادى.
ەرلان ساكەنوۆ:
تاۋەلسىزدىك داڭعىلىنان كەرەي-جانىبەك حاندار كوشەسىنە دەيىنگى كوپىر قاشان تاپسىرىلادى؟ ۇلى دالا كوشەسىنەن ۆوكزالعا دەيىن اپاراتىن كوپىردىڭ قۇرىلىسى قاشان بىتەدى؟
– بۇگىنگە دەيىن تاۋەلسىزدىك داڭعىلىنداعى كوپىردىڭ جوبالاۋ جۇمىستارى اياقتالدى. قۇرىلىستىڭ باستالۋى 2019 جىلعا جوسپارلانعان. ول نىسان 2020 جىلى تولىق سالىنىپ, پايدالانۋعا بەرىلەدى. سونىمەن قاتار, قازىر ۇلى دالا داڭعىلىنىڭ تاۋەلسىزدىكتەن ش. قالداياقوۆ كوشەسىنە دەيىنگى بولىگىندە كوپىر قۇرىلىسىنىڭ جوباسى جۇزەگە اسىرىلۋدا. بۇل جوبا دا 2019 جىلى اياقتالىپ, نىساندار پايدالانۋعا بەرىلەدى.
ەرلان ساكەنوۆ:
قايىرلى كۇن! LRT قۇرىلىسىنىڭ ەكىنشى جەلىسىنىڭ باعدارى قانداي بولادى؟ بۇل قۇرىلىستىڭ ەكىنشى كەزەڭىن قاي جەردەن كورە الامىز؟ مينيسترلىكتەر ءۇيىنىڭ جانىندا LRT-نىڭ ستانساسى بولا ما؟
– بۇگىنگى تاڭدا LRT قۇرىلىسىنىڭ 2-جەلىسىنىڭ باعدارى ءالى بەكىتىلگەن جوق. وسى جۇمىس بويىنشا تەحنيكا-ەكونوميكالىق نەگىزدەمە دايىنداۋعا كونكۋرستىق شارالار جۇرگىزىلۋدە. تەن ناتيجەسى بويىنشا, ەكىنشى كەزەڭنىڭ باعدارى مەن ستانسالارى بەلگىلى بولادى. مينيسترلىكتەر ءۇيىنىڭ جانىندا 113-ستانسانى سالۋ جوسپارلانعان. ونىڭ جولى مەن قۇنى تەن دايىندالعان سوڭ انىقتالادى. ءبىرىنشى كەزەڭنىڭ جوبالارى اياسىندا مينيسترلىكتەر ءۇيىنىڭ ماڭىنان ماڭگىلىك ەل جانە سىعاناق كوشەلەرىنىڭ قيىلىسىندا ستانسا سالۋ جوسپارلاندى. قازىر وسى ستانسانىڭ قازىعىن قاعۋ جۇمىستارى ءجۇرىپ جاتىر.
