پارلامەنت ءماجىلىسىنىڭ دەپۋتاتى يۋري لي «Elorda Aqparat» مەدياحولدينگى تىلشىلەرىمەن قازىرگى قوعامداعى وزەكتى ماسەلەلەردى تالقىلادى.
– جاقىن ۋاقىتتا ءبىز ءۇش جوبانى جۇزەگە اسىرۋدى جوسپارلاپ وتىرمىز. ءبىرىنشى جوبا قارجىلىق الاياقتىقپەن كۇرەسكە باعىتتالعان. سايت stop-piramida.kz دەپ اتالادى. ءبىز ونى قاڭتاردا ىسكە قوسامىز. ەكىنشى سايت نەسيە نارىعىنداعى قارجىلىق قىزمەتتەردى تۇتىنۋشىلاردىڭ قۇقىعىن قورعاۋعا ارنالعان. ال ءۇشىنشى جوبامىز ەلەكتروندى ساۋدا سالاسىنداعى تۇتىنۋشىلاردىڭ قۇقىعىن قورعاۋدى كوزدەيدى, – دەدى يۋ.لي.
مۇنىمەن قوسا ول حالىقتىڭ قارجىلاي ساۋاتىن ارتتىرۋدا باق-تىڭ ءرولى زور ەكەنىنە ەرەكشە توقتالدى. «وزگەنىڭ اتىنان نەسيە راسىمدەيتىن الاياقتار جايلى كوپ ەستىپ ءجۇرمىز. سولاردىڭ كوپشىلىگىن الىپ قاراساق, سونداي وقيعاعا كەزىككەن ادامداردىڭ قارجىلىق ساۋاتى تومەن ەكەنىن بايقايمىز. ايتپەسە ادەتتە نەسيە راسىمدەردە ادامنىڭ جەكە ۇيالى تەلەفونىنا كود جىبەرۋ, ساۋساق تاڭباسىن سۇراۋ, قۇجاتتى جۇكتەۋ دەگەن سياقتى راسىمدەردى ورىنداۋ تالاپ ەتىلەدى. ەگەر ءوزىنىڭ ارەكەتىنە جاۋاپكەرشىلىك الىپ, اقپاراتتىڭ شىن نە جالعان ەكەنىن تەكسەرىپ, كوز جەتكىزەر بولسا, مۇنداي وكىنىشتى جاعدايلار ازىراق بولار ەدى. وسى تۇستا سىزدەردىڭ, ياعني باق-تىڭ حالىقتى قارجىلىق ساۋاتتىلىققا شاقىرۋدا, كوزىن اشۋدا ءرولى ۇلكەن دەپ بىلەمىن» دەدى يۋري لي.
ءسوز كەزەگىندە ەلوردالىق ىشكى ساياسات باسقارماسىنىڭ باسشىسى داۋرەن بابامۇراتوۆ بۇل پىكىردى قوستادى. «باسىلىمدارىمىز بۇل ماسەلەگە تەرەڭىرەك نازار اۋداراتىن بولادى. حالىقتىڭ قارجىلىق ساۋاتىن ارتتىرۋدا ءبىزدىڭ رەداكتسيالار وقىرماندارعا دۇرىس باعىت بەرىپ وتىرۋى كەرەك» دەپ قورىتىندىلادى ول.
سونداي-اق باسقوسۋ بارىسىندا ءماجىلىس دەپۋتاتى «استانا اقشامى» جانە «ۆەچەرنيايا استانا» گازەتتەرىنىڭ تىلشىلەرى ازىرلەگەن ەل تاۋەلسىزدىگىنىڭ 30 جىلدىعىنا ارنالعان «Nur-Sultan – تاۋەلسىزدىك تۇمارى» – «نۋر-سۋلتان – سيمۆول نەزاۆيسيموستي» اتتى جاڭا كىتاپپەن تانىستى.
