كەزىندە م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ارميال تاسىمبەكوۆ پەن قاليحان ىسقاقتىڭ «كەبەنەك كيگەن ارۋلار» اتتى قاسىرەتناماسى قويىلدى. بولات اتاباەۆ ساحنالاعان بۇل سپەكتاكلدە «حالىق جاۋى» اتانعان ارداقتىلارىمىزدىڭ الجير-گە تۇسكەن جارلارىنىڭ قاپاستاعى ءومىرى, تۇتقىن ايەلدەر تاعدىرى كورسەتىلگەن. وسى تاقىرىپتاس تۋىندى ەلوردا ساحناسىنا جول تارتتى. نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترى الجير قۇرباندارىنىڭ رۋحىنا ارناپ «شانەل №5» دەرەكتى دراماسىنىڭ پرەمەراسىن ۇسىندى. پەسا اۆتورى – ءمادينا وماروۆا, قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى اسحات ماەميروۆ.
الجير تۇتقىندارى اراسىندا ءارتۇرلى ۇلتتان شىققان ايەلدەر بولعانى بەلگىلى. بۇل تاقىرىپ, ءتىپتى, ەل اۋقىمىنان شىعىپ, شەتەلدە ساحنالاندى. بىرنەشە جىل بۇرىن تبيليسيدەگى ا.گريبوەدوۆ اتىنداعى مەملەكەتتىك اكادەميالىق ورىس دراما تەاترى الجير-دەگى گرۋزين ايەلدەر تاعدىرىن ارقاۋ ەتكەن سپەكتاكل قويىپ, قازاقستانعا اكەلىپ كورسەتتى.
ەلوردانىڭ مۋزىكالىق جاس كورەرمەن تەاترى قويىلىمىن دا حالىقارالىق جوبا دەپ اتاساق بولادى. ماسەلەن, ستسەنوگرافياسىن گرۋزيادان شاقىرىلعان حالىقارالىق تەاتر فەستيۆالدەرىنىڭ لاۋرەاتى تامري وحيكياني جاسادى. گرۋزيالىق شەبەر كوستيۋم سۋرەتشىسى دە بولدى. ال دراما كەيىپكەرلەرىنىڭ ءبىرى – جازۋشى بوريس پيلنياكتىڭ جارى بولعان ايگىلى گرۋزين اكتريساسى كيرا اندروننيكاشۆيلي.
سپەكتاكلگە فرانتسيانىڭ ايەلدەرگە ارنالعان اتاقتى ءيىسسۋى «شانەل №5» اتاۋىنىڭ بەرىلۋىندە دە ءمان بار. قويىلىم رەجيسسەرى تاريحتى سويلەتۋمەن قاتار قاپاستاعى ايەلدەردىڭ جان دۇنيەسىن كورسەتۋگە تىرىستى. ال ايەل – قاشان دا ايەل. ادەمى كيىنۋدى, جۇپار اڭقىپ ءجۇرۋدى قالايدى. ونىڭ ۇستىنە الجير-دە, نەگىزىنەن, قاراپايىم ايەلدەر ەمەس, ونەر ادامدارى دا كوپ بولدى. اتاپ ايتقاندا, قايراتكەر دەڭگەيىنە كوتەرىلگەن تەاتر رەجيسسەرى, قىرقىنشى جىلدارى الماتىدا جاس كورەرمەن تەاترىنىڭ قۇرىلۋىنا مۇرىندىق بولعان, قازىر سول تەاتر ءوزىنىڭ اتىن يەلەنگەن ناتاليا ساتس, اكتريسا راحيل مەسسەرەر-پليسەتسكايا, جۇمات ءشانيننىڭ جارى, اكتريسا جانبيكە شانينا الجير-ءدىڭ بىلامىعىن تاتتى. سپەكتاكلگە فرانتسۋز اكتريساسى جيۋلەت بەينەسى دە ەنگىزىلدى. جالپى قويىلىمنان ارداقتىلارىمىزدىڭ جارلارىمەن قاتار ورىس, سەرب ايەلدەرىن دە كورەمىز.
ال سپەكتاكلدە جەتەكشى ورىن بەيىمبەت ءمايليننىڭ جارى گۇلجامال مايليناعا بەرىلدى. بۇل كەيىپكەردى بەلگىلى اكتريسا, قازاقستاننىڭ ەڭبەك سىڭىرگەن قايراتكەرى سامال ەسلياموۆا سومدادى. وندا قورلىققا شىداماي, لاگەر باستىعىنىڭ ورىنباسارى يۋري ۋزيپەنكوعا (اكتەر ەرنازار جاڭاتىلەك) ايىر الىپ جۇگىرگەن وجەت گۇلجامالدى كورەمىز.
بىراق الجير باستىقتارىنىڭ ءبارى جاۋىز ەمەس ەدى. ماسەلەن, 1939-1953 جىلدارى لاگەر باستىعى بولعان سەرگەي بارينوۆ (ازات مىڭباەۆ) – جاعىمدى كەيىپكەر. ول تۇتقىن ايەلدەرگە جاناشىرلىق تانىتىپ, ءتىپتى ءوزىنىڭ ورىنباسارىمەن سوزگە كەلىپ قالا بەرەدى.
قويىلىمدا گۇلجامال مايلينامەن قاتار دامەش ەرمەكوۆا-جۇرگەنوۆا (ينابات ريزابەكوۆا), گۇلباحرام سەيفۋللينا (نۇراي رىسبەكوۆا), ايشا قۇلىمبەتوۆا (ديانا تۇرجانوۆا), كۇلاندام قوجانوۆا (شىنار قالدىباي) سەكىلدى كەيىپكەرلەر قامتىلعان. بۇل – تەمىربەك جۇرگەنوۆ, ساكەن سەيفۋللين, ۇزاقباي قۇلىمبەتوۆ, سۇلتانبەك قوجانوۆ سىندى قۋعىن-سۇرگىنگە ۇشىراعان اسىلدارىمىزدىڭ جارلارى.
سپەكتاكلدە بەيىمبەت مايلين (قازىبەك ەسقارا), تەمىربەك جۇرگەنوۆ (سالامات مۇقاشەۆ), جۇمات شانين (راسۋل ۋسمانوۆ) ەلەستەرى دە كورىنەدى. قويىلىمعا ادەتتەگىدەي اكتەرلەردىڭ ەكى قۇرامى تارتىلدى. ءبىز ءبىرىنشى قۇرامدا ويناعانداردى اتاپ وتتىك. مۇنىمەن قوسا, ەلورداداعى اباي قۇنانبايۇلى اتىنداعى №87 مەكتەپ-گيمنازيا وقۋشىلارى قاتىستى.
پرەمەرا بەس كۇن بويى ءجۇردى. ونى فرانتسيانىڭ قازاقستانداعى توتەنشە جانە وكىلەتتى ەلشىسى ديدە كاننەس, بەيىمبەت ءمايليننىڭ ۇرپاقتارى ارنايى كەلىپ تاماشالادى.
