جاڭا جىلدىڭ باستى كەيىپكەرلەرى: ەۋروپالىق – سانتا كلاۋس, پولشانىڭ – قاسيەتتى سيلۆەسترى, كولۋمبيالىق – پاپا پاسكۋالە, فرانتسۋز – پەر نوەل, فينليانديالىق – يەلوۋپۋككي, ورىستىڭ – دەد موروزى.
ەل تاۋەلسىزدىگى مەرەكەسى باستالماي جاتىپ, ءۇي-ءۇيدى, كەڭسەلەردىڭ ەسىگىنە جاڭا جىلدىڭ بەلگىلەرىن, جالتىراۋىق قاعازدارىن جاپسىرىپ ۇلگەردى. ءبىزدىڭ كەڭسەنىڭ كەڭ دالىزىندە دە تابالدىرىقتان باستاپ اياز اتانى مۇرنىنا ءتىزىپ ءىلىپ قويدى. مۇمكىن از ايلىعىن شايلىعىنا جەتكىزە الماي جۇرگەن جۋرناليستەردىڭ مەرەكەلىك كوڭىل-كۇيىن كوتەرگىسى كەلگەن بولار. راحمەت. بىراق, وسى بەينەلەر كوبىمىزگە جىلۋلىق سىيلامايتىن, الىستاپ كەتكەن بوتەن بەينەدەي. ءتىپتى, قاجەتى جوق قيسىنسىز كورىنەدى. ويتكەنى مىسقىلداپ بولسا دا ءوزىمىزدىڭ بولمىسىمىزعا ورالىپ جاتىرمىز, بۇگىندە بالانى دا, شاعانى دا كورشى ەلدىڭ اتاسىمەن الداي المايمىز. جاقسىلىقتى ودان ەمەس, جاراتۋشىدان تىلەيمىز. ەكى بەتى نارتتاي جانىپ, مۇرنى اراق ءىشىپ العانداي قىزارا ءبورتىپ تۇرعان بەينەدەن كىنارات تا ىزدەيمىز…
ەندەشە, جاڭا جىلدىڭ سيمۆولىن ويلاپ تاپپاساق تا, جىلدىڭ باسىندا باسقا اتانى نەگە تىقپالاي بەرەمىز؟
راس, كەز كەلگەن حالىق ءۇشىن جاڭا جىل – ادامدار ءومىر سۇرگەن 365 كۇنگە قاراپ, ءوز ومىرلەرىنە باعا بەرىپ, بولاشاققا جوسپارلارىن قۇرىپ, اسىل مۇراتىن بەلگىلەيدى. ادام ءۇمىتتى پەندە عوي, كەلەر كۇن, جاڭا جىل وزىنە جانە جاقىندارىنا جاقسىلىق پەن مەيىرىمدىلىك اكەلەدى دەپ كۇتەدى. ءار ادام قيىنشىلىقتار مەن قيىندىقتاردى ارتقا تاستاپ, بولاشاققا سەنىممەن قاراعىسى كەلەدى. 31 جەلتوقساندا ءبىز ەسكى جىلدى شىعارىپ سالامىز, ءتۇن ورتاسىندا ءبىز ءۇشىن جاڭا جىل باستالادى. بار بولعانى سول عانا.
بارلىق ەۋروپا ەلدەرى جاڭا جىلدى ريمدىكتەردەن الىنعان ءداستۇر بويىنشا 1 قاڭتاردا تويلايدى. بىراق ارقاشان ولاي بولعان جوق قوي. ءار حالىق ءار مەزگىلدە جاڭا جىلىن اتاپ ءوتتى. ءبىز ءۇشىن ناۋرىز دا – جاڭا جىلدىڭ بەلگىسى. ونى دا قارسى الۋدىڭ وزىندىك قالىپتاسقان ءداستۇرى بار. ءمانى مەن ماعىناسى دا بولەك. ءدال وسىلاي, ءبىر جىلدى ارتقا سالعان 1 قاڭتاردىڭ ماعىناسى ادام ءۇشىن نىسانالى.
ەل تاۋەلسىزدىگىنە تاقالا باستالاتىن جاڭا جىلدى قازاق حالقى قالاي قارسى الۋ كەرەك دەگەن سۇراق تۋىنداماسى انىق. بارشا عالامنىڭ ادامدارىنداي اركىم ءوزى بىلەدى. ال جاڭا جىلعا دايىندىق, مەرەكەگە ازىرلەنۋ, قالا بەردى رەسمي شىرشالاردى بەزەندىرۋ ورتاق تالاپقا ساي بولعانى ءجون. بۇرىنعى ءداستۇرلى جىلتىراق ويىنشىق پەن جارقىلداعان ءتۇرلى-ءتۇستى شامداردى, باسقا دا اتريبۋتتارىن جوققا شىعارۋ كۇلكىلى دە بولار. الايدا وسى قىزىلدى-جاسىلدى دۇنيەنىڭ ورتاسىندا ءوز ەلىمىزدىڭ بەلگىسىندەي, ءارى مەرەكەلىك شارالارعا شاقتاپ جاسالعان كوك تۋىمىزبەن, باسقا دا ەلورداسىنىڭ, ءىرى قالالارىمىزدىڭ ماڭىزدى نىساندارىمەن كومكەرىلگەن جالاۋشالارمەن بەزەندىرۋگە بولماي ما؟
بۇلاي جاساۋ ءۇشىن قىرۋار قاراجات كەرەك بولماس. ەسەسىنە, ەل ەگەمەندىگىمەن ىلەسە كەلەتىن جاڭا جىلعا توسىرقاي قارامايمىز, كوك تۋىمىز جۇرەگىمىزدى جىلىتىپ, كەلەر جىلدىڭ اق جارىلقاپ جاقسىلىعىنا دايىن بولىپ, جارقىراي قارسى الامىز!
