استانا قىسى بيىل دا بىلتىرعىداي قارعا قارىق قىلعالى تۇر. دەمالىس كۇندەرى ءبىر تىنباستان جاپالاقتاپ جاۋعان اق ۇلپا ەلوردانى قالىڭ قۇشاعىنا الدى. كوممۋنالدىق قىزمەتتەردىڭ كۇشەيتىلگەن رەجيمدە جۇمىس ىستەۋىنىڭ ارقاسىندا تەك وتكەن ءبىر تاۋلىكتە عانا قالا اۋماعىنان 72 مىڭ تەكشە مەتر قار شىعارىلدى. وعان 1 مىڭنان اسا تەحنيكا مەن 250-گە جۋىق ادام جۇمىلدىرىلدى.
ال كەشە نۇر-سۇلتان قالاسىنىڭ 4 اۋدانى بويىنشا 1 315 تەحنيكا مەن 2 مىڭعا جۋىق جۇمىسشى جول مەن اۋلالاردى قاردان تازالاۋعا شىقتى. شاھاردى قاردان ارشۋدىڭ قاربالاسى نەگىزىنەن ەل اياعى باسىلعان تۇنگى ۋاقىتتاردا باستالادى. سەبەبى جول تازالاۋشىلار كۇندىز ءارلى-بەرلى جۇرەتىن جۇرگىنشىلەرگە, كولىكتەرگە كەدەرگى كەلتىرمەۋگە تىرىسادى.
بۇل كۇندىز قار تازالاۋ جۇمىستارى ۇيىمداستىرىلمايدى دەگەن ءسوز ەمەس. كۇندىزگى اۋىسىم تاڭعى التىدا باستالىپ, كەشكى ساعات بەسكە دەيىن جالعاسادى. ەكىنشى اۋىسىمداعىلار قىزمەتىنە تۇنگى ۋاقىتتا كىرىسەدى.
– كۇندىز جۇمىس ىستەۋگە كولىكتەر كەدەرگى جاسايدى. بىراق قار تازالاپ جۇرگەن ءبىز دە ولارعا كەدەرگى جاسايمىز. جولدارىن جابامىز. ارينە, مۇنىڭ ءبارىن ەرىككەننەن ەمەس, ەرىكسىزدىكتەن, جولداردىڭ تازالىعى ءۇشىن جاسايمىز. وسىعان بايلانىستى كولىك جۇرگىزۋشىلەر تەمىر تۇلپارىن جول جيەگىنە قالدىرماۋ كەرەك ەكەنىن ەسكەرتەمىز, – دەيدى «استانا تازالىق» جشس قىزمەتكەرى دارحان يبراەۆ.
قازىر ەلوردانىڭ كوممۋنالدىق قىزمەتى قار جيناۋ جۇمىستارىن كۇشەيتىلگەن رەجيمدە جالعاستىرۋدا.
ءبىرىنشى كەزەكتە ەرەجە بويىنشا, كەپتەلىس بولماۋى ءۇشىن كولىك قوزعالىسى وتە كوپ جەرلەر تازارتىلادى. وندا دا قاۋىپسىزدىك ءۇشىن الدىمەن ماگيسترالدار مەن كوشەلەردىڭ – ءور جانە ەڭىس جولدارى, شۇعىل بۇرىلىستارى, كوپىرلەر, توننەلدەر, كوشە قيىلىستارىنداعى جانە قوعامدىق كولىك ايالدامالارىنداعى تەجەۋ الاڭدارى تازالانادى. ودان ءارى ورتاشا قوزعالىس ۋچاسكەلەرى – الاڭدار, ۆوكزال ماڭىنداعى اۋماقتار اق ۇلپادان ارشىلادى.
قالا جولدارىنىڭ جاياۋ جۇرەتىن بولىگى تايعاققا قارسى ماتەريالدارمەن وڭدەلەدى, ول قار جاۋا باستاعاننان باستاپ سەبىلەدى. ەگەر ءبىرىنشى تسيكل اياقتالعاننان كەيىن قار جاۋا بەرسە, قاجەتتى جۇمىستار قايتالانا بەرەدى.
جينالعان قار قالانىڭ بارلىق اۋداندارىندا ورنالاسقان 11 پوليگونعا تاسىمالدانادى. پوليگونداردا باقىلاۋعا ارنالعان فوتو-بەينەكامەرالار ورناتىلعان.
