جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن تۇرعىن ءۇي ءۇشىن قۇجات قابىلداۋ ەلوردادا 1 جەلتوقساندا باستالىپ, 6 جەلتوقسانعا دەيىن جالعاسادى. بۇل تۋرالى بريفينگ بارىسىندا نۇر-سۇلتان قالالىق جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك مالىمدەدى.
– بيىل جۇمىس ىستەيتىن جاستارعا 350 پاتەر بەرۋ جوسپارلانىپ وتىر. بۇل تۇرعىن ءۇي باعدارلاماسىنىڭ ماقساتى – جاستاردى ىنتالاندىرۋ جانە بەس جىل ىشىندە جەكە ءۇي ساتىپ الۋعا قاراجات جيناۋعا جاعداي جاساۋ. ەلوردانىڭ تۇرعىن ءۇي قورىنا قۇجاتتار جەلتوقساننىڭ 1-نەن 6-نا دەيىن قابىلدانادى. بارلىق جاستاردى وسىعان قاتىسۋعا شاقىرامىز, – دەدى ەلوردالىق جاستار ساياساتى ماسەلەلەرى باسقارماسىنىڭ باسشىسى.
جالعا بەرىلەتىن پاتەرلەر ورنالاسقان ۇيلەر ر.قوشقارباەۆ داڭعىلى مەن قورداي داڭعىلىنىڭ قيىلىسىندا, سونداي-اق ابىلاي حان مەن ب.مومىشۇلى داڭعىلىندا ورنالاسقان. تۇرعىن ءۇيدىڭ اۋدانى 31-دەن 47 شارشى مەترگە دەيىن. اي سايىنعى جالداۋ قۇنى 5000-نان 15000 تەڭگەگە دەيىن. جالعا الۋ مەرزىمى – بەس جىل.
باعدارلاماعا قاتىسۋ ءۇشىن ونىڭ شارتتارىن ورىنداۋ قاجەت. جالعا بەرىلەتىن تۇرعىن ءۇي الۋعا سوڭعى ەكى جىلدا مەنشىك قۇقىعىندا تۇرعىن ءۇيى بولماعان, 29 جاسقا دەيىنگى قازاقستان ازاماتتارى ءوتىنىش بەرە الادى. سونىمەن قاتار ەرلى-زايىپتىلار مەن ولاردىڭ بالالارىنىڭ مەنشتسىك مۇلكى بولماۋى ءتيىس. وعان قوسا كەيىنگى ەكى جىل قالادا تۇراقتى تۇرعاندىعى جونىندە تىركەلىمى بولۋى شارت. ءوتىنىش بەرۋشىلەردىڭ رەسمي كىرىسى 40 اەك نەمەسە سوڭعى التى ايدا 111 120 تەڭگەنى قۇراۋى كەرەك.
