AMANAT پارتياسىنىڭ توراعاسى ەرلان قوشانوۆ قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ بويىنشا رەفەرەندۋم وتكىزۋدى قولداۋ ماقساتىندا بەينەكونفەرەنتسيا بايلانىسى ارقىلى رەسپۋبليكالىق پارتيالىق شتابتىڭ كەزەكتى وتىرىسىن وتكىزدى. وتىرىستا كاسىپورىندار ۇجىمدارى مەن ەل تۇرعىندارى اراسىندا ءتۇسىندىرۋ جۇمىستارىنىڭ بارىسى تالقىلاندى. كەزدەسۋ بارىسىندا تۇرعىندار تاراپىنان كوتەرىلەتىن ماسەلەلەر تالقىلاندى. ەرلان قوشانوۆ بۇل ماسەلەگە ەرەكشە نازار اۋداردى.
ۇگىت ناۋقانى باستالعاننان بەرى اماناتتىقتار 5 مىڭنان استام ءىس-شارا وتكىزگەن. اتاپ ايتقاندا, ەڭبەك ۇجىمدارىمەن, ءبىلىم بەرۋ, دەنساۋلىق ساقتاۋ, مادەنيەت, اۋىل شارۋاشىلىعى جانە باسقا دا سالا وكىلدەرىمەن كەزدەسۋلەر ءوتتى. سونىڭ ىشىندە ماجىلىستەگى پارتيا فراكتسياسىنىڭ مۇشەلەرى وڭىرلەردىڭ تۇرعىندارىمەن ءبىر مىڭعا جۋىق كەزدەسۋ وتكىزگەن. جالپى, ۇگىت-ناسيحات ءىس-شارالارىنا 220 مىڭنان استام ادام قاتىسىپتى.
«AMANAT پارتياسىنىڭ رەفەرەندۋم وتكىزۋدى قولداۋ ۇگىت ناۋقانى جالعاسىپ جاتىر. قارقىندى تومەندەتپەۋ كەرەك. وتكىزىلەتىن كەزدەسۋلەردىڭ سانىنا عانا ەمەس, ءبىرىنشى كەزەكتە ساپاسىنا دا نازار اۋدارعان ءجون. ءبىز كونستيتۋتسيالىق وزگەرىستەردىڭ ءمانىن تۇسىنىكتى, قاراپايىم تىلمەن جەتكىزۋىمىز قاجەت. ادامداردى ۋچاسكەلەرگە كەلىپ, ءوز داۋىسىن بەرۋگە ىنتالاندىرۋىمىز كەرەك» دەدى پارتيا توراعاسى.
ەرلان قوشانوۆ قازىرگى ۋاقىتتا 5 ماۋسىمدا وتەتىن رەفەرەندۋمدا ازاماتتاردى داۋىس بەرۋگە شاقىرۋ ءۇشىن بارلىق رەسۋرستى جۇمىلدىرۋ وتە ماڭىزدى ەكەنىنە توقتالدى. ول جيىن سوڭىندا ۇگىت-ناسيحات جۇمىستارىن جانداندىرۋعا قاتىستى بىرقاتار ناقتى تاپسىرمالار بەردى.
