كونستيتۋتسيالىق رەفورمالاردى حالىققا ءتۇسىندىرۋ ماقساتىندا نۇر-سۇلتان قالاسى قوعامدىق كەڭەسىنىڭ توراعاسى زۇلفۋحار عايىپوۆ ەلوردالىق مادەنيەت قىزمەتكەرلەرىمەن كەزدەسۋ وتكىزدى. نۇر-سۇلتان قالاسىنىڭ بىرلەسكەن مۇراجايلار ديرەكتسياسىنىڭ كونفەرەنتسيا زالىندا «جاڭا قازاقستانداعى قوعامدىق-ساياسي بەلسەندىلىك جانە پەرسپەكتيۆالىق مۇمكىندىكتەر» دەگەن تاقىرىپپەن وتكەن دوڭگەلەك ۇستەلدە الداعى ساياسي ناۋقاننىڭ ءمان-ماڭىزى باياندالىپ, ورتاعا تۇسكەن وزەكتى سۇراقتارعا جاۋاپ قايتارىلدى.
بيلىكتىڭ ءۇش تارماعىن ءوزارا ۇيلەستىرۋدىڭ كوكەيكەستىلىگىنە توقتالىپ, تاريحي ساباقتاستىق پەن الەمدىك تاجىريبەلەردىڭ ماڭىزىن باسا كورسەتكەن ز.عايىپوۆ «قازىرگى بولىپ جاتقان كوپتەگەن ساياسي وزگەرىستەردىڭ بارلىعىن پرەزيدەنتتىڭ سايلاۋالدى باعدارلاماسىنىڭ لوگيكالىق جالعاسى دەپ قاراستىرۋعا بولادى. قاڭتار وقيعاسى ساياسي وزگەرىستەردىڭ قادامىن جيىلەتتى. وتكەن وتىز جىلدا قول جەتكەن جەتىستىكتەردى تەرىسكە شىعارۋعا بولمايدى, الايدا پاندەميا كەزەڭى ءبىزدىڭ كۇردەلى جاعدايعا دايىن ەمەستىگىمىزدى كورسەتسە, قاڭتار وقيعاسى ەلدەگى كۇشتىك قۇرىلىمداردىڭ دارمەنسىزدىگىن پاش ەتتى. ەل تىرلىگىن تۇزەۋ ءۇشىن ەل تىرەگى – كونستيتۋتسيا وزگەرتۋلەر ەنگىزۋدىڭ قاجەتتىلىگى تۋىنداپ وتىر. ءومىرىمىزدى وزگەرتكىمىز كەلسە, الداعى رەفەرەندۋمعا بەيجاي قاراماۋمىز كەرەك, ءار ازامات ءوز تاڭداۋىن جاساۋى قاجەت, ول ءۇشىن سانانى وزگەرتىپ, ساياسي مادەنيەتىمىزدىڭ دەڭگەيىن كوتەرۋگە ءتيىسپىز, سەبەبى وزگەرىس وزىمىزدەن باستالادى» دەدى.
«ءار ۇلتتىڭ, ءار حالىقتىڭ تاعدىرشەشتى كەزەڭدەرى بولادى. سونداي كەزەڭنىڭ ءبىرى تاياۋ كۇندەردە حالقىمىزدىڭ الدىنان وتەيىن دەپ تۇر. ءار ازامات «جاڭا قازاقستاندى» قۇرۋعا بايلانىستى التىن دىڭگەگىمىز – اتا زاڭىمىزعا ەنەتىن وزگەرىستەردىڭ ءمانى مەن ماعىناسىن تەرەڭ ءتۇسىنىپ, پرەزيدەنت باستامالارىنا قولداۋ ءبىلدىرۋى كەرەك دەپ ويلايمىن. ويتكەنى قازاقستاننىڭ ەرتەڭگى جارقىن بولاشاعى ءۇشىن, حالىقتىڭ الەۋمەتتىك جاعدايى مەن ءال-اۋقاتىنىڭ كوتەرىلۋى ءۇشىن, اتا زاڭعا وركەنيەتتى ەلدەردىڭ تاجىريبەسى نەگىزىندە وڭ وزگەرىستەر ەنگىزىلمەك. ءبىزدىڭ ۇجىم سول كۇندى قۇلشىنىسپەن كۇتىپ وتىر, 5 ماۋسىم كۇنى ءوز تاڭداۋىمىزدى جاساۋعا دايىنبىز» دەدى نۇر-سۇلتان قالاسىنىڭ بىرلەسكەن مۇراجايلار ديرەكتسياسى ديرەكتورىنىڭ ورىنباسارى سامات تەرگەمباەۆ.
ەرلان مازان
