كەشە نۇر-سۇلتان قالاسى ءماسليحاتىنىڭ كەزەكتەن تىس سەسسياسى ءوتتى. سەسسياعا قالا اكىمى التاي كولگىنوۆ قاتىستى. شاھار باسشىسى بالالار جىلىنا جانە وقۋ جىلىنىڭ اياقتالۋىنا وراي ءبىلىم سالاسىنداعى اتقارىلعان جۇمىستار مەن وسى سالاداعى ماسەلەلەرگە توقتالدى.
– مەملەكەت باسشىسىنىڭ جارلىعىمەن بيىل بالالار جىلى اتالىپ ءوتىپ جاتىر. وسىعان بايلانىستى بالالاردىڭ تاربيەسى مەن بىلىمىنە ەرەكشە ءمان بەرىلگەن. سپورت سەكتسيالارى مەن ۇيىرمەلەردىڭ سانى كوبەيىپ جاتىر. سونىمەن قاتار بالالارعا ارنالعان نىسانداردىڭ ينفراقۇرىلىمىن جاقسارتۋ دا نازاردا. قالا بيۋدجەتىنىڭ 35 پايىزى, بۇل شامامەن 500 ملرد تەڭگە بالالارعا جۇمسالادى. ياعني ولارعا ءبىلىم بەرۋگە, سپورت پەن ونەرگە باۋلۋعا جانە باسقا تاربيەلىك-تانىمدىق شارالارعا باعىتتالعان. بۇل – ايتارلىقتاي قولداۋ, – دەدى التاي كولگىنوۆ.
قالا باسشىسىنىڭ ايتۋىنشا, باستى ماقسات – ورتا ءبىلىم وشاقتارىنىڭ سانىن كوبەيتۋ.
– ەلوردادا 70 مىڭ وقۋشىعا ارنالعان 34 مەكتەپ سالىندى. ەندى وسى كورسەتكىشتى ازايتپاۋىمىز كەرەك. جىل ساناپ حالىقتىڭ سانى ارتىپ كەلەدى. سونىمەن قاتار 3 اۋىسىمدى مەكتەپ ماسەلەسى 2 ەسە ازايدى. ودان بولەك, وقۋشى سانى شامادان تىس مەكتەپتەردىڭ سانى 22-دەن 14-كە ازايدى. بۇگىن ەلوردادا 8599 تۇلەك مەكتەپ ءبىتىرىپ جاتىر. ال قىركۇيەكتە 25-26 مىڭ بالا مەكتەپ تابالدىرىعىن اتتايدى, – دەدى قالا اكىمى.
التاي كولگىنوۆ حالىقارالىق بالالاردى قورعاۋ كۇنىنە وراي وقۋشىلارعا ارنالعان جاڭا ءبىلىم ورتالىعى اشىلاتىنىن ايتىپ, قالادا تاعى دا ءبىر وقۋشىلار سارايى سالىناتىنىن مالىمدەدى.
– بالالارعا قوسىمشا ءبىلىم بەرۋ بويىنشا جەكە ينۆەستوردىڭ ەسەبىنەن وقۋشىلار سارايىن سالىپ جاتىرمىز. 1 ماۋسىم بالالاردى قورعاۋ مەرەكەسى كۇنى «ءبىلىم پارك» قوسىمشا ءبىلىم ورتالىعى اشىلادى. ول جەردە 1,5 مىڭنان استام بالا قوسىمشا ءبىلىم الادى. سونىڭ ىشىندە ماتەماتيكا, فيزيكادان قوسىمشا ساباق, كومپيۋتەرلىك ساۋات, مۋزىكا جانە باسقا دا ۇيىرمەلەر ۇيىمداستىرىلادى. سونىمەن قاتار بيىل ەلورادادا اۋتيزم ورتالىعى اشىلادى. ورتالىقتان ەرەكشە كۇتىمدى تالاپ ەتەتىن بالالارعا بار جاعداي جاسالادى, – دەدى التاي سەيدىرۇلى.
اكىم استانالىق پەداگوگتاردىڭ جاعدايىنا دا توقتالىپ ءوتتى.
– بيىل پەداگوگيكا ماماندىعىنا وقۋعا تۇسۋگە نيەتتى تۇلەكتەر ءۇشىن 1400 گرانت بولەمىز. بالاعا بەرىلەتىن ءبىلىمنىڭ ساپاسىن ارتتىرامىز دەسەك, پەداگوگتاردىڭ دا جاعدايىن ۇمىتپاۋىمىز كەرەك. بۇگىن تاڭەرتەڭ استانالىق مۇعالىمدەردىڭ قاتىسۋىمەن «ۇستازدار اللەياسىنىڭ» اشىلۋىنا قاتىستىم. بيىل ەلوردالىق وقۋشىلار ءتۇرلى وليمپيادادان 99 مەدال اكەلدى. سونىڭ ىشىندە 24-ءى – التىن مەدال. بۇل – ۇستازداردىڭ ەڭبەگى, – دەدى اكىم.
سەسسيادا نۇر-سۇلتان قالاسىنىڭ 2022-2024 جىلدارعا ارنالعان بيۋدجەتىنە ەنگەن وزگەرىستەر بەكىتىلدى. الەۋمەتتىك كومەك كورسەتۋ, ونىڭ مولشەرلەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋ قاعيداسىنا وزگەرىستەر مەن تولىقتىرۋلار ەنگىزىلدى. جەر ۋچاسكەلەرىن مەملەكەت مۇقتاجى ءۇشىن الىپ قويۋعا بايلانىستى جەر ۋچاسكەلەرىن نەمەسە وزگە دە جىلجىمايتىن مۇلىكتى يەلىكتەن شىعارۋ شارتتارىنىڭ جوبالارى تانىستىرىلدى.
