مەملەكەت دەڭگەيىندەگى ماسەلەنى حالىق تالقىسىنا سالۋ – دەموكراتيالىق قوعام ءۇشىن تاڭسىق ەمەس. رەفەرەندۋم – حالىق بوستاندىعىنىڭ كورىنىسى. اسىرەسە, كونستيتۋتسياعا قاتىستى ءار تۇزەتۋ تەرەڭ تالداۋدى قاجەت ەتەدى. ەل ارالاپ, الداعى ناۋقاننىڭ ءمان-ماڭىزىن ءتۇسىندىرۋدى قولعا العان دەپۋتاتتار وسىلاي دەيدى. تاۋەلسىز قازاقستان تاريحىندا 1995 جىلى عانا رەفەرەندۋم ءوتتى. ودان كەيىنگى 27 جىل ىشىندە كونستيتۋتسياعا 4 رەت وزگەرىس ەنگىزىلدى. بىراق قاي-قايسىسى دا تەك پارلامەنت ارقىلى شەشىلىپ كەلدى. سوندىقتان قازاقستاندىقتار ءۇشىن الداعى رەفەرەندۋمنىڭ مازمۇنىن ءجىتى ءتۇسىندىرۋ ماڭىزدى.
2022 جىلعى 24 مامىردا قازاقستان رەسپۋبليكاسى پارلامەنتى سەناتىنىڭ دەپۋتاتى اقىلبەك كۇرىشباەۆ جانە «قازاق قىزى» قوعامدىق ۇيىمىنىڭ ءتورايىمى قاراقات ابدەنمەن «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» ءتۇسىندىرۋ جۇمىستارى بويىنشا جوعارى كولىك جانە كوممۋنيكاتسيا كوللەدجىنىڭ قىزمەتكەرلەرى جانە ستۋدەنتتەرىمەن «رەفەرەندۋم – دەموكراتيالىق قوعامنىڭ ماڭىزدى قۇرالى» تاقىرىبىندا كەزدەسۋ ءوتتى.
كەزدەسۋدىڭ ماقساتى – وقۋ ورنىنىڭ وقىتۋشىلارى مەن 18 جاسقا تولعان, سايلاۋ قۇقىعىنا يە جاستارىنا رەفەرەندۋمنىڭ ءمان-ماقساتىن ءتۇسىندىرۋ جانە 5 ماۋسىمدا رەفەرەندۋمعا حالىقتى بەلسەندى قاتىسۋعا شاقىرۋ.
ءىس-شارانى نۇر-سۇلتان قوعامدىق كەڭەسىنىڭ توراعاسى, نۇر-سۇلتان تەحنيكالىق جانە كاسىپتىك ءبىلىم بەرۋ مەكەمەلەرى ديرەكتورلار كەڭەسىنىڭ توراعاسى, كونستيتۋتسيالىق رەفورمالاردى ءتۇسىندىرۋ جونىندەگى نۇر-سۇلتان قالاسى بويىنشا رەسپۋبليكالىق قوعامدىق شتابتىڭ باسشىسى زۇلفۋحار عايىپوۆ كونستيتۋتسيالىق رەفورمانىڭ نەگىزگى تارماقتارى تۋرالى ايتتى.
اقىلبەك كۇرىشباەۆ جالپىحالىقتىق رەفەرەندۋمنىڭ ماڭىزىنا توقتالىپ, رەفەرەندۋمعا ەنگىزىلىپ جاتقان وزگەرىستەر مەملەكەتىمىزدىڭ قاراپايىم ازاماتىنىڭ ءومىر جاعدايىنا قانشالىقتى وڭ اسەر بەرەتىنى جونىندە كەڭىنەن ءتۇسىندىرىپ بەردى.
سەنات دەپۋتاتى ءار باپتىڭ وزگەرىسىنە جەكە-جەكە توقتالدى. قاراقات ابدەن ەڭبەك ۇجىمىنا داۋىس بەرۋدىڭ ەرەجەلەرى مەن شارتتارىن ءتۇسىندىردى جانە رەفەرەندۋمعا قاتىسۋ ەل ازاماتتارىنىڭ پارىزى ەكەنىن اتاپ ءوتتى.
ايزادا جايىققىزى
