كەشە استانادا «شابىت» شىعارماشىل جاستاردىڭ ءححى حالىقارالىق فەستيۆالىنىڭ شىمىلدىعى ءتۇرىلدى. بيىلعى بايقاۋعا قاتىسۋعا 345 ادام ءوتىنىش تاپسىردى. سونىڭ جارتىسىنا جۋىعى – 163 تالاپكەر استانانىڭ اتىنان قاتىسىپ جاتىر. قاتىسۋشىلاردىڭ اراسىندا ازەربايجان, بەلارۋس, گرۋزيا, يزرايل, قىرعىزستان, رەسەي, ۋكراينا جانە وزبەكستان مەملەكەتتەرىنىڭ ونەرپازدارى بار.
9 قاراشاعا دەيىن جالعاساتىن فەستيۆالدىڭ وسى جىلعى باعدارلاماسىنا «كلاسسيكالىق مۋزىكا» (اعاش ۇرمەلى اسپاپتار, مىس ۇرمەلى اسپاپتار, سوقپالى اسپاپتار, كامەرالىق انسامبل), «حالىق مۋزىكاسى» (قوبىز, پريما قوبىز, شەرتەر, باس شەرتەر, پريما دومبىرا), «ەسترادالىق ۆوكال», «حورەوگرافيا» (حالىق ءبيى) جانە «جۋرناليستيكا» (تەلەۆيزيا جانە ينتەرنەت رەسۋرستار) اتتى ءىشىنارا بىرنەشە سەكتسياعا بولىنگەن بەس اتالىم ەنگىزىلدى. وسىنىڭ ىشىندەگى «جۋرناليستيكا» اتالىمى التى جىلدىق ۇزىلىستەن سوڭ باعدارلاماعا قوسىلىپ وتىر.
– «شابىت» – ەلوردامەن ءبىر ۋاقىتتا دۇنيەگە كەلىپ, بىرگە ءوسىپ-ءونىپ, ءوربىپ, دامىپ كەلە جاتقان فەستيۆال. بيىل استانىڭ 20 جىلدىعىن مەملەكەتتىك دەڭگەيدە تويلاپ جاتىرمىز. سول سياقتى «شابىت» تا باسىنان ايشىقتى تاريحي كەزەڭدەردى وتكەردى. قانشاما تالانتتاردى تانىتتى, – دەدى فەستيۆالدى سالتاناتتى جاعدايدا اشقان استانا اكىمىنىڭ ورىنباسارى ەرمەك امانشاەۆ.
ەلباسى نۇرسۇلتان نازارباەۆ كەلەسى جىلدى «جاستار جىلى» دەپ جاريالاعانىن اتاپ وتكەن ول استانا اكىمدىگى جاستاردى قولداۋ باعدارلاماسىن ازىرلەپ جاتقانىن ايتتى.
ءبىر اپتاعا جۋىق ۋاقىت 16-35 جاس ارالىعىنداعى كونكۋرسانتتار «استانا» كونتسەرت زالىندا, قازاق ۇلتتىق ونەر ۋنيۆەرسيتەتىنىڭ زالدارىندا, «جاستار» تەاترىندا, بەيبىتشىلىك جانە كەلىسىم سارايىندا ونەر كورسەتىپ, ىرىكتەۋ تۋرلارىنان وتەدى. قورىتىندىسىندا باس جۇلدە يەگەرلەرىنە – 350 مىڭ تەڭگە, ءبىرىنشى ورىن العاندارعا – 300 مىڭ تەڭگە, ەكىنشى ورىن ءۇشىن – 250 مىڭ تەڭگە جانە ءۇشىنشى ورىنعا 200 مىڭ تەڭگە بەرىلەدى. ال فەستيۆالدىڭ ەڭ ۇزدىك قاتىسۋشىسىنا قازاقستان رەسپۋبليكاسى پرەزيدەنتىنىڭ كۋبوگى تاپسىرىلادى.
بۇعان قوسا, ءاربىر سەكتسيا بويىنشا شارانى ۇيىمداستىرۋشى قالالىق مادەنيەت جانە سپورت باسقارماسى ارنايى سىيلىقتار مەن قۇنى 80 مىڭ تەڭگەلىك اتاۋلى سىيلىقتاردى تاپسىرادى. «جۋرناليستيكا» اتالىمىندا اتاۋلى سىيلىق قازاق كوركەمسوزىنىڭ زەرگەرى, شىندىق شىراقشىسى شەرحان مۇرتازا اتىندا بولادى. سونداي-اق وسى اتالىمدا «Sputnik» حالىقارالىق اقپارات اگەنتتىگى جانە راديوسى ارنايى سىيلىق تاعايىندادى.
