چەمپيون اتىنا لايىق

«استانا» فۋتبول كلۋبى قازاقستان پرەمەر-ليگاسىنىڭ 32-تۋرىندا ءوز الاڭىندا الماتىنىڭ «قايراتىن» قابىلدادى.

بۇل دوپ دوداسىندا چەمپيوندىقتىڭ تاعدىرى شەشىلىپ قويعانىمەن, «ەل كلاسسيكو» اتانىپ كەتكەن ەكى مىقتى كوماندانىڭ ويىنى قاشاندا كورىكسىز بولعان ەمەس. جۇرت بولجاعانداي, ەل بىرىنشىلىگىندە ەڭ ءبىرىنشى بولىپ قويعان «استانا» ەۋروپا ليگاسىنىڭ كەزەكتى تۋرىنىڭ الدىندا بۇل ماتچقا نەگىزگى ويىنشىلارىن دەمالدىرىپ, جاستارىن شىعارا سالعان جوق. ويتكەنى قپل-دىڭ باس جۇلدەسىنە فاۆوريت سانالعان «قايراتقا» چەمپيون رەتىندە كۇش كورسەتۋى كەرەك ەدى. ءبىر جاعىنان چەحيانىڭ «يابلونەتس» كومانداسىنا قارسى ويىن الدىندا جىگىتتەردىڭ دايىندىعىن ءبىر پىسىقتاپ العان دا ءجون بولعان شىعار.
ءسويتىپ گريگوري بابايان باپتايتىن كوماندا الاڭعا تولىق كۇشپەن شىقتى. ال «قايرات» ءبىراز جاستىڭ شاماسىن بايقاپ كورۋگە بەل بايلاپتى. ءبىر-ءبىرىنىڭ سىرىن بەسكە بىلەتىن تىسقاققان كوماندالاردىڭ ويىنى وتە تارتىستى ءوتتى. ەسەپتى الدىمەن 22-مينۋتتا قوناقتار اشتى. گول اۆتورى – ماگامەد پاراگۋلگوۆ. بۇعان «استانا» 25-مينۋتتا مارين توماسوۆتىڭ گولىمەن جاۋاپ بەردى. ال 39-مينۋتتا بۇرىشتامادان سەرىكجان مۋجيكوۆتىڭ كوتەرگەن دوبىن باكتيەر زاينۋتدينوۆ باسپەن ءدال سوقتى. ەكىنشى تايمدا الماتىلىقتار تارازى باسىن تەڭەستىردى. 60-مينۋتتا كوزگە تۇسكەن – ەسەو­لا ادەرينسولا. وسىلاي الما-كەزەك گول الماسقان دەربيدە اقىرى بىرەۋى ءبىر باس جوعارى بولدى. جەڭىستى گولدى 61-مينۋتتا استانالىق رومان مۇرتازاەۆ سوقتى.
«استانا ارەنا» ستاديو­نىندا وتكەن ويىن­دى 3200 جانكۇيەر تاماشالادى. ەندى ەكى كۇننەن كەيىن قازاقستان چەمپيونىن ەۋروپا ليگاسىنىڭ ويىنى كۇتىپ تۇر.
العاشقى ۇشتىك انىقتالىپ قويعان قپل-دىڭ قالعان ويىندارىندا تارتىس ءالى دە تارقاي قويمادى. ويتكەنى ءبىرى ەۋرو كۋبوكقا ىلىگۋگە بارىن سالسا, ەندى ءبىرى باستى ليگا باسەكەسىندە قالا بەرۋ ءۇشىن جانىن سالىپ جاتىر. تەك ورالدىڭ «اقجايىق» كومانداسىنىڭ عانا كەلەسى ماۋسىمدا بۇل دوداعا ورالماسى بەلگىلى بولدى.

مارين توماسوۆ قازان ايىنىڭ ۇزدىك ويىنشىسى دەپ تانىلدى. وعان جانكۇ­يەرلەردىڭ 47,42 پايىزى داۋىس بەردى.

«قايرات» كومانداسىنا قارسى ماتچ ماجارستاندىق لاسلو كلياينحايسلەردىڭ «استانا» ساپىنداعى
50-ءىنشى ويىنى بولدى.

«قايرات» – «استانا» كەزدەسۋىندە ەكى رەت ناتيجەلى پاس شىعارعان سەرىكجان مۋجيكوۆ ەلوردالىق كلۋبتىڭ تاريحىندا وسى كورسەتكىش بويىنشا ۇزدىك ۇشتىككە كىردى.

يۆان ماەۆسكي,
«استانا» كومانداسىنىڭ
جارتىلاي قورعاۋشىسى:

– جەڭگەنىمىزگە وتە قۋانىشتىمىن. مۇنىمەن ءبىز «قايراتتان» ءسوزسىز مىقتى ەكەنىمىزدى دالەلدەدىك. ءبىز ءبىرىنشى ورىنعا راسىندا دا لا­يىق بولدىق. ءبىزدىڭ ناعىز چەمپيون ەكەنىمىزگە ەشكىم شاك كەلتىرمەۋى كەرەك. جانكۇيەرلەردى بەسىنشى رەت قاتارىنان چەمپيون بولعانىمىزبەن شىن كوڭىلدەن قۇتتىقتايمىن.