ەلدى ەلەڭ ەتكىزگەن

ۆاشينگتون يرانعا جەڭىلدىك بەردى

ۆاشينگتون يران مۇنايىن يمپورتتاۋ ءۇشىن 8 مەملەكەتكە رۇقسات بەرۋ تۋرالى شەشىمگە كەلىستى. بۇل تۋرالى Bloomberg اگەنتتىگى حابارلادى.

ازىرگە بۇل تىزىمدە جاپونيا, ءۇندىستان جانە وڭتۇستىك كورەيا ەلدەرىنىڭ بار ەكەنى انىقتالدى. ەسەسىنە بۇل ەلدەر «قارا التىن» قۇنىنىڭ ارتۋىنا سەبەپ بولماس ءۇشىن يمپورت كولەمىن ازايتۋى ءتيىس.
وسى جىلدىڭ مامىر ايىندا اق ءۇي باسشىسى دونالد ترامپ يراننىڭ يادرولىق كەلىسىمىنەن شىعاتىنىن مالىمدەگەن بولاتىن. وسىدان كەيىن بۇل ەلگە قارسى سانكتسيا­نىڭ جاڭا ءتۇرى قابىلداندى. تامىز ايىندا شەكتەۋدىڭ العاشقى كەزەڭى كۇشىنە ەندى. ول ەڭ الدىمەن يراننىڭ اۆتوموبيل قۇراستىراتىن سالاسىن قامتىپ وتىر. سونىمەن قاتار, التىن سەكىلدى وزگە دە مەتالل تۇرلەرىن ساتىپ الۋعا شەكتەۋ قويىلدى. ال سانكتسيانىڭ كەلەسى لەگى وسى ايدا كۇشىنە ەنەدى.

قارۋلى بوسقىن قاۋىپتى

تاياۋ شىعىس پەن سولتۇستىك افريكا جەرىنەن 20 مىڭنان اسا بوسقىن قارۋلى كۇيدە ەۋروپا جەرىنە كىرۋى مۇمكىن. بۇل تۋرالى اۆستريانىڭ سىرتقى ىستەر مينيسترلىگى حابارلادى.

زاڭسىز ميگرانتتار بوسنيا-حورۆاتيا شەكاراسى ارقىلى گەرمانيا مەن سكانديناۆيا جەرىنە كىرۋدى كوزدەپ وتىر. Kronen Zeitung باسىلىمىنىڭ مالىمەتىنشە, اتالعان تۇسقا ارنايى جاساق قويىلىپ, جاعداي باقىلاۋدا تۇر. دەگەنمەن بوسقىنداردىڭ پىشاق ۇستاعان كۇيدە شابۋىل جاساۋى مۇمكىن ەكەندىگى تۋرالى قاۋىپ بار.
بەلگىلى بولعانداي, ميگرانتتاردىڭ اراسىندا سيريادان شىققاندار جوق. ولاردىڭ باسىم بولىگى پاكىستان, يران, الجير جانە ماروككو ەلدەرىنەن قاشىپ كەلىپ وتىر.

سۋ استىنا كەتتى

جاپونيادا ارالداردىڭ ءبىرى تولىعىمەن سۋ استىنا كەتتى. ەسانبە حاناكيتا كودزيما ارالى حوككايدونىڭ سولتۇستىك جاعالاۋىنا جاقىن جەردە ورنالاسقان.

The Guardian باسى­لىمى جاپونيانىڭ جاعالاۋ كۇزەتى ەسانبەنى سوڭعى رەت 1987 جىلى زەرتتەگەنىن حابارلادى. ول كەزدە اتالعان ارال سۋ دەڭگەيىنەن 1,4 مەتر عانا كوتەرىلگەن. ال وتكەن ايدا جاعالاۋ كۇزەتى ارالدىڭ جوعالىپ كەتكەنىن جاقىن ماڭداعى ەلدى مەكەن تۇرعىندارى حابارلاعاننان كەيىن بارىپ زەرتتەۋگە كىرىسكەن.
ايتارلىعى, بۇل ارالدا ەشكىم تۇرمايدى. سول سەبەپتى اپاتتى جاعدايدا قونىس اۋدارعاندار جوق. ەندى جاپونيا اۋ­ماعىنىڭ قانداي كو­لەمدە قىسقارعانى انىق­تالماق.