بەيبىتشىلىك جانە كەلىسىم سارايىندا جانسۋسار كەش بولدى. اقىن سەرىك سەيىتماننىڭ «قاراشاڭىراق» اتتى كەشىنەن جىرمەن سۋسىنداپ, جانىمىزعا داۋا تاۋىپ قايتتىق. استانانىڭ 20 جىلدىعى قارساڭىندا ەلورداعا وسىنداي رۋحتى كەش كەرەك ەدى. ساحنادا «ويان, قازاق!» ورىندالعاندا كەشەگى مىرجاقىپ دۋلاتوۆتى ەسكە الدىق.
وتىراردىڭ وعلانى, «حالقىن زاڭسىز-اق قۇرمەتتەيتىن, تۋىن زاڭسىز-اق كىرلەتپەيتىن, الىپ جەر مەن كوكتى قازاققا ۇقساتاتىن» اقىننىڭ كەشىنە استانا جۇرتشىلىعى اعىلىپ كەلدى. الماتىدان ات ارىتىپ ومىرزاق ايتباەۆ جەتتى. استانادان ورازكۇل اسانعازىقىزى قوسىلدى. كوپەن امىربەك كەلىپ, سەرىك سەيىتماننىڭ كىلەڭ رۋحتى جىرلارىنا جوعارى باعا بەرىپ, گەننادي گولوۆكينگە تەڭەدى.
كەش باستالار الدىندا تولقىپ تۇرعان اقىنمەن از-ماز سۇقباتتاسقانىمىز بار. سوندا بۇل كەشتى وتكىزۋگە ءوزى اسا ىقىلاستى بولماعانىن, اعالارىنىڭ ۇسىنىسىمەن قولعا الىنعانىن ايتتى. ءبىر قىزىعى, كىتابى شىعىپ, ءوزىن ەل مويىنداپ جۇرسە دە, جازۋشىلار وداعىنا كۇنى كەشە عانا مۇشە بولدى. «تەمىرحان مەدەتبەك كوكەم مۇشەلىككە كىرۋگە كەڭەس بەرمەسە, قۇنتتامايدى ەكەنمىن» دەپ كۇلەدى. اقىن قازاق راديوسىنىڭ باسشىلىعىنان كەتكەنىنەن ەل حاباردار. «قىزمەت بولمىسىمدى قاتىرىپ تاستادى, ەركىندىگىمدى ۇرلادى» دەدى بۇل تۋرالى ءوزى.
«ايازىنان ارقار اۋعان ارقانىڭ, ارقاسىنان الاش اۋا كورمەسىن» دەپ ولەڭ جازعان اقىن استاناعا ەلباسىنىڭ ەلوردا جايلى ىرگەلى ءسوزىن مەدەت تۇتىپ كەلىپتى. سودان بەرى وسىندا. استانانىڭ اق شامدارى شىعارماشىلىعىنا شابىت سىيلادى. قاراشاڭىراقتىڭ استىندا قوڭىر عانا تىرلىك كەشىپ, قوڭىر كەش وتكىزدى. ءبىر قۋاناتىنى, شايىردىڭ ەندى ءوز شاڭىراعى بار. كەش سوڭىندا اتىن اتاماۋدى قالاعان ازامات قالانىڭ قاق ورتاسىنان اقىنعا 3 بولمەلى پاتەردىڭ كىلتىن تاپسىردى. كىسى قىزىعاتىنداي-اق جاڭالىق. وسى ۋاقىتقا دەيىن پاتەردىڭ جايىن ويلاماي, جاتاقحانادا جۇرگەنى تاعى دا قوڭىرلىعى عوي سول.
استانانىڭ كوشەسىن الاش اتتى ۇلىمەن ارالاپ ءجۇرىپ, ولەڭگە قوستى. ءومىرى دە ولەڭمەن ورىلگەن. ۇلتتىق رۋح, ازاماتتىق پوەزيا دەپ ءجۇرىپ, ومىرلىك جارىنا جارتى اۋىز ولەڭ جازباعانى دا قىزىق. تەك ايتەۋىر باعلان ءابدىرايىموۆتىڭ ورىنداۋىنداعى «باعالا» ءانىنىڭ ءسوزىن جازعانى كوڭىلگە مەدەۋ. بۇل ءان بۇكىل قازاق ارۋلارىنا دەمەۋ سىندى. حال-قادىرىن ارتتىرىپ تۇرادى. ءان دەمەكشى, «جىگىتتەر» توبى ورىندايتىن «سەن», «كەشىر مەنى», «دارىباەۆتار» ءانسامبلى ايتاتىن «ومىرىڭە نەمقۇرايلى قاراما», «سالىقوۆتار» وتباسى قالىقتاتقان «اق كوگەرشىن» ءبارى-ءبارى – سەزىمنەن تۋعان دۇنيەلەر. ءبىر قىزىعى, اعامىزدىڭ بىرنەشە حيت ءان ءماتىنىنىڭ اۆتورى ەكەنىن وسى كەشتە بىلدىك. ۇندەمەي جۇرەتىن سىربازدىعى عوي باياعى.
راديودا ءوزى جۇرگىزگەن «ايدىندا جۇزگەن ايساۋلە» حابارىنا مىڭعا تارتا اقىننىڭ شىعارماشىلىعىن وزەك ەتتى. مۇنى سوناۋ ستۋدەنتتىك جىلدارىمىزدا قىزىعا تىڭدادىق ءوزىمىز. كەشتىڭ رەجيسسەرى داۋرەن سەرعازيننىڭ جۇمىسى, «ءداستۇر» مەديا پروداكشن ورتالىعى جىگىتتەرىنىڭ بەينەپوەزياسى ۇتىمدى شىقتى.
الماتىداعى ءبىر كەشتەردە اقىنعا دۇركىن-دۇركىن شاپان جابىلىپ, ول ماقتاۋ مەن ماداقتاۋعا مالتىعىپ قالىپ جاتادى. بۇل كەشتە ومىرزاق ايتباەۆ ولەڭىن تالدادى, كوپەن امىربەك اقىننىڭ بولمىسىن ايتتى. ودان وزگە ارتىق ماداق بولعان جوق. قايتا اقىننىڭ شىعارماشىلىعىن كەشەگى اشىربەك سىعاي اعانىڭ, بۇگىنگى قويشىعارا سالعاراۇلىنىڭ سوزدەرى ايشىقتاي ءتۇستى.
كەشتىڭ «قاراشاڭىراق» اتالۋى دا تەگىن ەمەس. شاڭىراق – اقىن شىعارماشىلىعىنداعى باستى كۋلت. جىر جيناعىنا دا وسى اتاۋ بەرىلگەن. حالەل دوسمۇحامەدوۆتىڭ «قازاقتىڭ ءسوزىن بۇزاتىندار – وقىعاندار» دەگەنى راس سىندى. اقىن «قاراشاڭىراق» ءسوزىنىڭ سوڭعى كەزدە بولەك جازىلىپ جۇرگەنىنە قىنجىلادى.
قارلىعا يبراگيموۆا
