كەشە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا ازەربايجان حالقىنىڭ كوشباسشىسى گەيدار اليەۆ تۋرالى جازىلعان «ەلىنە جول اشقان» اتتى كىتاپتىڭ تانىستىرىلىمى ءوتتى.
كىتاپتا ازەربايجان كوشباسشىسىنىڭ ءومىرى مەن قىزمەت جولى تۋرالى ۇلىبريتانيا پاتشايىمى ءىى ەليزاۆەتا, اقش-تىڭ بۇرىنعى پرەزيدەنتتەرى بيلل كلينتون مەن دجوردج بۋش, رف پرەزيدەنتى ۆلاديمير پۋتين, يزرايل پرەزيدەنتى بولعان شيمون پەرەس, گرۋزيا پرەزيدەنتى بولعان ەدۋارد شەۆاردنادزە, ۋكراينا پرەزيدەنتى بولعان لەونيد كۋچما سىندى مەملەكەت باسشىلارىنىڭ, الەمگە بەلگىلى ساياساتكەرلەر مەن ەكونوميستەردىڭ, قوعام قايراتكەرلەرى مەن كاسىپكەرلەردىڭ ەستەلىكتەرى, سونداي-اق اليەۆكە قاتىستى كوكپ وك ساياسي بيۋروسىنىڭ بۇرىن قۇپيا ساقتالىپ كەلگەن قۇجاتتارى مەن سۋرەتتەرى ۇسىنىلعان.
بۇل كىتاپ وسىدان بەس جىل بۇرىن ماسكەۋدە جارىق كورگەن. بۇگىنگى دەموكراتيالىق ازەربايجان رەسپۋبليكاسىنىڭ نەگىزىن قالاعان تۇلعانىڭ 95 جىلدىعىنا وراي قازاقستان مەن ازەربايجان رەسپۋبليكاسىنىڭ ءوزارا دوستىعى مەن مادەني, ساياسي ىنتىماقتاستىعىنىڭ بەلگىسى رەتىندە قازاق تىلىنە اۋدارىلىپ وتىر. كىتاپتى حالىقارالىق تۇركى اكادەمياسى مەن قر تۇڭعىش پرەزيدەنتى – ەلباسى كىتاپحاناسى اۋدارىپتى.
گەيدار اليەۆپەن تامىرى تەرەڭ دوستىقتا بولعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ: «تاۋەلسىز ازەربايجاننىڭ نەگىزىن قالاپ, تاعدىرشەشتى كۇردەلى كەزەڭدە ەلىنە قالتقىسىز قىزمەت ەتكەن, ارتىنا ونەگەلى ءىز قالدىرعان اسا كورنەكتى مەملەكەت قايراتكەرى گەيدار اليەۆتىڭ تۇلعاسى باۋىرلاس حالىقتار تاريحىندا دا ايرىقشا ورىن الادى. مەنىڭ گەيدار اليرزاۇلىمەن تانىستىعىم كەڭەس وداعى كەزىندە باستالدى. سەنىمدى دوستىققا, جاراسىمدى سىيلاستىققا ۇلاسقان قارىم-قاتىناسىمىز تاۋەلسىزدىك داۋىرىندە نىعايا ءتۇستى. ءبىز ەلدەرىمىز اراسىنداعى بايلانىستاردى دامىتۋ, حالىقارالىق ارەنادا ءوزارا قولداۋ سىندى كوپتەگەن ماسەلەلەر جونىندە پىكىرلەسىپ وتىردىق» دەپتى كىتاپتىڭ العىسوزىندە.
شاراعا ەكى ەلدىڭ بىرقاتار جاۋاپتى تۇلعالارى قاتىسىپ, ءسوز سويلەدى. كىتاپ تانىستىرىلىمىنان كەيىن ولارعا گەيدار اليەۆ تۋرالى فيلم كورسەتىلىپ, ەلباسى كىتاپحاناسىنىڭ مۋزەيى بويىنشا ەكسكۋرسيا جاسالدى.
