قاڭتار كىرگەلى ەلوردادا اياز كۇشەيىپ, كۇندە قار جاۋىپ, قالا تۇرعىندارىنىڭ ءجۇرىس-تۇرىسىنا ۇلكەن قولايسىزدىق تۋدىردى. قالا كوشەلەرىن قاردان تازارتىپ, كولىك قاتىناسىنىڭ ىركىلىسسىزدىگىنە كەپىلدىك ەتۋ ءۇشىن قالانىڭ كوممۋنالدىق قىزمەتتەرى تاۋلىك بويى كۇشەيتىلگەن رەجيمدە جۇمىس جۇرگىزىپ جاتىر.
10 قاڭتار كۇنى تاڭەرتەڭ ەلوردا كوشەلەرىن قار مەن مۇزدان تازارتۋعا 2 مىڭعا جۋىق جول جۇمىسشىسى شىقتى, مىڭنان استام ارنايى تەحنيكا جۇمىلدىرىلدى. 9 قاڭتاردان 10-ىنا قاراعان ءتۇنى قالادان 1673 تەكشە مەتر قار شىعارىلدى. ال 11 قاڭتارعا قاراعان ءتۇنى ەلوردادان 6,5 مىڭ تەكشە مەتر قار شىعارىلىپ, 537 رەيس جاسالدى.
قىس مەزگىلىنىڭ باسىنان بەرى پوليگونعا 1,8 ميلليون تەكشە مەتردەن استام قار شىعارىلىپ, كولىكتەر 140 مىڭنان استام رەيس جاسادى.
قالادا قازىر 30 گرادۋس اياز باسەڭدەمەي تۇر. ەلوردا تۇرعىندارى مەن قوناقتارى كوكتايعاق كەزىندە قاۋىپسىزدىك ەرەجەلەرىن قاتاڭ ساقتاۋى جانە كوشەدە ۇزاق ۋاقىت جۇرمەۋى كەرەك. جۇرگىزۋشىلەر جولدا وتە ساق جانە مۇقيات بولۋى, جول قوزعالىسى ەرەجەلەرى مەن جىلدامدىق رەجيمىن ساقتاۋى, كولىك قۇرالىنىڭ تەحنيكالىق جاي-كۇيىن باقىلاۋدى كۇشەيتۋى ءتيىس. الىس جولعا شىقپاعان ءجون. جولعا شىقپاس بۇرىن دوڭگەلەكتىڭ جاي-كۇيى جول توسەمىنىڭ جاعدايىنا ساي كەلەتىنىنە كوز جەتكىزۋ كەرەك. قوزعالىس كەزىندە جىلدامدىق رەجيمىن ساقتاۋ, قوزعالىس قارقىنىن, كولىك قۇرالى مەن جۇكتىڭ ەرەكشەلىكتەرىن, ولاردىڭ جاي-كۇيىن, جول جانە تابيعي جاعدايلاردى ەسكەرە وتىرىپ, كولىكتى ابايلاپ باسقارۋ قاجەت. توتەنشە جاعداي تۋىنداعان جاعدايدا, «112» نومىرىنە قوڭىراۋ شالىڭىز
