1 قازان – قارتتار كۇنى. بۇگىنگى تاڭدا نۇر-سۇلتان قالاسىندا 80 مىڭنان اسا زەينەتكەر تۇرىپ جاتىر. ولاردىڭ ىشىندە ۇلى وتان سوعىسىنىڭ 57 مايدانگەرى, سونىمەن قاتار مۇمكىندىگى شەكتەۋلى 25 مىڭ قاريا بار.
نۇر-سۇلتان قالاسىنىڭ قارتتارىنا ءبىر كۇن ەمەس, ءبىر اي بويى قۇرمەت كورسەتىلەدى.
1 قازان كۇنى «استانا» كونتسەرت زالىندا ارداگەرلەر شىعارماشىلىق ۇجىمدارىنىڭ قاتىسۋىمەن مەرەكەلىك كونتسەرت وتەدى. سونداي-اق فوتوكورمە, فلەشموب, ەكسكۋرسيا ۇيىمداستىرىلادى. «شاراپات» الەۋمەتتىك قىزمەت كورسەتۋ ورتالىعىندا «قارتتارىم – اسىل قازىنام» اتتى كونتسەرت وتەدى. 3 قازاندا تجد قىزمەتكەرلەرى مەن حورەوگرافيا اكادەمياسىنىڭ ماماندارى «شاراپات شاقىرادى» اتتى مەرەكەلىك كونتسەرتىن ۇسىنادى. 8 قازاندا «قازاقكونتسەرت» ۇجىمى «سىزدەرگە مىڭ تاعزىم» كونتسەرتتىك باعدارلاماسىن قويادى. 1-3 قازان ارالىعىندا ەلوردالىق قارتتار ءۇشىن ۇلتتىق مۋزەي مەن تۇڭعىش پرەزيدەنت مۋزەيىنە, 7-9 قازان ارالىعىندا قالانىڭ كورىكتى جەرلەرىنە ەكسكۋرسيا ۇيىمداستىرىلادى. 15-17 قازان ارالىعىندا ق.قۋانىشباەۆ اتىنداعى اكادەميالىق قازاق مۋزىكالىق دراما تەاترى مەن م.گوركي اتىنداعى ورىس دراما تەاترىنىڭ سپەكتاكلدەرىن تاماشالايدى. سونداي-اق 23 قازاندا قاريالارعا كينوكورسەتىلىم ۇيىمداستىرىلادى.
مەرەكە اياسىندا ەلوردانىڭ ءدامحانالارى مەن مەيرامحانالارىندا ۇلى وتان سوعىسىنىڭ ارداگەرلەرى مەن تىل ارداگەرلەرىنىڭ قاتىسۋىمەن بىرقاتار شارالار وتكىزىلەدى. قالانىڭ بارلىق مەكتەپكە دەيىنگى ۇيىمدارى, مەكتەپتەرى, كوللەدجدەرى مەن جوو-داعى وقۋشىلار, ستۋدەنتتەر مەن ۇجىمدار پەداگوگيكالىق ەڭبەك ارداگەرلەرىمەن, ال مەديتسينالىق ۇيىمداردا دەنساۋلىق ساقتاۋ سالاسىنىڭ ارداگەرلەرىمەن كەزدەسۋ وتكىزىلەدى.
