نۇر-سۇلتان قالاسىنىڭ بايقوڭىر اۋدانى حالىقارالىق قارتتار كۇنىنە وراي «قارتتارىم – اسىل قازىنام» تاقىرىبىندا مەرەكەلىك شارا وتكىزدى.
بايقوڭىر اۋدانى اكىمدىگى مەن اۋداندىق ارداگەرلەر كەڭەسى بىرلەسىپ وتكىزگەن بۇل مەرەكەلىك شاراعا مەملەكەت جانە قوعام قايراتكەرلەرى, رەسپۋبليكالىق, قالالىق ارداگەرلەر كەڭەسىنىڭ جەتەكشىلەرى, اتقارۋشى ورگانداردىڭ وكىلدەرى, ارداگەرلەر قوزعالىسىنىڭ بەلسەندىلەرى قاتىستى.
شارانىڭ اشىلۋ سالتاناتىندا «ارداگەرلەر ۇيىمى» رەسپۋبليكالىق قوعامدىق بىرلەستىگى توراعاسىنىڭ ورىنباسارى ومىرزاق وزعانباەۆ قارتتار كۇنىن اتاپ ءوتۋدىڭ ءمانى مەن ماڭىزىنا توقتالدى. «قارتتار كۇنى الەم بويىنشا 1 قازاندا ءبىر كۇن عانا اتالىپ وتىلەدى. ال قازاقستاندا تەك ءبىر كۇنمەن عانا شەكتەلمەي, اي بويى اتاپ وتىلەدى. ءبىزدىڭ قارتتارىمىز, ارداگەرلەرىمىز قۇرمەتكە لايىق. سەبەبى ولار بۇگىنگى تاۋەلسىز قازاقستاننىڭ ىرگەتاسىن قالادى, ەلگە ەڭبەگى ءسىڭدى. ولاردىڭ ونەگەلى ءومىر جولى بۇگىنگى جاس ۇرپاققا تاماشا ۇلگى» دەدى رەسپۋبليكالىق ۇيىمنىڭ وكىلى. وسىدان سوڭ, ءبىر ءبولىم قارتتارعا العىس حاتتار بەرىلىپ, سىيلىق بۇيىمدار ۇسىنىلعان شارانىڭ سوڭى قازاقستان رەسپۋبليكاسى ۇلتتىق ۇلانى ۇلگىلى وركەسترىنىڭ كونتسەرتتىك باعدارلاماسىنا ۇلاستى. 
ايتا كەتەيىك, الەمدىك دەنساۋلىق ساقتاۋ ۇيىمىنىڭ جىكتەۋىنە سايكەس, قارت ادامدارعا 60 پەن 74 جاس, كارىلەرگە 75-89 جاس ارالىعىنداعىلار, ال ۇزاق جاساۋشىلارعا جاسى 90-نان اسقاندار كىرەدى. 1990 جىلى 14 جەلتوقساندا بۇۇ باس اسسامبلەياسى 1 قازاندى «حالىقارالىق قارتتار كۇنى» دەپ بەكىتكەن بولاتىن.
